ද වෝල් ස්ට්රීට් ජර්නල් (The Wall Street Journal) සහ ද නිව්යෝක් ටයිම්ස් (The New York Times) යනු නීච පුවත්පත් යැයි ඇමෙරිකානු ජනපති ඩොනල්ඩ් ට්රම්ප් පවසා ඇත.
සවුදි අරාබියේ ප්රින්ස් සුල්තාන් එයාබේස්හි (Prince Sultan Air Base) තිබූ ඉන්ධන පිරවුම් ටැංකර් ගුවන් යානා පහකට ඉරාන මිසයිල ප්රහාර එල්ල වී ඇති බවට ද වෝල් ස්ට්රීට් ජර්නල් කළ වාර්තාව ඊට මූලික වී තිබේ.
ඒ සම්බන්ධයෙන් ප්රතිචාර දක්වමින් ට්රම්ප් පවසා තිබුණේ “ඒ අතරින් පහෙන් හතරකට සැලකිය යුතු හානි කිසිවක් නොමැති අතර ඒවා දැනටමත් නැවත සේවයට එක් කර ඇත. ව්යාජ පුවත් ශීර්ෂයන්හි සඳහන් කළ පරිදි එකක්වත් විනාශ වී නැත, එයට ආසන්නවත් නැත,” යනුවෙනි.
ඇමෙරිකානු ෆෙඩරල් සන්නිවේදන කොමිසමේ සභාපති බ්රෙන්ඩන් කාර් ඊට පෙර සිටම ඇතැම් මාධ්යවලට අනතුරු අඟවා තිබිණ.
බ්රෙන්ඩන් කාර්
"නීතිය පැහැදිලියි. විකාශකයන් මහජන යහපතට ක්රියා කළ යුතුය. එසේ නොකරන්නේ නම් ඔවුන්ගේ බලපත්ර අහිමි වනු ඇත,” යනුවෙන් කාර් X (Twitter) වෙත කළ සටහනක ලියා තිබුණි.
ඉරානයේ යුද්ධයේ තුන්වන සතිය ආරම්භ වෙද්දී ඇමෙරිකානු ජනපති සහ මාධ්ය අතර ගැටුම මතු වූ අතර එක්සත් ජනපද කොංග්රසයේ ඩිමොක්රටික් නියෝජිතයෝ සහ නිදහස් ප්රකාශනය සඳහා පෙනී සිටින ක්රියාකාරීහු රූපවාහිනී විකාශකයන්ට එරෙහිව සන්නිවේදන කොමිසමේ (Federal Communications Commission) තර්ජන ඇමරිකානු ආණ්ඩුක්රම ව්යවස්ථාවේ පළමු සංශෝධනයෙන් (First Amendment) ලබා දෙන නිදහස් ප්රකාශන අයිතිය උල්ලංඝනය කිරීමක් ලෙස විවේචනය කරති.
“ ට්රම්ප්ගේ ඉරාන යුද්ධයේදී තමන්ට නොකැමති අදහස් නිසා නිදහස් ප්රකාශනය රජය විසින් වාරණය කරනු ලැබීම නීති විරෝධීයි,” යනුවෙන් මැසචුසෙට්ස් ප්රාන්තයේ ඩිමොක්රටික් සෙනෙට් මන්ත්රීවරිය වූ එලිසබෙත් වොරන් (Elizabeth Warren) එක්ස් පනිවුඩයක ලියා තිබුණාය.
“මෙම තර්ජනය අධිකාරිවාදී පාලන රටාවක (authoritarian playbook) පැහැදිලි උදාහරණයක්,” ඇය වැඩිදුරටත් සඳහන් කර තිබිණ.
(සටහන | ගිම්හාන් ද සිල්වා)
මුලාශ්ර :
Trump backs FCC chief’s threat to broadcasters, criticizing Iran war coverage
Trump’s FCC chair faces backlash after threatening broadcasters over Iran war coverage: ‘Flagrantly anti First Amendment’
