රේගුවේ නව ඩොලර් අනුපාතය නිසා බඩු මිල ඉහළ යාමේ අවදානමක්; වහාම සංශෝධනය කරන්නැයි ඉල්ලීම්
"මහ බැංකු අනුපාතය නොතකා රේගුව ඩොලරයට වැඩි මිලක් අය කිරීම ගැටලුසහගතයි" - ජනාධිපති නීතිඥ මෛත්‍රී ගුණරත්න
ශ්‍රී ලංකා මහ බැංකුව සහ වාණිජ බැංකු විසින් ප්‍රකාශිත නාමික විනිමය අනුපාතයන් නොතකා, ශ්‍රී ලංකා රේගුව මැයි 25 සිට 29 දක්වා කාලය සඳහා ඇමෙරිකානු ඩොලරයක රේගු හුවමාරු අගය රුපියල් 353.17 ක් ලෙස ඉහළ මට්ටමක නියම කර ඇතැයි 'ෆ්‍රී ලෝයර්ස් සංවිධානය පවසයි.
රේගු දෙපාර්තමේන්තුව සතිපතා ප්‍රකාශයට පත් කරන විනිමය අනුපාත ලේඛනයට අනුව මෙම පියවර ගෙන ඇත.
මහ බැංකුව අන්තර් බැංකු ගනුදෙනු හරහා ඩොලරයේ අගය කෘත්‍රිමව පහළ මට්ටමක පවත්වා ගැනීමට උත්සාහ කළද, රේගුව මෙලෙස ඉහළ අගයක් අය කිරීම ගැටලුසහගත බව ෆ්‍රී ලෝයර්ස් සංවිධානය පෙන්වා දෙයි.
සාමාන්‍යයෙන් රේගු අනුපාත තීරණය වන්නේ ඊට පෙර සතියේ පැවති වෙළෙඳපොළ සාමාන්‍ය අගයන් මත වුවද, පවතින නාමික අනුපාතයට වඩා මෙය පැහැදිලිවම ඉහළ අගයකි.
මෙම තත්ත්වය මෙරට අත්‍යවශ්‍ය ආනයනික භාණ්ඩ මිල කෙරෙහි සෘජුවම බලපාන බව 'ෆ්‍රී ලෝයර්ස්' සංවිධානයේ කැඳවුම්කරු, ජනාධිපති නීතිඥ මෛත්‍රී ගුණරත්න කියා සිටියි.
පාරිභෝගිකයා පිට පැටවෙන මෙම පීඩනය වැළැක්වීම සඳහා මහ බැංකුවේ නාමික විනිමය අනුපාතයට ගැළපෙන සේ රේගු ගනුදෙනු අගයද වහාම සංශෝධනය කිරීමට බලධාරීන් පියවර ගත යුතු බව ඔහු අවධාරණය කරයි.
