තාරුණ්‍යයට ජිවිතේ මග වරදින්න යන්නේ පොඩි කාලයක්. එහෙම මග වැරදුනා කියලා ජිවිතේ ඉවර වෙන්නෙ නෑ. යලි මුල ඉඳන්ම පටන් ගන්න පුළුවන්. ඒ කියන්නෙ, ජීවිතයට ඇහැරෙන්න පුළුවන්.
ඒකට ඕන වෙන්නෙ උතුරු තරුවක් වගේ දිලෙන ආදරයක්, හරි මග පෙන්වන ආදරණීය ගුරුවරුන්, හැබෑම මිනිස් සම්බන්ධතාවන්.
ඉදින් එවන් ආදරණීය "වෙනස් මිනිස් ඇසුරක්" ගැන ඔබට කියන සසික හේරත් ගේ කුළුඳුල් සිනමා අධ්‍යක්ෂණය ‘සිහින සමීකරණ’ චිත්‍රපටයෙහි නවතම නිල පෝස්ටරය පසුගියදා එළිදක්වා තිබේ.
නුදුරේදීම මෙරට සිනමා ශාලාවල තිරගත කිරීමට කටයුතු සූදානම් කර ඇති මෙම චිත්‍රපටයේ නිෂ්පාදනය මහාචාර්ය චරිත් ජයතිලක සහ ධම්මික ගීකියනගේ විසිනි.
තිර රචනයෙන් දර්ශන විද්‍යා අරවින්ද, සංස්කරණයෙන් අජිත් රාමනායක, සංගීත අධ්‍යක්ෂණයෙන් චින්තක ජයකොඩි, සහය අධ්‍යක්ෂණයෙන් ඉන්දික ධර්මතිලක, ශබ්ද නිර්මාණකරණයෙන් සසික රුවන් මාරසිංහ, කලා අධ්‍යක්ෂණයෙන් මෙන්ම ඇඳුම් නිර්මාණයෙන් පියතිස්ස අකුරම්බොඩ, වේශ නිරුපණයෙන් ප්‍රියන්ත එස්. වන්නිනායක, වර්ණ සංයෝජනයෙන් ආනන්ද බන්ඩාර, නිෂ්පාදන කළමනාකරණයෙන් දුමින්ද පෙරේරා සමඟින් හරේන්ද්‍ර පෙරේරා යන අය නිර්මාණයට දායකත්වය ලබාදී තිබේ.
ප්‍රධාන රංග භූමිකාව සඳහා සජිත ඇන්තනි (නිසල්) සහ කසුනි කාවින්දි ප්‍රනාන්දු (රිද්මි), අශාන් ඩයස් (ජනක සර්) එක්වී ඇති අතර සහාය නළු නිළියන් ලෙස රන්දික ගුණතිලක (අෂේන්), වසන්ත විට්ටච්චි (විදුහල්පති), පූජන දන්දෙණිය (අසංක), රෙබෙකා දිල්රුක්ෂි (දිල්කි), මොරින් චාරුනි (රිද්මිගේ මව), නයනා හෙට්ටිආරච්චි (නිසල්ගේ මව) යන රංගන ශිල්පින් ශිල්පිනියන් එක්වී ඇත.
