එක්නැළිගොඩ නඩුව තීරණාත්මක අදියරක: විත්තිකරුවන් නවදෙනාම සිය ස්ථාවරය කියයි

විත්තිකූඩුවේ සිට සිය ස්ථාවරය (විත්තිවාචිකය) අධිකරණය හමුවේ ප්‍රකාශ කිරීමට විත්තිකරුවන් නවදෙනාට ලබා දී තිබූ අවස්ථාව අදින් අවසන් විය.

අධිකරණ ක්‍රියාවලිය සිදුවූයේ කෙසේද?

කොළඹ 07, විජේරාම මාවතේ පිහිටි ස්ථිර ත්‍රිපුද්ගල විශේෂ මහාධිකරණයේදී අද පෙරවරු 9.30ට නඩුව කැඳවනු ලැබීය. සභාපති විනිසුරු නයනා සෙනවිරත්න, නලින් හේවාවසම් සහ ලක්මාලි හේවාවසම් යන විනිසුරු මඬුල්ල හමුවේ මෙම විභාගය පැවැත්විණි.

මීට පෙර පැමිණිල්ලේ සාක්ෂි විභාගය අවසන් වූ අවස්ථාවේදී විත්තියේ නීතිඥවරුන් විශේෂ ඉල්ලීමක් කළහ. පැමිණිල්ල ඉදිරිපත් කළ සාක්ෂි මගින් චෝදනා ඔප්පු කිරීමට ප්‍රමාණවත් පදනමක් නොමැති බැවින්, විත්තියේ සාක්ෂි නොකැඳවාම විත්තිකරුවන් නිදොස් කොට නිදහස් කරන ලෙස ඔවුහු ඉල්ලා සිටියහ.

එම ඉල්ලීම ප්‍රතික්ෂේප කළ විනිසුරු මඬුල්ල, චෝදනා සම්බන්ධයෙන් විත්තිකරුවන්ගේ පාර්ශ්වයේ පැහැදිලි කිරීම (විත්තිවාචිකය) ඉදිරිපත් කරන ලෙස පසුගිය 06 වැනිදා නියෝග කළේය. අද සිදු වූයේ එම අධිකරණ නියෝගය ක්‍රියාත්මක වීමයි.

විත්තිය වෙනුවෙන් සාක්ෂිකරුවන් කැඳවීමට අවසර

විත්තිකරුවන් නවදෙනා සිය ස්ථාවරය ප්‍රකාශ කිරීමෙන් පසු, 3 වැනි සහ 4 වැනි විත්තිකරුවන් වෙනුවෙන් සාක්ෂිකරුවන් කැඳවීමට ඔවුන්ගේ නීතිඥවරුන් අධිකරණයෙන් අවසර ඉල්ලා සිටියහ.

3 වැනි විත්තිකරු වෙනුවෙන්: සාක්ෂිකරුවන් 06 දෙනෙකු කැඳවීමට නියමිතය.

4 වැනි විත්තිකරු වෙනුවෙන්: සාක්ෂිකරුවන් 02 දෙනෙකු කැඳවීමට නියමිතය.

ඒ අනුව අදාළ සාක්ෂිකරුවන්ට අධිකරණය හමුවේ පෙනී සිටින ලෙස සිතාසි නිකුත් කිරීමට විනිසුරු මඬුල්ල නියෝග කළේය. නඩුව යළි ලබන නොවැම්බර් 19 වැනිදා පෙරවරු 9.30ට කැඳවීමට නියමිතය.

විත්තිකරුවන් සහ නඩුවේ පසුබිම

2010 වසරේ ජනවාරි 24 වැනිදා හෝ ඊට ආසන්න දිනයකදී ගිරිතලේ, හබරණ සහ කොට්ටාව යන ප්‍රදේශවලදී මාධ්‍යවේදී ප්‍රගීත් එක්නැළිගොඩ පැහැරගෙන ගොස් රහසිගතව සිරකර තැබීම ඇතුළු අධිචෝදනා 17ක් යටතේ නීතිපතිවරයා විසින් දණ්ඩ නීති සංග්‍රහය යටතේ මෙම නඩුව ගොනු කර තිබේ.

මෙම නඩුවේ විත්තිකරුවන් ලෙස නම් කර ඇති යුද හමුදා බුද්ධි අංශ සාමාජිකයන් 09 දෙනා පහත පරිදි වේ:

1- ලුතිනන් කර්නල් ෂම්මි කුමාරරත්න (ගිරිතලේ යුද හමුදා කඳවුරේ හිටපු අණදෙන නිලධාරී)
2- ඩබ්ලිව්.ඩී. උපසේන (සුරේෂ්)
3- ආර්.එම්.පී.කේ. රාජපක්ෂ (නාදන්)
4- එස්.එම්. රවීන්ද්‍ර රූපසේන (රංජි)
5- චමින්ද කුමාර අබේරත්න
6- කනිෂ්ක ගුණරත්න
7- අයියාසාමි බාලසුබ්‍රමනියම්
8- තරංග ප්‍රසාද් ගමගේ
9- ටී.ඊ.ආර්. පීරිස්

පාස්කු ඉරිදා ප්‍රහාර විමර්ශනවලට අදාළව දැනට රැඳවුම් භාරයේ පසුවන හිටපු බුද්ධි අංශ ප්‍රධානී සුරේෂ් සලේ ද පසුගියදා මෙම නඩුවේ සාක්ෂි ලබා දීම සඳහා අධිකරණයට ඉදිරිපත් කර තිබුණි.