ගාසා තීරයට පිවිසුණු ලෝක ආහාර වැඩසටහනට අයත් ට්රක් රථ පෙළකට ඊශ්රායල හමුදා ඊයේ (06) ප්රහාර එල්ල කළහ.
අවතැන් පලස්තීනුවන් වෙත අත්යවශ්ය ආහාර ද්රව්ය රැගෙන යමින් සිටි එම වැඩසහනට අයත් ට්රක් රථ තුනකට ඉන් හානි සිදු විය.
ප්රහාරයෙන් එහි සිටි කාර්ය මණ්ඩල සේවකයින් අට දෙනාගෙන් කිසිවකුට හානියක් වී නැතත්, ඊශ්රායල හමුදා වෙඩි ප්රහාර 16ක් ඒ වෙත එල්ල වී තිබේ. එක්සත් ජාතීන්ගේ ලෝක ආහාර වැඩසටහන, එම ප්රහාරය පිළිකුලෙන් හෙලා දකී.
මධ්යම ගාසා හි සිට උතුරේ පිහිටි ගාසා නගරයට ධාවනය කරමින් පැවති ට්රක් රථ තුන වෙත, වාඩි ගාසා හමුදා මුර පොළ ආසන්නයේදී ඊශ්රායල හමුදා විසින් එම වෙඩි තැබීම සිදු කර තිබේ.
එම රථ, එක්සත් ජාතීන්ගේ ලෝක ආහාර වැඩසටහනට අයත් බව විශාලව සහ පැහැදිලිව එහි සටහන් කර තිබු බවත්, අදාළ රාජකාරීමය කටයුතු පිණිස ධාවනය කෙරෙන බවට ඊශ්රායල හමුදා වෙතින් පූර්ව අවසරය ලබා තිබූ බවත්, එම වැඩසටහන කියා සිටී.
මෙම නවතම ඊශ්රායල හමුදා ප්රහාරය, ගාසා තීරයේ සේවයේ නියුතු ජාත්යන්තර සහන සේවකයින්, කාර්ය මණ්ඩල සහ අනෙකුත් ස්වේච්ඡා සංවිධාන මුහුණ පා ඇති අතිශය භයානක ජීවිතාන්තරායය තව දුරටත් ඉස්මතු කර ඇතැයි, ලෝක ආහාර වැඩසටහන පෙන්වා දෙයි. අවතැන් පලස්තීන ජනතාව වෙත අත්යවශ්ය ආධාර රැගෙන යන්නන්ගේ ආරක්ෂාව උදෙසා ප්රවර්ධිත වැඩසටහනක් වහා ක්රියාත්මක කරන ලෙස, ඔවුහු ඊශ්රායල හමුදාවන්ගෙන් උදක්ම ඉල්ලා සිටිති.
ආධාර රැගෙන යන ජාත්යන්තර සංවිධානවලට අයත් රථ සහ එහි කාර්යමණ්ඩල ආරක්ෂාව පිලිබඳ හැකි සියලු පියවර ගෙන ඇති බවත්, ඊයේ සිද්ධිය සම්බන්ධයෙන් සොයා බලන බවත්, ඊශ්රායල හමුදා පවසති.
වෙඩි තැබීමේ සිදුවීම යළි සමාලෝචනය කොට, මෙහෙයුම් ක්රියා පිළිවෙත් නිවැරදිව සිදු කර තිබේදැයි පරික්ෂා කොට, විමර්ශනයේදී හඳුනාගැනෙන තොරතුරු මත පදනම්ව, ඒ පිලිබඳ විශ්ලේෂණයක් ලබා දෙන බව ඔවුහු කියා සිටිති.
ගාසා තීරයේ වත්මන් මානුෂීය අර්බුදය විසඳීමට මැදිහත්ව සිටින ජාත්යන්තර ස්වේච්ඡා සංවිධාන රැසක් හමුදා වෙඩි ප්රහාරවලට මැදි වීම සම්බන්ධයෙන් ඊශ්රායලය වෙත චෝදනා එල්ල වේ. හමාස් සංවිධානය සමූලඝාතනය කිරීමේ ඊශ්රායල ඉලක්ක අතරේ, එහි මානුෂීය ක්රියාන්විතවල නිරත සිය සියලු කාර්ය මණ්ඩල ජීවිත බියකරු ලෙස අනාරක්ෂිතව ඇතැයි, එම සංවිධාන චෝදනා කරති.
(Reuters ඇසුරින් සටහන | හර්ෂ උදයකාන්ත විසිනි)
