• ජාති, ආගම්, කුළ, මළ භේද වලින් තොර රටක් තැනිය හැක්කේ අධ්‍යාපනයෙන් පමණයි.
• අධ්‍යාපනය වගේම මිනිසුන් නීරෝගීව සිටීම රටේ දියුණුවට වැදගත්.
• ලංකාවටම උගන්වන්න පුලුවන් හොඳ ගුරුවරු මේ යාපනේ ඉන්නවා
• යාපනයට ජාත්‍යන්තර ගුවන්තොටුපලක් ලබා දීමෙන් යාපනය ආර්ථිකය මීට වඩා දියුණු කල හැකියි
ශ්‍රී ලාංකිකයින්ගේ ඩිජිටල් සාක්ෂරතාවය වර්ධනය කිරීමත්, සන්නිවේදන සහ චින්තන කුලසලතාවයන් වර්ධනය කිරීමත් අරමුණු කර ගනමින් ශ්‍රී ලංකාව පුරා ක්‍රියාත්මක “ඩී.පී.එඩියුකේශන් අයි.ටී. කැම්පස්” ව්‍යාපෘතිය යටතේ යාපනය දිස්ත්‍රික්කයේ පාඨාමාළා 100 සම්පූර්ණ කළ තරුණ තරුණියන් වෙනුවෙන් සහතික පත්‍ ප්‍රදානය කිරීමේ උත්සවය අද (30) යාපනය මුට්ට්‍රවේලී ක්‍රීඩාංගණයේදී ඩී.පී.එඩියුකේෂන් නිර්මාතෘ හා සභාපති ධම්මික පෙරේරා ගේ ප්‍රධානත්වයෙන් පැවැත්විණ.
තොරතුරු තාක්ෂණ ක්ෂේත්‍රයේ රැකියා දස ලක්ෂයක් බිහි කිරීමේ ඉලක්කය ඇතිව ඩී. පී. එඩියුකේෂන් අයි. ටී. කැම්පස් ව්‍යාපෘතිය ශ්‍රී ලංකාව තුල ආරම්භ කර ඇත. මෙම ව්‍යාපෘතිය යටතේ ක්‍රියාත්මක පරිගණක පාඨමාලා 324 හි සම්පූර්ණ වටිනාකම රුපියල් ලක්ෂ 25ක් වන අතර එය සම්පූර්ණයෙන්ම නොමිලයේ දැයේ දූවා දරුවන් වෙත ලබාදීමට ඩී.පී.එඩියුකේෂන් නිර්මාතෘ හා සභාපති ධම්මික පෙරේරා විසින් කටයුතු කරයි. ආසියාවේ අංක එකේ හොඳම තොරතුරු තාක්ෂණ විශ්ව විද්‍යාලය බවට පත්ව ඇත්තේද මෙම ඩී. පී. එඩියුකේෂන් අධ්‍යාපනික ව්‍යාපෘතියයි.
මෙම උත්සව අවස්ථාව අමතමින් ධම්මික පෙරේරා මෙසේ සඳහන් කළේය.
''ජාති, ආගම්, කුළ, මළ භේද වලින් තොර රටක් තැනිය හැක්කේ අධ්‍යාපනයෙන් පමණයි''
අද මම යාපනයට ඇවිත් ඉන්නේ අධ්‍යාපනයේ සංවර්ධනයත් අරගෙන. මේ වෙනකොට මම යාපනය දිස්ත්‍රීක්කයේ ඩී.පී. එඩියුකේශන් අයි.ටී. කැම්පස් 09 ක් හදල තියෙනවා. ඒ කැම්පස් වලින් ඉගෙන ගන්න ළමයි 4558 කට තමයි අද මෙතෙන්දි සහතිකපත් ලබා දෙන්නේ. මගේ මේ අයි.ටී. කැම්පස් එක ඇතුළෙ පළමු පාඨමාලා 100 හදල තියෙන්නේ ඇමරිකාවේ ළමුන් ඉගෙන ගන්න ක්‍රමවේදයට අනුව. මොකද මේ පළමු පාඨමාලා ඇතුලේ මම අපේ ළමයින්ට දෙන්නේ අධ්‍යාපනය විතරක් නෙවෙයි. ප්‍රශ්න විසඳන අයුරු, සාදාචාර සම්පන්නව ළමයෙක් හැදෙන්නේ කොහොමද වගේ දේවල් මේ පළමු පාඨමාලා 100 කරන කොට ඒ ළමයට ඉගෙන ගන්න පුලුවන්.
ඩී.පී. එඩියුකේෂන් එකට එනකොට හිටපු ළමයත් දැන් ගෙදර ඉන්න ළමයත් අතර වෙනස දෙමව්පියන් ගෙදරදි අත් විඳල ඇති කියල මම හිතනවා. ඒ වගේම මේ රට ගොඩගන්න පුළුවන් අධ්‍යාපනයෙන් විතරයි කියල මම දැඩිව විශ්වාස කරන නිසා තමයි මගේ පෞද්ගලික ධනය වැය කරමින් මේ වගේ අධ්‍යාපනික ව්‍යාපෘතියක් මුළු දිවයිනම ආවරණය වන අයුරින් ක්‍රියාත්මක කරන්නේ.
ලංකාවෙ පාසල් වලට එක හා සමාන අධ්‍යාපනයක් දෙන්න පුලුවන් ක්‍රම වේදය මේ තාක්ෂණයත් එක්ක ගොඩනැගී අවසන්. ඒකට යන්නේ මාස හයක් වැනි කෙටි කාලයක්. ඒකට කරන්න තියෙන එකම දේ හැම පාසලකම සුහුරු පන්ති කාමරයක් (Smart Class Room) හදන එක විතරයි. මම යාපනය දිස්ත්‍රික්කයේ පාසල් 26කට සුහුරු පන්ති කාමර මේ වෙන කොට ලබා දීල අවසන්. මම ඉදිරියේදී තවත් සුහුරු පන්ති කාමර ලබා දීමට බලාපොරොත්තු වෙනවා. මේ වෙනකොට ලංකාවේ විශ්ව විද්‍යාලවල ඉගෙන ගන්නෙ එක්ලක් තිස්දහසක් වගේ ළමුන් ටිකක්. අද මාගේ අයී.ටී කැම්පස් 150ත් ළමයි එක්ලක්ෂ තිස් දාහයක් ඉගෙන ගන්නවා. ජාති, ආගම්, කුල, මළ භේද නැති කල හැකි එකම ක්‍රමවේදය සැමට සමානව අධ්‍යාපන ලබා දීම තුලින් කියලයි මම හිතන්නේ.
ඒ වගේම මම යාපනය ජනතාවගේ සෞඛ්‍ය නගා සිටුවන්න යාපනය ශික්ෂණය රෝහල ඇතුළු තවත් රෝහල් වලට අවශ්‍ය උපකාර ලබා දීල තියෙනවා. මොකද අධ්‍යාපනය වගේම මිනිසුන්ගේ නීරෝගීව සිටීම රටේ දියුණුවට වැදගත් නිසයි මම ඒ විදියෙ උදව් කළේ. යාපනයේ ජනතාවට සෘජුව ලෝකය සමග ගනුදෙනු කර යාපනය ආර්ථික අතින් තවත් ශක්තිමත් කිරීමේ ඊලග සංවර්ධන ව්‍යාපෘතිය ලෙස යාපනයට ජාත්‍යන්තර ගුවන් තොටුපලක් ලබා දීම සුදුසු” යැයි ප්‍රධාන දේශනය පවත්වමින් ඩී.පී. එඩියුකේශන් නිර්මාතෘ සහ සභාපති ධම්මික පෙරේරා පැවසුවේය.
යාපනය අයි.ටී. කැම්පස් සම්බන්ධීකරණ කටයුතු සහ ඉගැන්වීම් කටයුතු සිදුකරන ගුරු භවතුන් 28 දෙනකු ඇගයීමට ලක්කර තිළිණ ප්‍රදානය කිරීමක්ද මෙහිදී සිදු කෙරිණ.
මෙම උත්සවය සඳහා යාපනය නාග විහරයේ විහරාදිපති මිගහජඳුරේ ශ්‍රී විමල චන්ද්‍ර ස්වාමීන් වහන්සේ ප්‍රමුඛ අන්‍යාගමික නායක ප්‍රසාදීන්, යාපනය දිස්ත්‍රික් පාර්ලිමේන්තු මන්ත්‍රී අංගජන් රාමනාදන්, ශ්‍රී ලංකා ඉන්දීය මහ කොමසාරිස් කාර්යාලයේ නියෝජිත Shri Nagarajan Ramaswamy , යාපනය නගරසභා කොමසාරිස් Krishnenthiran, ඉහල පෙලේ රාජ්‍ය නිලධාරීන්, දෙමාපිය සිසු දරු දැරියන් ඇතුළු 10000ක පිරිසක් සහභාගී වී සිටියහ.
