කොන්ගෝ ප්රජාතාන්ත්රික සමූහාණ්ඩුවෙන් සහ උගන්ඩාවෙන් වාර්තා වන එබෝලා වෛරස් රෝගය ජාත්යන්තර හදිසි මහජන සෞඛ්ය තත්ත්වයක් බව ලෝක සෞඛ්ය සංවිධානය නිවේදනය කරයි.
ඊයේ (17) වන විට එම රෝගයෙන් පුද්ගල මරණ 80ක් වාර්තා විය.
'බූන්ඩීබූජෝ' වෛරසය හේතුවෙන් හට ගෙන ඇති එම රෝගී තත්ත්වය මෙවර, වසංගත තත්ත්වයක් තෙක් වර්ධනය ව නැතැයි ද, එම නිවේදනයේ දැක්වේ.
කෙසේ වෙතත්, කොන්ගෝව හා භූ දේශ සීමා හුවමාරු කර ගැනෙන අසල්වැසි රටවල් වෙත එය පැතිර යාමේ දැඩි අනතුරු අවදානමක් පවතින බව ලෝක සෞඛ්ය සංවිධානය අවධාරණය කරයි.
සෙනසුරාදා (16) වන විට, කොන්ගෝ වෙතින් එබෝලා සැක සහිත රෝගීන් 246ක් වාර්තා විය. අවම වශයෙන් ඇමෙරිකානු ජාතිකයින් 6 දෙනකුවත් ඒ අතර වන බව සඳහන් ය. එම පුද්ගලයින් ජර්මනියේ හමුදා කඳවුරක් වෙත ප්රවාහනය කිරීමට එක්සත් ජනපදය සූදානම් වන බව ද වාර්තා වේ.
කෙසේ වෙතත්, එම තොරතුරු නිරවද්යතාව සඟවමින් ඊයේ (17) මාධ්ය සාකච්ඡාවකට එක් වූ රෝග පාලන සහ නිවාරණ මධ්යස්ථාන එබෝලා ප්රතිචාර සිද්ධි කළමනාකරු සතිෂ් පිල්ලේ, එම වෛරස රෝගයෙන් එක්සත් ජනපදයට ඇති බලපෑම ඉතා අල්ප බව සඳහන් කළේය.
වැඩිම රෝගීන් සංඛ්යාවක් වාර්තා වන්නේ කොංගෝවේ, ඉටුරි පළාතෙනි. එම පළාතේ සංචාරය කිරීමෙන් වළකින ලෙස, එරට එක්සත් ජනපද තානාපති කාර්යාලය ඊයේ, එහි රැඳී සිටින සියලු එක්සත් ජනපද වාසීන්ට දැනුම් දුන්නේය. එහි එක්සත් ජනපද වාසීන් මෙම රෝගී තත්ත්වයට බඳුන් වුවහොත්, ඔවුන්ට හදිසි සේවා ක්රියාත්මක කිරීමේ එක්සත් ජනපද රජයේ ශක්යතාවය අතිශය සීමා සහිත බව ද දන්වා තිබේ.
එබෝලා රෝගය මුලින්ම හඳුනා ගැනුණේ 1976 වසරේ දීය. කොන්ගොවෙන් මෙවර එය වාර්තා වන්නේ 17 වන වරට ය. කොංගෝවේ අධිකතර ඝන නිවර්තන වනාන්තර සමූහය එබෝලා වෛරස ව්යාප්තියට ස්වභාවික තෝතැන්නක් බවට හඳුනා තිබේ.
එබෝලා, මරණීය රෝගී තත්ත්වයකි. උණ, ශරීරයේ කැසීම් ස්වභාවය, වමනය සහ පාචනය එහි සුලබ රෝග ලක්ෂණ ය. රෝගීන්ගෙන් පිටවන මළ - මුත්ර සහ වෙනත් දියර, ඉන් දූෂිත ද්රව්ය මෙන්ම රෝගයෙන් මරණයට පත්වන්නන් හා සෘජු සබඳතා මගින් එය ව්යාප්ත වේ.
(සටහන | Reuters ඇසුරින්; හර්ෂ උදයකාන්ත පීරිස්)
මුලාශ්රය :
WHO declares Ebola outbreak in Congo, Uganda an emergency of international concern
