ඉකුත් නොවැම්බර 5 දා පැවති එරට ජනපතිවරණයේදී ප්රතිවාදී කමලා හැරිස් පරදා රිපබ්ලිකන් අපේක්ෂක ඩොනල්ඩ් ට්රම්ප් ජය ගත්තේය. ඊයේ ඔහු පැමිණි ගුවන් යානයේ, ට්රම්ප් බිරිය මෙලනියා, දියණි ඉවන්කා සහ ඇගේ සැමියා වන ජරෙඩ් කුෂ්නර් ද වූහ.
එල්විස් ප්රෙස්ලි අනුකරණය කරමින් ලියෝ ඩේස් (Leo Days) විසින් ට්රම්ප් ඇතුළු පිරිස හරසරින් පිළිගැනිණි. ගිනි කෙළි සංදර්ශනයෙන්ද යුක්ත වූ එම පිළිගැනීමේ අවස්ථාවට ආරාධිතයින් 500ක පමණ පිරිසක් එක්ව සිටියහ.
ට්රම්ප්ගේ දැන් වයස අවුරුදු 78 කි. අද සවස 'කැපිටල් වන් එරීනා' ගෘහස්ත ක්රීඩාංගනයේ දී ඔහු පාක්ෂිකයින් ඇමතීමට නියමිතය. හෙට දිවුරුම් දීමෙන් අනතුරුව මධ්යාහ්නයේ ද ඔහු ඒ වෙත පැමිණෙනු ඇත.
වොෂින්ටනයේ පවතින අධික ශීත කාලගුණික තත්ත්වය හේතුවෙන්, හෙට (20) සිදු කෙරෙන ට්රම්ප්ගේ දිවුරුම් දීම එළිමහනේ නොකොට කැපිටල් රොටුන්ඩා (Capitol Rotunda) අභ්යන්තරයේ සිදු කිරීමට කටයුතු යොදා තිබේ. අනතුරුව, ඔහු යළි 'කැපිටල් වන් එරීනා' ගෘහස්ත ක්රීඩාංගනය වෙත පෙරහරින් සම්ප්රාප්ත වනු ඇත.
එරට වේලාවෙන් හෙට මධ්යහ්න 12.00 ට, හෙළ ජන වහරට අනුව කියතොත්, ඉර මුදුන් වන හෙවත් "යක්කු ගස් නගින" වේලාවට ට්රම්ප් එක්සත් ජනපද ජනපති ධුරයේ දිවුරුම් දීමට නියමිතය. දිවුරුම් දීමෙන් අනතුරුව ඔහු සමාරම්භක දේශනය පැවැත්වීමට සූදානම්ව සිටී.
හෙට සිට ඉදිරි සිව් වසරක කාලයටම එක්සත් ජනපද නායකයා ඔහුය. ඔහුගේ සමාරම්භක දේශනයේ තේමාව වන්නේ "එකමුතුකම සහ ශක්තිය සහ වදනින් එක්වන සාධාරණත්වය" යන්නයි.
1985 ජනවාරි මස රොනල්ඩ් රේගන් ජනපතිවරයාගේ දෙවන දිවුරුම් දීමෙන් අනතුරුව, එක්සත් ජනපද ජනපතිවරයකු ශාලා අභ්යන්තරයක සිට ධුරයේ දිවුරුම් දෙන ප්රථම අවස්ථාව මෙය වේ.
මීට පෙර, කැපිටල් ක්රීඩාංගනයේ සංවිධානය කර තිබූ දිවුරුම් දීමේ අවස්ථාව නැරඹීමට ප්රවේශ පත් 220,000ක් නිකුත් කර තිබිණි. එහෙත්, නව සැලැස්මට අනුව එම කටයුතු සිදු කෙරෙන, 'කැපිටල් වන් එරීනා' ගෘහස්ත ක්රීඩාංගනයේ ඇත්තේ ආසන 20,000ක ධාරිතාවක් පමණි. දිවුරුම් දීමෙන් අනතුරුව හෙට සියළු සංදර්ශන පැවැත්වෙන්නේ එහිය.
ට්රම්ප්ගේ දිවුරුම් දීමේ අවස්ථාවට ධුරයෙන් නික්ම යන බයිඩන් ද සහභාගී වීමට නියමිතය.
(REUTERS ඇසුරින් සටහන | හර්ෂ උදයකාන්ත විසිනි)
