මෙයට චීන මහජන බැංකුව යටතේ හුවමාරු ගිවිසුමෙන් ලැබුණු මුදල් ද ඇතුළත් වෙයි.
''නිවැරදි මූල්‍ය කළමනාකරණයෙන් විදෙස් සංචිත ඩො.බිලියන 7.3ක් දක්වා ඉහළ ගිහින්'' -නියෝජ්‍ය ඇමැති චතුරංග අබේසිංහ
නියෝජ්‍ය ඇමැති චතුරංග අබේසිංහ
කෙසේවුවද කර්මාන්ත සහ ව්‍යවසායකත්ව සංවර්ධන නියෝජ්‍ය ඇමැති චතුරංග අබේසිංහ, ආණ්ඩුවේ 'දිනමිණ" පුවත්පතට අද (08) පවසා ඇත්තේ, නිවැරදි මූල්‍ය කළමනාකරණය හේතුවෙන් මේ වන විට ශ්‍රී ලංකාවේ විදෙස් සංචිත ප්‍රමාණය අමෙරිකානු ඩොලර් බිලියන 7.3 දක්වා ඉහළ ගොස් තිබෙන බවයි.
නියෝජ්‍ය අමාත්‍යවරයා තවදුරටත් මෙසේද සඳහන් කර ඇත.
“ලෝකයේ අර්බුදයක් තිබෙනවා. තර්ජනයක් ඇතිව තිබෙනවා. අපිට එන්න පුළුවන් අභියෝගය සම්පූර්ණයෙන්ම කළමනාකරණය කර තිබෙනවා. කිසිදු නිෂ්පාදන ආයතනයක් වසා දමා නැහැ. ජන ජීවිතයට, නිෂ්පාදනවලට කිසිදු බලපෑමක් එල්ල වෙලා නැහැ. රජය එය හොඳින් කළමනාකරණය කර තිබෙනවා. බලශක්ති සම්පාදනය අඛණ්ඩව සිදුකර තිබෙනවා. මේ දින 40 කිසිදු ගැටලුවකින් තොරව කටයුතු කරගෙන යනවා. මේක දරා ගන්න ඇතැමුන්ට නොහැකිව තිබෙනවා. අප්‍රේල් සිට ජූනි මාසය දක්වා අපිට කිසිදු බලශක්ති ගැටලුවක් නැහැ. 2025 වන විට අපි ශක්තිමත් ආර්ථිකයක් ගොඩනඟා තිබුණා. ඩොලර් බිලියන 7.3 ක සංචිතයක් අපි ළඟ තිබෙනවා. ඩොලර් බිලියන 3ට වැඩි ණය මුදලක් ගෙවා තිබෙනවා. ඩොලර් බිලියන 1.7ක වාහන ආනයනය කර තිබෙනවා. භාණ්ඩාගාරය සතුව මුදල් තිබුණු නිසා මෙය නිවැරදිව කළමනාකරණය කරන්න හැකිව තිබෙනවා.
බදු කළමනාකරණය හොඳින් කරගෙන යනවා. දශකයක් කරගන්න නොහැකිවූ දේ අපි වසරක් තුළ සිදුකර තිබෙනවා. අසංවිධිත දේ මේ වන විට සංවිධිත කරගන්න හැකිව තිබෙනවා. ආයෝජන ගේන විට විනිවිදභාවයෙන් කටයුතු කරනවා. ආයෝජකයන්ට හිමිවන බදු සහන ආදිය අපි සාකච්ඡා කර තිබෙනවා. මීට පෙර මුහුණ බලලා සාකච්ඡා කළේ. දැන් ආයෝජකයන්ට ඇමැතිවරයා හෝ ජනාධිපතිවරයා හමුවීමට අවශ්‍ය නැහැ. ආයෝජන මණ්ඩලය ආදිය සමඟ කටයුතු කරන්න පුළුවන්. බදු සහන සම්බන්ධයෙන් අපි දැනුම් දී තිබෙනවා. ඇතැම් ක්ෂේත්‍රවල ඒවා ක්‍රියාත්මක වෙනවා. ලංකාවට එන ආකාරය සම්බන්ධයෙන් ආයෝජකයන්ට මේ වන විට පැහැදිලි අවබෝධයක් තිබෙනවා. රුපියල් මිලියන 75 ක පමණ ආයේජනයක් කරනවා නම් පළමු වසරේ දී බදු සහන හිමිවෙනවා.”
