එක්සත් ජනපදය සහ ඊශ්රායලය එක්ව ඉරානයට ප්රහාර එල්ල කර තෙමසකට පසුව පසමිතුරු ක්රියාකාරකම් තවදුරටත් දෛනිකව උත්සන්න වෙමින් පවතී.
දැනට, එක්සත් ජනපදය සහ ඉරානය අතර 'නාමික' සටන් විරාමයක් ක්රියාත්මකය. ඉරාන සමුද්රීය වෙළඳාම කෙරෙහි පැනවූ එක්සත් ජනපද තහනම තව දුරටත් තදින් ක්රියාත්මක අතර ඉරානය විසින් අනවසරයෙන් හෝර්මුස් සමුද්ර සන්ධිය තරණය තහනම් කර තිබේ.
දෙපාර්ශ්වය අතර නිත්ය ගිවිසුමක් අත ළඟ නොපෙනේ. උත්සන්න වෙමින් පවතින අර්බුදකාරී තත්ත්වය, දෙපාර්ශවයටම තව කෙතෙක් දුර දරා සිටිය දැයි අවිනිශ්චිතය. වොෂින්ටනය හෝ ටෙහ්රානය අතර කුමන මොහොතක හෝ ගිනි අවි යළි 'පත්තු' වීමට ඇති සම්භාවිතාව ඉතා ඉහළය.
මේ අතර, ටෙහ්රානය විසින් වොෂින්ටනය වෙත ඒවා ඇති නවතම සාම යෝජනාවලිය විශ්ලේෂණය කෙරෙන තෙක් ඉරානයට එරෙහි සැලසුම්ගත ප්රහාර තාවකාලිකව නවතන බව, ජනපති ට්රම්ප් ඊයේ (18) දැනුම් දුන්නේය. නව යෝජනාවලිය ඉරාන න්යෂ්ටික වැඩපිළිවෙළ සීමා කිරීම පිලිබඳ 'ඉතා හොඳ ගනුදෙනුවක්' වනු ඇතැයි අපේක්ෂා කරන බව ද ඔහු කීය.
ඉරානය සිය නව සාම සැලැස්ම ඉදිරිපත් කිරීමෙන් අනතුරුව, ඉරානයට එරෙහිව අද (19) දින දියත් කිරීමට සැලසුම් කළ ප්රහාරය තාවකාලිකව අත්හිටුවීමටත්, ඕනෑම මොහොතක යළි මහා පරිමාණ සහ පූර්ණ ප්රහාර ආරම්භ කිරීමට පෙර සූදානමේ පසුවන ලෙසත්, එක්සත් ජනපද හමුදා වෙත උපදෙස් නිකුත් කළ බව හෙතෙම පැවසීය.
එවැනි ප්රහාර සැලැස්මක් පිලිබඳ පූර්ව නිවේදනයක් නොවූ බව, රොයිටර්ස් පුවත් සේවය සඳහන් කළේය. එහෙත්, සිය අභිලාශ ප්රකාරව යුද්ධය අවසන් කිරීමට, ටෙහ්රානය ගිවිසුම් ගත නොවුණහොත්, ඉරානය වෙත දැවැන්ත ප්රහාරයක් එල්ල කර, විනාශ කර දමන බවට, ජනපති ට්රම්ප් විසින් මීට පෙර අනතුරු අඟවා තිබිණි.
නව සාම ගිවිසුමක් පිලිබඳ අපේක්ෂා පෙරදැරිව කටාරය, සෞදි අරාබිය සහ එක්සත් අරාබි එමීර් රාජ්යය විසින් ද සිදු කළ විශේෂ ඉල්ලීමක් සලකා බලමින්, ඉරානයට එරෙහි නව ප්රහාර තාවකාලිකව අත්හිටවූ බව, ඔහු සමාජ මාධ්ය සටහනක දැක්වීය. "ඇමෙරිකා එක්සත් ජනපදයට ඉහළින්ම පිළිගත හැකි ගනුදෙනුවකට යා හැකි බව පේනවා. මැද පෙරදිග සහ අනෙකුත් සියලු රටවලටත් එය ඉතා හොඳ එකක් වේවි," ඔහු සඳහන් කළේය.
පසුව, මාධ්ය අමතා අදහස් දැක්වූ ජනපති ට්රම්ප්, ඉරානය න්යෂ්ටික අවි හරණයට කැමැත්ත පල කරන්නේ නම්, එය එක්සත් ජනපදයේ ඉමහත් සතුටට කරුණක් බව පැවසීය.
මේ අතර, අන් කවරදා හෝ නොවූ අයුරින් ඉරාන විප්ලවීය හමුදා, ඉදිරි සටනට සූදානමේ පසුවන බව ද දන්වා තිබේ. එබැවින්, 'වැරදීමකින් හෝ' යළි ඉරානයට පහර නොදෙන ලෙස එක්සත් ජනපදය ප්රමුඛ මිත්ර සන්ධානය වෙත ටෙහ්රානය විසින් අනතුරු අඟවා ඇත.
ජාත්යන්තර පරමාණු බලශක්ති ඒජන්සියේ නිරීක්ෂණයට යටත්ව, ඉරානයට සාමකාමී න්යෂ්ටික වැඩසටහනක් අඛණ්ඩව සිදු කිරීම පිණිස, වොෂින්ටනය යම් නම්යශීලී බවක් දක්වා ඇතැයි ද ඉරාන ආරංචි මාර්ග උපුටා දක්වන විදෙස් මධ්යයේ සඳහන් වේ. එහෙත්, එවැන්නක් පිලිබඳ එකඟතා පලව ඇති බවට එක්සත් ජනපද සහතිකයක් නැත.
සාකච්ඡා අතරවාරයේ, ඉරාන තෙල් තහනම ඉවත් කිරීමට වොෂින්ටනය එකඟ වූ බව, ඉරාන තස්නිම් පුවත් ඒජන්සිය ද වාර්තා කළේය. කෙසේ වෙතත්, එය සාවද්ය පුවතක් බව, නම් සඳහන් කිරීමට මැලි වූ එක්සත් ජනපද නිලධාරියකු උපුටා දක්වන රොයිටර්ස් පුවත් සේවය කීය.
(සටහන | Reuters ඇසුරින්; හර්ෂ උදයකාන්ත පීරිස්)
මුලාශ්ර :
No deal, no exit: How US-Iran standoff risks fresh conflict
Trump says he paused attack on Iran, signals a nuclear deal may be possible
