විපක්ෂ සන්ධාන කතාබහ අස්සේ ශ්රීලනිපය හා පොහොට්ටුව අතර සීතල යුද්ධයක්
දේශපාලනය ගැන මහින්දගෙන් පාඩම් ඉගෙන ගන්නා ලෙස දුමින්දගෙන් උපදෙසක්
ඉදිරි දේශපාලන ප්රතිසංවිධාන සහ සන්ධානගතවීම් සම්බන්ධයෙන් දේශපාලන කරළියේ විවිධ කතාබහ මතුවෙමින් පවතින පසුබිමක, ශ්රී ලංකා පොදුජන පෙරමුණ සහ ශ්රී ලංකා නිදහස් පක්ෂය අතර වාග් සංග්රාමයක් ආරම්භ වී තිබේ.
ශ්රී ලංකා පොදුජන පෙරමුණ විසින් පසුගියදා පැවැත්වූ විශේෂ හමුවකට ශ්රී ලංකා නිදහස් පක්ෂයට ආරාධනා කිරීමේ කිසිදු අවශ්යතාවක් නොමැති බවට එම පක්ෂයේ හිටපු රාජ්ය අමාත්ය තිස්ස කුට්ටිආරච්චි ප්රකාශ කර තිබිණි. ඊට ඍජුව ප්රතිචාර දක්වමින් ශ්රී ලංකා නිදහස් පක්ෂයේ ජාතික සංවිධායක, හිටපු අමාත්ය දුමින්ද දිසානායක පෙන්වා දෙන්නේ දේශපාලනයේදී අනෙකුත් පාර්ශ්වයන් සමඟ සහයෝගයෙන් කටයුතු කළ යුතු ආකාරය පිළිබඳව හිටපු ජනාධිපති මහින්ද රාජපක්ෂ ගෙන් පාඩම් උගත යුතු බවයි.
මහින්දගෙන් පාඩම් ඉගෙන ගන්න
මාධ්යවේදීන් නැගූ ප්රශ්න හමුවේ අදහස් දැක්වූ දුමින්ද දිසානායක අවධාරණය කළේ, පුළුල් දේශපාලන බලවේගයක් ගොඩනැගීමේදී සියලු පාර්ශ්ව එක්තැන් කරගැනීමේ පරිණතභාවය හිටපු නායකයින් සතුව පැවති බවයි.
“හයවැනි විධායක ජනාධිපති මහින්ද රාජපක්ෂ මහත්මයාගෙන් පාඩමක් ඉගෙන ගත්තොත් මේ කට්ටියට හොඳයි. ඒ කතාව අහන අයට තේරෙනවා මම මොකක්ද මේ කියන්නේ කියලා,” යනුවෙන් ඔහු සඳහන් කළේය.
අනුරාධපුරයේ වැව් සහ පිට්ටනි උපමාව
පොදුජන පෙරමුණේ ඇතැම් පාර්ශ්ව පළකරන අදහස් දේශපාලන නොමේරුභාවය පෙන්නුම් කරන්නක් බව පැහැදිලි කිරීම සඳහා ඔහු අනුරාධපුර ඓතිහාසික පරිසරය උපමාවට ගත්තේය. අනුරාධපුරයට නන් දෙසින් බැතිමතුන් මෙන්ම විදේශිකයන් ද පැමිණෙන බව සිහිපත් කළ දුමින්ද දිසානායක, තමන්ගේ ප්රදේශයේ ක්රීඩාංගණයකට හෝ වැවකට පිටස්තර පිරිසක් පැමිණියා යැයි කිසිවකු කෝප නොවන බව පැවසීය.
“අපි අපේ ground එකට ඇවිල්ලා සෙල්ලම් කළාට, අපේ වැවක ඇවිල්ලා නෑවට අපි තරහ වෙන්නෙත් නෑ, කෝප වෙන්නෙත් නෑ. මොකද වැව අරන් යන්නෙත් නෑ, ground එක අරන් යන්නෙත් නෑ. ඒ නිසා ඕන තරම් කට්ටිය එනවා, යනවා. ඇවිල්ලා අපේ ක්රීඩාංගණවල සෙල්ලම් කරලා යනවා,” යනුවෙන් ඔහු වැඩිදුරටත් කියා සිටියේය.
විපක්ෂ සන්ධාන ක්රියාවලියේ අර්බුදය
වත්මන් පාර්ලිමේන්තු සහ ජාතික දේශපාලන බලතුලනය හමුවේ සාම්ප්රදායික දේශපාලන පක්ෂ සිය පැවැත්ම තහවුරු කරගැනීමට උත්සාහ දරමින් සිටියි. විශේෂයෙන්ම පසුගිය මැතිවරණ ප්රතිඵල සහ ආර්ථික අර්බුදයෙන් පසු රට තුළ නිර්මාණය වූ නව දේශපාලන ප්රවණතාවන්ට මුහුණ දීම සඳහා විපක්ෂ කණ්ඩායම් අතර එකඟතාවක් ගොඩනැගීමේ අවශ්යතාව නිරන්තරයෙන් සාකච්ඡාවට ලක්වේ.
කෙසේවෙතත්, කලක් එකට ආණ්ඩු බලය හෙබවූ ශ්රී ලංකා නිදහස් පක්ෂය සහ ශ්රී ලංකා පොදුජන පෙරමුණේ ප්රබලයින් අතර මෙලෙස ප්රසිද්ධියේ මතුවන මතභේද හේතුවෙන්, ඉදිරියේදී පුළුල් දේශපාලන පෙරමුණක් ගොඩනැගීමේ ක්රියාවලිය තවදුරටත් සංකීර්ණ වනු ඇති බව දේශපාලන විචාරකයෝ පෙන්වා දෙති.
