චීනය, ග්රාමීය ප්රදේශ නිරීක්ෂණය පිණිස යොදා ගන්නා ආවේක්ෂණ පද්ධති මොඩලය පැසිෆික් කලාපයේ සොලමන් දූපත් වෙත අපනයනය කරයි.
චීන පොලිස් නිලධාරීන් පිරිසක්, මේ වන විට, සොලමන් දූපත් වාසීන්ගේ ඇඟිලි සලකුණු රැස් කිරීමේ නියමු ව්යාපෘතියක නිරත බව රොයිටර්ස් පුවත් සේවය පවසයි.
සොලමන් දූපත් හි ප්රජා අරගල සහ නොසන්සුන්තා වැලැක්වීමේ අරමුණින් එම ආවේක්ෂණ පද්ධතිය ස්ථාපිත කෙරේ. මේ සඳහා යොදා ගෙන ඇත්තේ, චීනයේ 'ෆෙන්ෂියාඕ' (Fengqiao) නිරීක්ෂණ පද්ධති ආකෘතිය යි.
නායක මාඕ සේදොන්ග් (Mao Zedong) සමයේ, 1960 දශකයේ, චීනයේ හඳුන්වාදුන් නිරීක්ෂණ ආකෘතියක් වන එය, ප්රතිගාමී පන්ති සතුරන්ට එරෙහි ප්රජා බලමුළු ගැන්වීම පිණිස ස්ථාපිත කෙරිණි.
වත්මන් චීන ජනපති, ෂී ජින්පිං (Xi Jinping )ගේ අධීක්ෂණය යටතේ, තිරසර ප්රජා ස්ථාවරත්වය උදෙසා එම පද්ධතිය, නව තාක්ෂණයට අනුව යාවත්කාලීන කර ඇත.
සොලමන් දූපත් සමූහය, චීනයේ ආරක්ෂක පාර්ශ්වකරුවකු ද වේ. දූපත් සමූහය තුළ, 'ෆෙන්ෂියාඕ ' සංකල්පය ප්රචලිත කරනුවස්, චීන පොලිස් නිලධාරීහු වසර මුල සිට සොලමන් වාසී ප්රජා කොටස් හමුව, නිරන්තර වැඩමුළු සහ උපදේශන පැවැත්වූහ. එහිදී, ළමුන් ඉලක්ක කරගත් ක්රීඩා සහ සමාජ මාධ්යයේ පල කළ විවිධ තොරතුරු ඔස්සේ, අවේක්ෂණ ඩ්රෝන ක්රියාකාරීත්වය පිලිබඳ දැනුම්වත් කෙරිණි.
චීනයේ, මෙම ආවේක්ෂණ සංකල්පය යටතේ, ග්රාමීය ප්රදේශ ආවරණය වන විශේෂ ජාලයක් ක්රියාත්මකය. එය මෙහෙයවීමේ වගකීම ආවේක්ෂණ ජාල කළමනාකරුවන් වෙත පැවරේ. ඒ අනුව, එක් එක් කළමනාකරුවන් විසින් ඔවුන්ට නියමිත නිවාස සංඛ්යාවක් සිය නිරීක්ෂණයේ තබා කටයුතු කළයුතු වේ.
සොලොමන් දූපත් සමූහයේ අගනුවර හොනියාරා (Honiara) තදාසන්න ග්රාමීය පෙදෙසක මේ වන විටත්, මෙහි නියමු ව්යාපෘතියක් ක්රියාත්මකය.
නව ආවේක්ෂණ සංකල්පය යටතේ සොලමන් දූපත් වෙත, ජනගහන කළමනාකරණය, නිවාස ලියාපදිංචිය, ප්රජා සිතියම්කරණය, ඇඟිලි හා අත්ල සටහන් දත්ත එක්රස්කිරීම් සහ ආශ්රිත කළමනාකරණ කටයුතු හඳුන්වාදීමට පියවර ගැනේ.
(සටහන | Reuters ඇසුරින්; හර්ෂ උදයකාන්ත පීරිස්)
(
9/12/2025
මුලාශ්රය :
China pilots village surveillance in Solomon Islands, seeks stability
