සෞරග්රහ මණ්ඩලයේ පිහිටි ජුපිටර් ග්රහයාගේ චන්ද්රයා මත ජීවයේ පැවැත්ම පිලිබඳ සොයා ගවේෂණය කිරීමට නාසා (NASA ) ආයතනය සතු අභ්යවකාශ යානයක් අද පිටත්වේ.
යුරෝපා (Europa) ලෙස හැඳින්වෙන ජුපිටර් ග්රහයාගේ චන්ද්රයා, සම්පූර්ණයෙන්ම අයිස් වලින් වැසී පවතින අතර, එම චන්ද්ර ලෝකය සතුව විශාල භූගත සයුරු කලාපයක් පවතින බවට විශ්වාස කෙරේ. එහි ජීවය පැවතීමට සුදුසු පරිසරයක් ඇද්දැයි අධ්යයනය කිරීම ගවේෂණයේ අරමුණයි.
එක්සත් ජනපද අභ්යවකාශ ආයතනයේ රොබෝ තාක්ෂණයෙන් ක්රියාත්මක යුරෝපා ක්ලිපර් (Europa Clipper) අභ්යවකාශ යානය ඒ සඳහා කැනවරල් තුඩුවේ කෙනඩි අභ්යවකාශ මධ්යස්ථානයෙන් පිටත් වීමට සූදානම්ව පවතී. ගවේෂණය සඳහා අවශ්ය විද්යා හා තාක්ෂණික උපකරණ නවයක් රැගෙන යාම එමගින් සිදු කෙරේ.
සැතපුම් බිලියන 1.8 ක් හෙවත් කිලෝ මීටර බිලියන 2.9ක් දුර ගෙවා වසර පහකුත් මාස හයකට පසු, 2030 වසරේදී යානය යුරෝපා චන්ද්රයාගේ කක්ෂයට ඇතුළු වීමට නියමිතය. මිල්ටන් කුණාටුවේ බලපෑම නිසා යානය දියත් කිරීම තාවකාලිකව කල්දැමීමට සිදුවූ අතර, අද එරට වේලාවෙන් ප.ව.12.06 ට එය සිදු කෙරෙන බව නාසා විද්යාඥයෝ පවසති.
යුරෝපා චන්ද්රයා මත පවතින ඝන අයිස් තට්ටුවට පහළින් ලවණ ජලය සහිත විශාල සාගර පෘෂ්ටයක් පවතින බව මීට පෙර සිදු කළ ගවේෂණවලදී අනාවරණය විය. ජීවය පැවතීමට අවැසි සියලු දෑ යුරෝපා චන්ද්රයා මත පවතින බවට ප්රබල සාක්ෂි ඇතැයි නාසා විද්යාඥයෝ පවසති.
යුරෝපා ක්ලිපර් අභ්යවකාශ යානය දිගින් අඩි 100ක් සහ පළලින් අඩි 58ක් වන අතර, කිලෝ ග්රෑම් 6000ක බරින් යුක්තය. එමගින් රැගෙන යන විද්යා හා වෙනත් ඉලෙක්ට්රොනික උපකරණ සහ උප පද්ධතීන් පණ ගැන්විය හැකි ප්රමාණයේ සූර්ය පැනල සහිත එය, පැසි පන්දු ක්රීඩාංගනයකට වඩා විශාල බව විද්යාඥයෝ පවසති. ග්රහලෝක ගවේෂණය පිණිස නාසා ආයතනය මෙතෙක් නිපදවා ඇති විශාලතම අභ්යවකාශ යානය එයයි.
ජුපිටර් ග්රහයා සතු යුරෝපා චන්ද්රයා 'සාගර ලොවක්' ලෙස හැඳින්වේ. ප්රමාණයෙන්, පෘථිවි විශ්කම්භයෙන් හරි අඩකින් අඩක් වන එහි, පෘථිවිය මත පිහිටි සාගර මෙන් දෙගුණයක ජල පෘෂ්ටයක් පවතින බවට විශ්වාස කෙරේ.
(Reuters ඇසුරින් සටහන : හර්ෂ උදයකාන්ත විසිනි)
මූලාශ්ර:
NASA spacecraft to study whether Jupiter's moon Europa can harbor life
(Reuters ඇසුරින් සටහන : හර්ෂ උදයකාන්ත විසිනි)
මූලාශ්ර:
NASA spacecraft to study whether Jupiter's moon Europa can harbor life
