ශ්‍රී ලංකා රජය බ්‍රිතාන්‍ය ටෙලෙක්ස් පණිවිඩ විකෘති කරලා? - ජාත්‍යන්තරයෙන් චෝදනා 

උතුරේ දියත් කළ යුද්ධයේ අවසාන අදියරේ දී යුද අපරාධ හා මානව වර්ගයාට එරෙහි අපරාධ කළ බවට

එල්ල වන චෝදනා පසෙකට හැරවීමට දරන උත්සාහයේදී ශ්‍රී ලංකා රජය හිතාමතාම බ්‍රිතාන්‍ය රාජ්‍යතාන්ත්‍රික ටෙලෙක්ස් පණිවිඩ විකෘති කළ බව සනාථ කිරීමට ජාත්‍යන්තර සංවිධානයක් විවරණයක් එලි දක්වා තිබේ.

 

මහ කොමසාරිස් මිෂෙල් බැෂලේ විසින් එක්සත් ජාතීන්ගේ මානව හිමිකම් මණ්ඩලය වෙත ඉදිරිපත් කරන ලද 2021 වාර්තාවට පහර දීම සඳහා ශ්‍රී ලංකා රජය විසින් ජිනීවා නුවර තානාපති කාර්යාල වෙත 2021 පෙබරවාරියේදී රාජ්‍යතාන්ත්‍රික ටෙලෙක්ස් පණිවිඩ අයුතු ලෙස යොදාගනිමින් “නිරීක්ෂණ” යවා තිබෙන අයුරු අනාවරණය කර ඇත්තේ යැස්මින් සූකාගේ ප්‍රධානත්වයෙන් යුත් සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) විසිනි.

 

 

"ඒ දිනවල ගෑෂ් විශ්වාසය තැබුවේ ඔහුට සෘජු ප්‍රවේශයක් නොතිබුණු යුද පෙරමුණේ සිදුවන දේ සම්බන්ධයෙන් ලන්ඩනයට වාර්තා කිරීම සඳහා ශ්‍රී ලංකා යුද හමුදාව, එක්සත් ජාතීන්ගේ සංවිධාන සහ වෙනත් දූත මාණ්ඩලිකයන් විසින් ලබා දුන් තොරතුරු කෙරෙහිය. මීට අමතරව, ගෑෂ් 2009 දී එවූ ටෙලෙක්ස් පණිවිඩ අතරින් බ්‍රිතාන්‍ය රජය විසින් මුදා හැර ඇත්තේ අතලොස්සක් පමණි."

 

ඇන්ටන් ගෑෂ් විසින් ලන්ඩනයට එවන ලද 2009 ජනවාරි 20 සහ අප්‍රේල් 26 අතර කාලයේ ටෙලෙක්ස් පණිවිඩ 9ක් බ්‍රිතාන්‍යයේ නේස්බි සාමිවරයා විසින් උපුටා දක්වා තිබුණි.

 

ඒවායේද බරපතල ලෙස කොටස් මකා දමා ඇති හෙයින් ඒ දිනවල පැවති තත්වය පිළිබඳ ඔහුගේ සමස්ත දැක්ම වටහා ගැනීම අසීරු බව සත්‍යය හා යුක්තිය සඳහා වන ජාත්‍යන්තර ව්‍යාපෘතිය අවධාරණය කරයි.

 

 

ශ්‍රී ලංකාවේ යුද්ධයේ 2009 සිදුවූ මරණ සංඛ්‍යාව ඉන් පසුව ආ එක්සත් ජාතීන්ගේ වාර්තාවලින් තක්සේරු කර ඇති ප්‍රමාණයට වඩා බෙහෙවින් අඩු බවද, ශ්‍රී ලංකා යුද හමුදාවට එරෙහි යුද අපරාධ චෝදනා අසත්‍ය බවද පෙන්නුම් කරන සැඟවුණු තොරතුරු අනාවරණය කිරීමක් බවද කීමට මේ ටෙලෙක්ස් හුවා දක්වනු ලැබේ.

 

මේ සාවද්‍ය තීරණය පදනම් වී ඇත්තේ බරපතල ලෙස මකා දමා ඇති ටෙලෙක්ස් පණිවිඩ තෝරා බේරාගෙන පාවිච්චි කිරීමෙන් සහ ඒවායේ නොමැකී ඉතිරි වූ ගෑෂ් ගේ වචන ඇතැම්විට සන්දර්භයෙන් පිටත යොදාගැනීම හෝ සම්පූර්ණයෙන්ම නොතකා හැරීම හෝ මගින් බවයි සත්‍යය හා යුක්තිය සඳහා වන ජාත්‍යන්තර ව්‍යාපෘතිය පවසන්නේ.

 

ශ්‍රී ලංකාවේ සේවය කළ රාජ්‍ය තාන්ත්‍රිකයන් 2009 පෙබරවාරි තරම් කාලයක සිටම ශ්‍රී ලංකා හමුදාවේ යුද චර්යාව ගැන කනස්සල්ල පල කරමින් සටන් විරාමයකට බල කළ ආකාරය මේ “නිමල අගයෙන් යුත්” ටෙලෙක්ස් පණිවිඩවලින්ම අනාවරණය වන ආකාරය නිදසුන් සහිතව සත්‍යය හා යුක්තිය සඳහා වන ජාත්‍යන්තර ව්‍යාපෘතිය ඉදිරිපත් කර ඇත්තේ සිය විවරණද සහිතවය.