දේශීය සිනමා කර්මාන්තය මුහුණ දෙන මූල්ය සහ බෙදාහැරීමේ ගැටලු පහක් කඩිනමින් විසඳාදෙන ලෙස සිනමාකරුවන්ගේ අයිතීන් සුරැකීමේ සංවිධානය බලධාරීන්ගෙන් ඉල්ලයි.
ශ්රී ලාංකේය සිනමා කර්මාන්තයේ චිත්රපට ප්රදර්ශනය සහ බෙදාහැරීම සම්බන්ධයෙන් පවතින බරපතළ අර්බුද කිහිපයක් නිරාකරණය කරගැනීම සඳහා සිනමාකරුවන්ගේ අයිතීන් සුරැකීමේ සංවිධානය බලධාරීන් වෙත ප්රධාන යෝජනා 5ක් ඉදිරිපත් කර තිබේ.
වත්මන් ආර්ථික වාතාවරණය හමුවේ දේශීය සිනමා නිෂ්පාදකයා ආරක්ෂා කරගැනීම සහ සිනමා ක්ෂේත්රයේ විනිවිදභාවය තහවුරු කිරීම මෙම මැදිහත්වීමේ ප්රධාන අරමුණ වී ඇත.
ප්රදර්ශනය නියාමනය සහ කොමිස් මුදල් සංශෝධනය
1- වර්තමානයේ පවතින අවිධිමත් චිත්රපට ප්රදර්ශන සහ බෙදාහැරීමේ ක්රමවේදය කඩිනමින් විධිමත් රාමුවකට ගෙන ඒම සංවිධානයේ පළමු ඉල්ලීමයි.
2- මීට අමතරව, සිනමා ශාලා පාලනය කරන ප්රදර්ශන මණ්ඩල විසින් ප්රවේශපත්රයකින් ලබාගන්නා 10%ක කොමිස් මුදල 5% දක්වා අඩු කළ යුතු බව ඔවුහු පෙන්වා දෙති. එම අඩු කෙරෙන 5%ක මුදල සෘජුවම චිත්රපට නිෂ්පාදකවරයාගේ ආදායමට එක්විය යුතු බවට ද යෝජනා කර ඇත.
බදු සහන සහ මුදල් ගෙවීමේ කාලසටහන්
3- දේශීය සිනමා නිර්මාණ වෙනුවෙන් ප්රවේශපත්ර සඳහා අයකරනු ලබන විනෝදාස්වාද බද්ද (Entertainment Tax) සම්පූර්ණයෙන්ම අහෝසි කිරීම තවත් ප්රධාන ඉල්ලීමකි.
4- එමෙන්ම චිත්රපට ප්රදර්ශනයෙන් පසු ප්රදර්ශන මණ්ඩල මඟින් නිෂ්පාදකවරයා වෙත ගෙවිය යුතු ආදායම් කොටස්, අනවශ්ය ලෙස ප්රමාද නොකර නිශ්චිත කාලසටහනකට අනුව කඩිනමින් පියවීමේ ක්රමවේදයක් සකස් විය යුතු බව සංවිධානය අවධාරණය කරයි.
ඩිජිටල් මාධ්ය සහ බුද්ධිමය දේපළ ආරක්ෂාව
5- නූතන තාක්ෂණය සමඟ වේගයෙන් ව්යාප්ත වන OTT (Over-The-Top) ඩිජිටල් ප්රවාහ මාධ්ය ජාලවල සුරක්ෂිතභාවය තහවුරු කිරීමේ අවශ්යතාව ද මෙහිදී මතු කර තිබේ.
විශේෂයෙන්ම නිර්මාණ සොරකම් වැළැක්වීම සඳහා බුද්ධිමය දේපළ පනත උල්ලංඝනය කරන්නන්ට එරෙහිව පවතින පැරණි නීති සහ දඬුවම් වත්මන් තාක්ෂණික දියුණුවට සරිලන සේ කඩිනමින් සංශෝධනය කළ යුතු බවට සිනමාකරුවෝ යෝජනා කරති.
සන්දර්භය සහ පසුබිම
ශ්රී ලංකාවේ චිත්රපට බෙදාහැරීම සහ ප්රදර්ශනය වසර ගණනාවක් පුරා රාජ්ය මැදිහත්වීමෙන් මෙන්ම පෞද්ගලික මණ්ඩල 4ක් හරහා ද ක්රියාත්මක වේ. කෙසේ වෙතත්, නිෂ්පාදන පිරිවැය ඉහළ යාම, විදේශීය සිනමා ආක්රමණය සහ නියාමන ක්රමවේදවල පවතින දුර්වලතා හේතුවෙන් දේශීය සිනමා නිෂ්පාදකයන් විශාල මූල්ය අවදානමකට ලක්ව ඇති බව ක්ෂේත්රයේ විචාරකයෝ පෙන්වා දෙති.
(සටහන | ජයසිරි අලවත්ත)
