ගාසා තීරයේ සිරවී සිටින පලස්තීන ඇමෙරිකානුවන් 09 දෙනෙක්, තමන් ඇතුළු සිය පවුල් සාමාජිකයින්, මෙතෙක් ගැටුම් සහිත ප්රදේශ වලින් මුදා නොගැනීම සම්බන්ධයෙන් එක්සත් ජනපද රජයට එරෙහිව ඊයේ (19) අධිකරණය ඉදිරියේ නඩු පැවරීමට පියවර ගත්හ.
ඊශ්රායල-හමාස් ප්රහාර හමුවේ, මේ වනවිට පලස්තීනුවෝ සිය දහස් ගණනක් ජීවිතක්ෂයට පත්ව සිටිති. ඔවුන් අතර පලස්තීන සම්භවයක් සහිත ඇමෙරිකානුවන් සැලකිය යුතු සංඛ්යාවක් ද වන බව රොයිටර්ස් පුවත් සේවය පවසයි.
ගාසා තීරයේ, ඊශ්රායල සහ හමාස් ප්රහාරවලට මැදිව සිටින පලස්තීන ඇමෙරිකානුවන් වහා මුදා ගැනීමට පියවර නොගැනීම, ඔවුන් යුද පිටියේ අතරමන් කර හුදෙකලා කිරීම, එම අලස පියවර මගින් පලස්තීන සහ වෙනත් සම්භවයන් සහිත ඇමෙරිකානු පුරවැසියන් අවමානයට ලක් කිරීම යන චෝදනා පෙරදැරිව ඇමෙරිකානු රාජ්ය දෙපාර්තමේන්තුවට එරෙහිව අධිකරණයේ එම නඩු පවරා තිබේ.
ගාසා ගැටුම්වලට මැදිව සිටින පුද්ගලයින් ඉන් මුදා ගැනීමට කඩිනම් පියවර නොගැනීම පිළිබඳව, මෙම සතියේ එක්සත් ජනපද රජයට එරෙහිව නඩු පැවරුණු දෙවන අවස්ථාව මෙය වේ. වොෂින්ටනය, ගාසා තීරයේ ඊශ්රායල හමුදාවන්ට සහාය දැක්වීමට විරෝධය පා පසුගිය අඟහරුවාදා (17) ද පලස්තීන පවුල් සාමාජිකයින් පිරිසක් එක්සත් ජනපද රාජ්ය දෙපාර්තමේන්තුවට එරෙහිව අධිකරණය ඉදිරියේ නඩු පැවරූහ.
රොයිටර්ස් පුවත් සේවය විසින් සිදුකළ විමසීමකදී, ඒ සම්බන්ධයෙන් අදහස් දැක්වූ එක්සත් ජනපද රාජ්ය දෙපාර්තමේන්තු නිලධාරියකු අධිකරණය ඉදිරියේ පවතින නඩු කටයුතු පිළිබඳව අදහස් දැක්වීමෙන් වැළකී සිටින බව ප්රකාශ කළේය. එහෙත්, ලොව පුරා සිටින ඇමෙරිකානු පුරවැසියන්ගේ ජීවිතාරක්ෂාව අතිශය ප්රමුඛ කටයුත්තක් සේ සලකා ක්රියා කරන බව ඔහු පැවසී යැයි රොයිටර්ස් පවසයි.
එක්සත් ජනපදයේ ඉලිනොයිස් හි දිස්ත්රික් අධිකරණයක් ඉදිරියේ, ඇමෙරිකානු ඉස්ලාමීය සබඳතා පිලිබඳ උපදේශන කවුන්සිලය විසින්, ඊයේ නඩු පැවරීම සිදු කෙරිණි. එක්සත් ජනපද ව්යවස්ථාව මගින්, සියලු ඇමෙරිකානු පුරවැසියන්ට ජීවිතාරක්ෂාව පිලිබඳ පවතින සමාන අයිතිවාසිකම්, එරට රාජ්ය දෙපාර්තමේන්තුව විසින්, ගාසා තීරයේ සිරවී සිටින පලස්තීන සම්භවයක් සහිත ඇමෙරිකානුවන් සම්බන්ධයෙන් උල්ලංඝනය කර ඇතැයි, එමගින් චෝදනා එල්ල කර තිබේ.
ඇමෙරිකානු පුරවැසියන් ගාසා තීරයෙන් ඉවත් කර ගැනීමේදී, පලස්තීන සම්භවයක් සහිත ඇමෙරිකානුවන්ට සමාන ප්රමුඛතාවක් ලබා දී නැතැයි, එම චෝදනා මගින් අවධාරණය කර ඇත.
ගැටුම් පවතින කලාප ලෙස නම් කර ඇති, ඇෆ්ඝනිස්තානය, ලෙබනනය සහ සුඩානයෙන් ද මීට සමාන සිදුවීම් වාර්තාවන බව නඩු පවරුම්හි දක්වා තිබේ. එක්සත් ජනපද ජනපති ජෝ බයිඩන්, ඇමෙරිකානු රාජ්ය ලේකම් ඇන්තනී බ්ලින්කන්, සහ ආරක්ෂක ලේකම් ලොයිඩ් ඔස්ටින්, නඩුවේ ප්රධාන විත්ති කරුවන් ලෙස නම් කර ඇත.
ගාසා ඇතුළු ලොව පුරා ගැටුම් පවතින සියලු කලාප වෙතින්, ඇමෙරිකානුවන් ඉවත් කරගැනීමට පියවර ගෙන ඇතැයි, එක්සත් ජනපද රාජ්ය දෙපාර්තමේන්තුව පවසයි.
ගාසා සෞඛ්ය අමාත්යංශ වාර්තාවලට අනුව, එහි යුද්ධයෙන් මේ වන විට, පලස්තීනුවෝ 45,000කට අධික පිරිසක් ජීවිතක්ෂයට පත්ව සිටිති.
ගාසා තීරයේ ඊශ්රායල හමුදා විසින් සිදු කරන ලදැයි පැවසෙන සියලු සමූල ඝාතන සහ යුද අපරාධ චෝදනා ඊශ්රායල රජය ප්රතික්ෂේප කරයි. අඛණ්ඩ ඊශ්රායල හමුදා ප්රහාර හමුවේ, ගාසා තීරයේ මිලියන 2.3 ක සමස්ත ජනගහනයම අවතැන්ව සිටිති. එහි අතිශය දරුණු දුර්භික්ෂයක් ද හටගෙන තිබේ.
(Reuters ඇසුරින් සටහන | හර්ෂ උදයකාන්ත විසිනි)
