මෙම පැමිණිල්ල කොළඹ අතිරේක මහේස්ත්‍රාත් ලෝචන් වරුසවිතාන ඉදිරියේ කැඳවනු ලැබූ අතර, එම අවස්ථාවේදී ඇප මත මුදා හැර සිටින විත්තිකාර ශෂී වීරවංශ අධිකරණයේ පෙනී සිටියාය.
මීට පෙර නඩු වාරයේදී විත්තිකාරිය වෙනුවෙන් පෙනී සිටි නීතිඥවරයා අධිකරණය හමුවේ කරුණු දක්වමින් කියා සිටියේ, මෙම නඩුවේ සාක්ෂි මෙහෙයවීමට පෙර නඩුකරයට අදාළ පරිගණක උත්පාදිත ලේඛන (Computer-generated documents) අඩංගු පරිගණක පද්ධතිය පරීක්ෂා කිරීමට තමන්ට අවස්ථාව ලැබිය යුතු බවයි. සාක්ෂි ආඥා පනත යටතේ තමන්ට එවැනි ප්‍රවේශයක් මේ දක්වා ලබාදී නොමැති බැවින් නඩුව ඉදිරියට විභාග කළ නොහැකි බව නීතිඥවරයා තර්ක කර තිබුණි.
කෙසේ වෙතත්, නඩුව අද කැඳවූ අවස්ථාවේදී අපරාධ පරීක්ෂණ දෙපාර්තමේන්තුව (CID) වෙනුවෙන් පෙනී සිටි නියෝජ්‍ය සොලිසිටර් ජෙනරාල්වරයා විත්තියේ තර්කය ප්‍රතික්ෂේප කළේය. ඔහු අධිකරණයට පෙන්වා දුන්නේ අදාළ ලේඛන පරිගණක උත්පාදිත ලේඛන නොවන බවත්, මුල් ලේඛන ස්කෑන් (Scan) කර දත්ත පද්ධතිය තුළ ගබඩා කර තැබීම පමණක් සිදුකර ඇති බවත්ය.
එසේ වුවද, විත්තිය ඉල්ලා සිටින ආකාරයට අදාළ පරිගණක පද්ධතිය පරීක්ෂා කිරීමට අවශ්‍ය ප්‍රවේශය ලබාදීම සඳහා, සාක්ෂි විශේෂ විධිවිධාන පනත යටතේ වන නොතීසිය අද දින අධිකරණයට භාරදෙන බවද නියෝජ්‍ය සොලිසිටර් ජෙනරාල්වරයා සඳහන් කළේය.
ඊට ප්‍රතිචාර දක්වමින් විත්තියේ නීතිඥවරයා කියා සිටියේ මීට අදාළව ඉදිරියේදී මෝසමක් මාර්ගයෙන් කරුණු දැක්වීමට තමන් අපේක්ෂා කරන බවයි.
ඉදිරිපත් වූ කරුණු සලකා බැලූ මහේස්ත්‍රාත්වරයා, නඩුවේ වැඩිදුර විභාගය එළඹෙන ජූලි මස 24 වනදා දක්වා කල් තැබීමට නියෝග කළේය.
