නිදහස් අදහස් ප්‍රකාශනයේ යෙදෙන පුද්ගලයන් සිරගත කිරීම සඳහා ශ්‍රී ලංකාවේ බලධාරීන් විසින් නීතිය භාවිතයට ගැනීම කෙරෙහි
මහාධිකරණයේ අවධානය යොමුව තිබේ.
ජාතීන් අතර සමගිය වර්ධනය අරමුණු කොටගත් පනතක් අනිසි ලෙස යොදා ගනිමින් මාස පහකට අධික කාලයක් සිරගත කර සිටි මුස්ලිම් නිදහස් මතධාරියකුට ඇප ලබා දුන් කොළඹ මහාධිකරණයේ නිරීක්ෂණය වී ඇත්තේ රටක නීති සකස් කර තිබෙන්නේ පුද්ගලයන්ගේ නිදහස් අදහස් ප්‍රකාශ කිරීමේ අයිතිය ආරක්ෂා කිරීම සදහා බවයි.
දේශිය සහ ජාත්‍යන්තර මානව හිමිකම් ක්‍රියාධරයන්ගේ දැඩි විරෝධතා මධ්‍යයේ සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුතිය පනත යොදා ගනිමින් සිරගත කර සිටි සමාජ ක්‍රියාකාරිකයකු වන රම්සි රසික් ට සැප්තැම්බර් 17 බ්‍රහස්පතින්දා මහාධිකරණයෙන් ඇප නිර්දේශ වුයේ දින 161 ක් සිරගත කර තැබීමෙන් පසුවයි. සිපිරිගෙයි ලැග සිටි කාලය තුල බරපතල ලෙස රෝගාතුර වී සිටි ඔහුගේ අතක් කැඩී පාදයක ඇඟිල්ලක් ද කපා දමන්නට සිදුවී ඇති බව මානව හිමිකම් ක්‍රියාධාරීහු පවසති.
''සිපිරිගෙයි ලැග සිටි කාලය තුල බරපතල ලෙස රෝගාතුර වී සිටි ඔහුගේ අතක් කැඩී පාදයක ඇඟිල්ලක් ද කපා දමන්නට සිදුවී ඇති බව මානව හිමිකම් ක්‍රියාධාරීහු පවසති. ''
ෆේස්බුක් සටහනක් පාදක කොට ගෙන අප්‍රේල් 9 දා කටුගස්තොට, පොල්ගස්දෙනියේ සිය නිවසේදී අත් අඩංගුවට ගන්නා ලද රම්සි රසීක්ට ඇප ලබාදීම නිර්දේශ කළ මහාධිකරණ විනිසුරු ආදිත්‍ය පටබැදි පුද්ගල නිදහස ඇහිරෙන ලෙස නීතියේ ප්‍රතිපාදන යොදා ගැනීම සම්බන්ධයෙන් නීතිපති දෙපාර්තමේන්තුව වෙනුවෙන් පෙනී සිටි නීතිඥවරයාගේ අවධානය යොමු කර තිබේ.
රම්සි රසීක් වෙනුවෙන් පෙනී සිටි හිටපු පාර්ලිමේන්තු මන්ත්‍රී ජනාධිපති නීතීඥ එම් ඒ සුමන්තිරන් ඊයේ අධිකරණය හමුවේ පෙන්වා දී ඇත්තේ, රම්සී රසීක් තම අදහස් ඉදිරිපත් කර ඇත්තේ රටේ පවතින නීති රාමුව තුළ හිඳිමින් බවයි.
ඔහුගේ අදහස් ප්‍රකාශනය නීතියට පටහැනි නොමැති බව අධිකරණය හමුවේ පෙන්වා දී ඇති නීතිඥ එම්.ඒ සුමන්තිරන්, රම්සි රසීක්ට දීර්ඝ කාලීනව පවතින රෝගී තත්වයක් සම්බන්ධයෙන් ද අධිකරණයට දැනුම් දී තමන් පෙන්වා දුන් කරුණු සැලකිල්ලට ගෙන ඔහුට ඇප ලබා දෙන ලෙස ද ඉල්ලා තිබේ.
රම්සි රසීක්ගේ ඥාතීන් මාධ්‍යවේදීන් හා කියා ඇත්තේ රුපියල් ලක්ෂය බැගින් වන පුද්ගලික ඇප දෙකක් මත ඔහු නිදහස් කරන ලෙස කොළඹ මහාධිකරණය නියෝග කළ බවයි.
කෙසේ වෙතත් නිල ලේඛන වල වැඩ කටයුතු හමාර නොවීම හේතුවෙන් රම්සි රසීක්ට අද දිනය දක්වා ඇප ලබා ගැනීම වෙනුවෙන් බලා සිටීමට සිදු වන බව ඔහුගේ ඥාතීහු මාධ්‍යවේදීන් හා පවසා සිටියහ.
ඊයේ දිනයේ නඩු විභාගය සදහා රහස් පොලීසිය අධිකරණයට පැමිණ නොසිටිය බව ඔවුන් වැඩි දුරටත් පවසා තිබේ. රම්සි රසීක්ද ඊයේ දිනයේ අධිකරණයට පැමින නොමැත.
මතවාදී ජිහාඩයක් :
විශ්‍රාමික රජයේ නිලධාරියකු වන රම්සි රසීක් 2020 අප්‍රේල් 9 දා රහස් පොලීසිය විසින් අත් අඩංගුවට ගෙන තිබුනේ ශ්‍රී ලංකාවේ මුස්ලිම් ප්‍රජාව පීඩාවට පත් කරන සකලාකාරයේ ජාතිවාදය පිටු දැකීමට “මතවාදී ජිහාඩයක් (අරගලයක්)” කළ යුතු බවට ඔහු විසින් අප්‍රේල් මුලදී පල කරන ලද සටහනක් පදනම් කොටගෙනය.
එම සටහනින් දෙදිනකට පසු ඔහු නැවත පල කළ සටහනකින් කියැවුනේ ගිනිය නොහැකි තරමේ මරණ තර්ජන ලැබුණු අතර කලින් ලියවුනු ප්‍රකාශය වැරදි ලෙස අර්ථ නිරූපනය කළ බොහෝ දෙනා ජාතිවාදී අදහස් වපුරන බවට චෝදනා නගමින් ඔහු බන්ධනාගාර ගත කරන ලෙස උද්ඝෝෂණය කළ බවයි.
සමාජ මාධ්‍ය තුළ මෙන්ම පුවත්පත් හා ජනමාධ්‍ය තුළත් සිංහල, දමිළ හා ඉංග්‍රීසි තෙබසින්ම සිය අදහස් දක්වමින් සමාජ ක්‍රියාකාරිකයකු ලෙස කටයුතු කරන රම්සි රසික් කොරෝනා වසංගත සමයේ අත්අඩංගුවට පත් වීමෙන් පසුව රම්සි රසීක්ට වෛද්‍ය පහසුකම් හා නීති ආධාර ලබාගැනීමට ඇති ඉඩකඩ අහුරා ඇති බවට සිංහල, දෙමළ සහ මුස්ලිම් සිවිල් ක්‍රියාධාරීන් පිරිසක් ශ්‍රී ලංකා මානව හිමිකම් කොමිසමට ලියා ඇති ලිපියක සඳහන් වෙයි.
“ඔහුට වෛද්‍ය පහසුකම් සලසන ලෙස මහේස්ත්‍රාත් විසින් නියෝග කර තිබියදීත්, ඔහුට අත්‍යාවශ්‍ය වී තිබෙන විශේෂිත ඖෂධ නොලැබී යාම නිසා ඔහුගේ සෞඛ්‍ය තත්වය පිරිහෙමින් පවතී,” යි කොමිසමේ හිටපු ප්‍රධානී ආචාර්ය දීපිකා උඩගමට පසුගියදා යොමු කරන ලද ලිපියේ දැක්වේ.
දෙස් විදෙස් විරෝධය:
සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුතිය පනත (ICCPR) යොදා ගනිමින් රම්සි රසීක් සිරගත කර සිටි පස් මසකට වැඩි කාල සීමාව තුලදි ඔහුගේ නිදහස වෙනුවෙන් දෙස් විදෙස් මානව හිමිකම් සංවිධාන කිහිපයක් ම හඩ නගා තිබුනි.
නෛතික පැහැදිලි කමක් නොමැතිව, වෙනස්කම් පාමින් ICCPR පනත යොදාගැනීම සම්බන්ධයෙන් ශ්‍රී ලංකා පොලිසියට ලියන ලිපියක් මගින් ඉකුත් සැප්තැම්බරයේ මානව හිමිකම් කොමිසම විසින් ද පෙන්වා දී තිබුනි.
එක්සත් ජාතීන්ගේ සංවිධානය ඇතුළු ජාත්‍යන්තර මානව හිමිකම් සංවිධානද ශ්‍රී ලංකාව විසින් ICCPR පනත අනිසි ලෙස යොදාගැනීම ගැන මීට ඉහත කිහිප වාරයක් අනතුරු අඟවා තිබේ.
''එක්සත් ජාතීන්ගේ සංවිධානය ඇතුළු ජාත්‍යන්තර මානව හිමිකම් සංවිධානද ශ්‍රී ලංකාව විසින් ICCPR පනත අනිසි ලෙස යොදාගැනීම ගැන මීට ඉහත කිහිප වාරයක් අනතුරු අඟවා තිබේ.''
කොමිසමේ හිටපු සභාපතිනියට ලියන ලිපියක් මගින් ඉතුක් ජුලි මාසයේ මානව හිමිකම් ක්‍රියාධාරීන් පිරිසක් චෝදනා කර තිබුනේ ප්‍රචණ්ඩතා අවුළුවන්නන් වගඋත්තරකාරිත්වයෙන් බැඳ තැබීම අරමුණු කොටගත් ICCPR පනත මෑතක සිට යොදා ගැනෙන්නේ රාජ්‍යය සහ/ හෝ එහි ප්‍රතිපත්ති විවේචනය කරන්නන්ට එරෙහි ආයුධයක් වශයෙනි.
සිවිල් සමාජයේ ආශිර්වාදයෙන් බලයේ සිටි පසුගිය ආණ්ඩුව සමයේද සම්මානලාභී ලේඛක ශක්තික සත්කුමාර හාරමාසයකට වැඩි කලක් සිරගත කොට තබන්නටද ICCPR පනත යොදා ගෙන තිබුනි.
''සිවිල් සමාජයේ ආශිර්වාදයෙන් බලයේ සිටි පසුගිය ආණ්ඩුව සමයේද සම්මානලාභී ලේඛක ශක්තික සත්කුමාර හාරමාසයකට වැඩි කලක් සිරගත කොට තබන්නටද ICCPR පනත යොදා ගෙන තිබුනි.''
මේ දෙදෙනාටම විරුද්ධව පවරා ඇති නඩු ඉවත් කරගන්නා ලෙස ආණ්ඩුවට බල කරමින් ජාත්‍යන්තර පෙත්සම් ව්‍යාපාර දියත් කර තිබේ.
කෙසේවෙතත්, විරුද්ධවාදීන් හා මානව හිමිකම් ක්‍රියාධාරීන් මර්දනය කරන බවට එක්සත් ජාතීන්ගේ මානව හිමිකම් පිළිබඳ කොමසාරිස්වරිය විසින් නගන ලද චෝදනා බැහැර කරමින් ශ්‍රී ලංකාවේ ආණ්ඩුව ජිනීවාහිදී පවසා සතියේ “ප්‍රකාශනයේ අයිතිය සහ සිවිල් සමාජ අවකාශය ආරක්ෂා කිරීමටත්, නගා සිටුවීමටත්” රජය කැපවී සිටින බවයි.
සබැඳි පුවත් :
ගෝඨාභය පාලනය යටතේ මානව හිමිකම් රැකදීමට ජාත්‍යන්තර මැදිහත් වීමකට බලපෑම්
ෆේස්බුක් ලියන්නන්ට නඩු දාන්න කලින් හොයා බලන ලෙස පොලිසියට අවවාද
නීතිය හිතුමතේ යොදාගෙන මුස්ලිම්වරුන් හා ලේඛකයන් මඩිනබවට වාර්තාවක්
හැට දවසකට වැඩි කලක් හිරබත් කන රම්සි රසීක් නිදහස් කරනු!
ලෝක ජනමාධ්‍ය නිදහස දිනයදා ලංකාවේ ලේඛක ලේඛිකාවන් 17ක් හිරේ
කොවිඩ් අන්තවාදය පැරදවීමට ‘චින්තනමය යුද්ධයක්’ කළ යුතු බව පැවසු රම්සි රසීක් අත්අඩංගුවට!
කොරෝනා කාලේ ආලේ – මරාලේ! - සුනන්ද දේශප්‍රිය
සමාජ මාධ්‍ය කරුවන් අවනීතියෙන් අත් අඩංගුවට ගන්නා බවට පොලිසියට චෝදනා
