ගාසා නගරයේ නොසන්සුන් තත්ත්වයක්

ඊශ්‍රායල හමුදා, අද (09) ගාසා නගර වාසීන් වෙත ඉවත් වීමේ නියෝග අත් පත්‍රිකා, තොග ගණනින් ගුවනේ සිට විසිරවීමත් සමග

මේ වන විට, එහි කලබලකාරී තත්ත්වයක් උද්ගතව තිබේ.

එළැඹෙන හෝරා කිහිපය තුළ, හමාස් සංවිධානය මුලිනුපුටා දමන දැවැන්ත හමුදා ක්‍රියාන්විතය අරඹන බව ඊශ්‍රායල හමුදා මීට පෙර දැනුම් දුන්හ.  

යුද්ධයට පෙර ගාසා  නගරය, මිලියනයකට අධික පලස්තීන ජනගහණයකින් සමන්විත විය. නගර වාසීහු  පසු ගිය සති කිහිපය පුරාවට, හමාස් සංවිධානයට එරෙහි හදිසි ඊශ්‍රායල ප්‍රහාරයක් අපේක්ෂාවෙන් පසු වූහ. හමාස් සංවිධානය සතු අවසන් බල ප්‍රදේශ දෙකින් එකක් වන්නේ ගාසා නගරයයි.

"ගාසා වැසියන්ට මේ අවස්ථාවෙන් ප්‍රයෝජන ගන්නා ලෙස  දන්වමි.  හොඳින් සවන් දෙනු. මේ අනතුරු ඇඟවීමක්. වහා මෙතැනින්  ඉවත්වනු," ඊශ්‍රායල අග්‍රාමාත්‍ය බෙන්ජමින් නෙතන්යාහු අද එසේ කියා සිටියේය.

ගාසා නගරයේ සුන් බුන් අතර සිට අහසට නෙත් යොමා සිටින පලස්තීනුවන් වෙත ඊශ්‍රායල ගුවන් හමුදාව අද, ඉවත්වීමේ නියෝග ගුවනින්  බිම හෙලීය. පසු ගිය දින කිහිපය පුරාවට එම හමුදාවෝ, ගාසා නගරයේ තට්ටු නිවාස සංකීර්ණ, බෝම්බ හෙලා මුළුමනින් පොළොවට සමතලා කළහ. ගාසා තීරයේ විශාලතම නාගරික මධ්‍යස්ථානය ගාසා නගරය යි.

ඉවත්වීමේ නියෝග පිළිගෙන දකුණ බලා යනවා හැර දැන්, වෙනත් විකල්පයක් නැතැයි, ඇතැමෙක් පවසති. එහෙත්, සමූහ ඉවත් කිරීමකට තවමත් පෙර සූදානමක් නොවන පසු බිමෙක, තව දුරටත් රැඳී සිටීම යෙහෙකැයි, තවත්  පිරිස් කියා සිටිති.

ඉකුත්  සතිය පුරා පැවති බෝම්බ ප්‍රහාර හමුවේ වුව, තමා ගාසා නගරය අතැර පලා නොගිය බවත්, ඉතිරිව ඇත්තේ තව දුරටත්  රැඳී සිටිමින් දරුවන් සය දෙනා හා එහිම මිය යන්නේද, නොඑසේව, දකුණට පලා ගොස් එහිදී මරණය වැළඳ ගන්නේ ද, යන දෙගිඩියාව පමණක් බවත්,  55 හැවිරිදි මවක වන උම් මොහම්මද් (Um Mohammad) කෙටි පණිවුඩයක් මගින් දන්වා ඇතැයි, රොයිටර්ස් පුවත් සේවය පවසයි.

ගාසා දකුණු වෙරළ තීරයේ  අල්-මවාසි ( Al-Mawasi ) ප්‍රදේශයේ, වෙන්   කරන ලද විශේෂ මානුෂීය කලාපය වෙත වහා පලා යන ලෙස ඊශ්‍රායල හමුදා ගාස නගර වැසියන්ට දැනුම් දී තිබේ.

ගාසා නගරයේ රෝහල්, ඊශ්‍රායල ප්‍රහාරවලින් බේරා  ගැනීම පිණිස මැදිහත් වන්නැයි,  ගාසා සෞඛ්‍ය අමාත්‍යංශය, ජාත්‍යන්තර ප්‍රජාවෙන් ඉල්ලා සිටී. ගාසා තීරයට එල්ල වන අඛණ්ඩ ඊශ්‍රායල බෝම්බ ප්‍රහාර පිලිබඳ දැඩි විරෝධය පා, යුරෝපීය රටවල් රැසක්, ලබන මස නිව් යෝර්ක් නගරයේ පැවැත්වීමට නියමිත එක්සත් ජාතීන්ගේ මහා මණ්ඩල සැසියේදී, පලස්තීන රාජ්‍යය පිළිගැනීමට එකඟතාව පල කර සිටිති.

(සටහන | Reuters ඇසුරින්; හර්ෂ උදයකාන්ත පීරිස්)
(This email address is being protected from spambots. You need JavaScript enabled to view it.)
9/9/2025

මුලාශ්‍රය :

Israeli military evacuation order triggers panic in Gaza City