පොලිස් අත්අඩංගුවේ වධයෙන් මියයන රැල්ල ගැන ජිනීවා යන සැලසුම් 

පොලිස් වධහිංසාවලින් පුද්ගලයන් මිය යාමේ රැල්ල නැවැත්වීමට වහා  පියවර ගන්නැයි

සිරකරු අයිතිවාසිකම් වෙනුවෙන් පෙනී සිටින ප්‍රමුඛතම සංවිධානයක් පොලිස්පතිවරයාගෙන් ඉල්ලා තිබේ.

 

 

ඒ සම්බන්ධයෙන් එක්සත් ජාතීන්ගේ සංවිධානයට පැමිණිලි කිරීමටද පියවර ගන්නා එම සංවිධානය පවසයි.

 

 

පොලිස්පති සී.ඩී වික්‍රමරත්න වෙත ලිපියක් යොමු කරමින් සිරකරු අයිතිවාසිකම් සුරැකීමේ කමිටුව අවධාරණය කර ඇත්තේ අත්අඩංගුවට ගන්නා පුද්ගලයන් කුමන සමාජ මට්ටමක අය වුවද, අපරාධවලට සම්බන්ධ බවට සැකකරන අය  වුවද ඔවුන් තමන්ගේ භාරයේ සිටි නම් ඔවුන්ගේ ජීවිත ආරක්ෂාව සහ අනෙකුත් මානුෂික අයිතිවාසිකම් උල්ලංඝනය නොවන සේ කටයුතු කිරීමේ වගකීමක් පොලිස්පතිවරයාට ඇති බවයි.

 

 

" ශ්‍රී ලංකා ආණ්ඩුක්‍රම ව්‍යවස්ථාව මගින් සහතික කර ඇති මුලික අයිතිවාසිකම් මෙන්ම අනෙකුත් අණපනත් මගින්ද ‌ ශ්‍රේෂ්ඨාධිකරණ නඩු තීන්දු මගින්ද එම පරම අයිතිවාසිකම් තහවුරු කර තිබේ."

 

 

 

 

 

කමිටුව විසින් පෙන්වා දී ඇති පරිදි තාරක ධර්මකීර්ති විජේසේකර සහ දිනෙත් මෙලන් මාඹුල යන දෙදෙනා ආයුද පෙන්වීමට රැගෙන ගොස් නීතියට පිටින් මරා දැමීමෙන් පසු  තවත් පුද්ගලයන් තිදෙනකුගේ මිය යාම් සම්බන්ධයෙන් මසක් තුලදී  පොලීසියට චෝදනා එල්ල වී තිබේ.

 

 

 

 

 

 

 

 

මෙවැනි සිද්ධීන් ඇති නොවීමට අවශ්‍ය සෑම පියවරක්ම ගැනීම ශ්‍රී ලංකා පොලීසියේ ප්‍රධානියා වශයෙන් පොලිස්පතිවරයාට පැවරී ඇති නෛතික යුතුකමක් බව සී.ඩී වික්‍රමරත්නට මතක් කර දෙන නීතිඥ සේනක පෙරේරා  පොලීසිය සම්බන්ධයෙන් ජනතා විශ්වාසය බිද වැටීම තුළ ඇති විය හැකි අනිටු ප්‍රතිළුල ද මතක් කර දී තිබේ.

 

 

" තවදුරටත් පොලීසිය සම්බන්ධයෙන් ජනතා විශ්වාසය බිද වැටුනහොත් එමගින් සමාජයේ පුද්ගලයන් තමන්ගේ ප්‍රශ්න තමන්ම විසදා ගැනීමේ පිළිවෙතකට යාම නොවැලැක්විය හැකි වේ. "  

 

 

 

 

 

 

 

" ඒ අනුව මේ රටේ පොලිස් අත්අඩංගුවට පත්වන්නන්ගේ අයිතිවාසිකම් වෙනුවෙන් කටයුතු කරන වගකිවයුතු සංවිධානයක් ලෙස අප ඉල්ලා සිටින්නේ මෙම පොලිස් වධහිංසා රැල්ල නැවැත්වීමට අවශ්‍ය සියලුම පියවර ගන්නා ලෙසත්, ඒවාට සම්බන්ධ පොලිස් නිලධාරීන්ට එරෙහිව අපරාධ නීතිය අනුව කටයුතු කරන ලෙසත්ය " සිරකරු අයිතිවාසිකම් සුරැකීමේ කමිටුව පොලිස්පතිවරයාට යොමු කළ ලිපියේ වැඩි දුරටත් සදහන්ය.

 

 

පොලිස්පතිවරයා වෙත යොමු කළ පැමිනිල්ලේ පිටපතක්  වධහිංසාවට සහ වෙනස් කෲර අමානුෂික සැලකිලිවලට සහ දඩුවම් සම්බන්ධයෙන් කටයුතු කරන එක්සත් ජාතීන්ගේ විශේෂ නියෝජිතවරයාට යොමු කරන බව  නීතිඥ සේනක පෙරේරා මාධ්‍යවේදීන් ට දැනුම් දී තිබේ.

 

 

 

පොලිස්පති වෙත යොමු කරන ලද ලිපියක් මගින් ශ්‍රී ලංකා මානව හිමිකම් කොමිෂන් සභාවේ සභාපති ආචාර්ය ජගත් බාලසුරිය ද පසුගියදා මතක් කර දී තිබුනේ, පොලීසිය භාරයේ සිටින සැකකරුවන්ගේ ආරක්ෂාව තහවුරු කිරීම පොලිස් දෙපාර්තමේන්තුවේ වගකීමක් බව පොලිස් දෙපාර්තමේන්තුවේ නියෝග වල මෙන්ම ශ්‍රේෂ්ඨාධිකරණ නඩු තීන්දුවලද අවධාරණය කර ඇති බවයි.

 

 

ශ්‍රී ලංකා මානව හිමිකම් කොමිෂන් සභාව පසුගිය වසරේ නිවේදනය කර තිබුනේ 2020 ජුනි මස සිට ඔක්තෝබර් 20 දක්වා කාලය තුළ පොලිස් අත්අඩංගුවේ මරණ අටක් වාර්තා වී ඇති බවයි.