මහජන අරගලයක් හමුවේ ඊයේ (09) නේපාල රජය ඇද වැටීමත් සමග එරට කත්මන්ඩු අගනුවර ඇඳිරි නීතිය සහ හමුදා මුර සංචාර තර කර තිබේ.
ඉකුත් දෙදින පුරා ක්රියාත්මක භීෂණකාරී අරගලයෙන් එහි දේපල රැසක් ද විනාශ විය.
අරගල මධ්යයේ හටගත් ගැටුම්වලින් 21 දෙනකු මියගොස් 100කට අධික පිරිසක් තුවාල ලැබූහ.
අග්රාමාත්ය කේ.පී. ශර්මා ඔලී (K.P. Sharma Oli) ධුරයෙන් ඉල්ලා අස්වන බව දන්වා පලා ගියේය.
රජය, මීට සතියකට පමණ ඉහත, ෆේස් බුක් ඇතුළු සමාජ මාධ්ය තහනම් කිරීමට ගත් තීරණයත් සමග කත්මණ්ඩු අගනුවර ප්රමුඛ තදාසන්න පෙදෙස් රැසක මහජන උද්ඝෝෂණ ආරම්භ විය. රාජ්ය දූෂණයට සහ සමාජ මාධ්ය තහනමට එරෙහිව ක්රියාත්මක වූ මහජන උද්ඝෝෂණවලට තරුණ පිරිස් විශාල වශයෙන් එක්ව සිටියහ.
තත්ත්වය තවදුරටත් පාලනය කිරීමට කටයුතු කරමින් ඇතැයි, නේපාල හමුදා මාධ්ය ප්රකාශක රාජා රාම් බාස්නෙට් (Raja Ram Basnet) අද (10) පැවසීය. මිනිස් ජීවිත සහ දේපල ආරක්ෂාව සහතික කිරීම ප්රමුඛස්ථානයෙහි ලා කටයුතු කරන බවද ඔහු කියා සිටියේය.
ඊයේ, (09) රජයට එරෙහි උද්ඝෝෂණවල නියැලි පිරිස්, රජයට අයත් ගොඩනැගිලි, කත්මන්ඩු ශ්රේෂ්ඨාධිකරණය, එරට පාර්ලිමේන්තුව, අමාත්ය නිවෙස් සහ අග්රාමාත්යවරයාගේ පෞද්ගලික නිවෙස ද ගිනිබත් කළහ.
මේ වන විට, කත්මන්ඩු අගනුවර සහ අවට පෙදෙස් සාමකාමීව පවතින බව නේපාල මාධ්ය සඳහන් කරයි. අගනුවර තදාසන්න ප්රදේශයක කලහකාරී ලෙස හැසිරුණු පුද්ගලයින් 25 දෙනකු අත්අඩංගුවට ගෙන තිබේ.
බලධාරීන් සහ අරගලකරුවන් අතර සාකච්ඡා පිණිස කටයුතු සූදානම් කෙරෙමින් පවතින බව ද එරට මාධ්ය සඳහන් කරයි.
නේපාල තාරුණ්යය වසර ගණනක් තිස්සේ විරැකියාවෙන් පෙළෙමින් සිටී. ඒ හේතුවෙන් එරට මිලියනයකට අධික තරුණ පිරිසක් රැකියා සොයා මැලේසියාව, මැද පෙරදිග සහ දකුණු කොරියාව වැනි රටවල් කරා විදෙස්ගතව සිටින අතර බොහොමයක් පිරිස් ඉදිකිරීම් ක්ෂේත්රයේ රැකියාවන්හි නිරතව සිටිති.
අසල්වැසි රාජ්යයේ උද්ගතව ඇති තත්ත්වය පිලිබඳ සාකච්ඡා කිරීමට ඊයේ ඉන්දීය ආරක්ෂක කැබිනට් හමුවක් ද පැවැත්විණි.
(සටහන | Reuters ඇසුරින්; හර්ෂ උදයකාන්ත පීරිස්)
(
9/10/2025
Soldiers guard Nepal's parliament after two days of deadly protests
