ලෙබනනය ඊයේ (1) හිස්බොල්ලා සහ ඊශ්රායලය අතර සටන් විරාමයක් නිවේදනය කළේය. එම සීමිත සටන් විරාමය අතර ගැටුම් හැකි තාක් අවම වෙතයි අපේක්ෂා කෙරේ.
එහෙත්, නවතම එකඟතා හමුවේ එරට ගැටුම සමස්ත ලෙස අවසන් නොවනු ඇතැයි, වොෂින්ටන් නුවර පිහිටි ලෙබනන තානාපති කාර්යාලය පවසයි. කෙසේ වෙතත්, එමගින්, බීරුත් සහ හිස්බොල්ලා පාලනයට නතු තදාසන්න පෙදෙස් වෙත ප්රහාර එල්ල කිරීමෙන් වළකින ලෙස ඊශ්රායල හමුදා වෙත දන්වා තිබේ. ඉරාන සහාය හිමි හිස්බොල්ලා සංවිධානයද ඊශ්රායල වෙත ප්රහාර නවතනු ඇත.
පසුගිය මාර්තු මස, ඊශ්රායල හමුදා දකුණු ලෙබනනය ආක්රමණය කරමින් අඛණ්ඩ ප්රහාරයේ පසු විය. ඊයේ සන්ධ්යාව තෙක් එම ප්රහාර ක්රියාත්මක විය. ලෙබනනය හරහා උතුරු ඊශ්රායලය දෙසට එල්ල කරන ලද මිසයිල ප්රහාරයක් ව්යර්ථ කළ බව, ඊශ්රායල හමුදා අද (2) අළුයම දැන්වීය.
ඊශ්රායලය වෙත ප්රහාර නවතන බවට හිස්බොල්ලා සංවිධානය අතරමැදියන් මගින් ප්රතිඥා දී ඇතැයි, නව සටන් විරාම එකඟතාව පිලිබඳ පළමු නිවේදනය නිකුත් කරමින්, එක්සත් ජනපද ජනපති, ඩොනල්ඩ් ට්රම්ප් පැවසීය. සෘජුව හෝ වක්ර ලෙස, මේතාක් කිසිදු එක්සත් ජනපද ජනපතිවරයකු හිස්බොල්ලා සංවිධානය හා සාකච්ඡා පවත්වා නැත. එක්සත් ජනපදය විසින් එය ත්රස්ත සංවිධානයක් ලෙස නම් කර තිබේ.
මේ අතර, බීරුත් වෙත ප්රහාර එල්ල කිරීමට සැරසී සිටි ඊශ්රායල හමුදා යළි කැඳවන බවට එරට අග්රාමාත්ය, බෙන්ජමින් නෙතන්යාහු හා ගිවිස ගත් බවද ජනපති ට්රම්ප් කියා සිටියේය.
ජනපති ට්රම්ප් ගේ නිවේදනයෙන් පසු විශේෂ ප්රකාශයක් කළ අග්රාමාත්ය නෙතන්යාහු, දකුණු ලෙබනනයේ ඊශ්රායල හමුදා ක්රියාන්විත අඛණ්ඩව ක්රියාත්මක බව දන්වා සිටියේය. ඊශ්රායල පාබල හමුදා විසින් ලෙබනනයේ සහරානි ගංගාව දෙසට විශේෂ මෙහෙයුමක් දියත් කර තිබේ. ඉකුත් වසර 25 තුළ එම හමුදා ලෙබනනයේ දියත් කළ දීර්ඝතම අභ්යන්තර පාබල ආක්රමණය එය වේ.
හිස්බොල්ලා සන්නද්ධ කණ්ඩායම සමස්ත ලෙබනනයම ආවරණය වන සේ, එම සටන් ව්විරාමය ක්රියාත්මක කිරීමට සහාය දක්වන බව, එහි පාර්ලිමේන්තු සභික හසන් ෆඩ්ලල්ලා පැවසීය. ඊශ්රායල හමුදා ඉවත් කරගැනීමට ප්රතිචාර වශයෙන් එසේ සහාය පල කෙරේ. හෙට (3) වොෂින්ටනයේ පැවැත්වීමට නියමිත මීළඟ සටන් විරාම සාකච්ඡා වටයේදී, නව සටන් විරාමය තව දුරටත් දීර්ඝ කිරීමට අපේක්ෂා කරන බව, ලෙබනනය පැවසීය. ඊශ්රායල සහ එක්සත් ජනපදය එක්ව, ඉරාන සටන් ඇරඹීමෙන් අනතුරුව ඉකුත් මාර්තු මස ඇවිලුණු ලෙබනන ගැටුම, තිරසර විසඳුමක් ඔස්සේ අවසන් කිරීම නව සාකච්ඡා හි අරමුණය. එහි පෙර ක්රියාවලිය මෙතෙක් අතරමග ඇණ හිට පැවතිණ.
යුද්ධය අවසන් කිරීමට නම්, ඊශ්රායල හමුදා ලෙබනනයේ සිදු කරන සියලු ප්රහාර අවසන් කළ යුතු බව, ඉරානය විසින් අවධාරණය කර තිබේ. එහෙත්, මෙය ප්රත්යක්ෂ ලෙස දෙතැන ගැටුමක් මිස එකක් නොවන බව, එක්සත් ජනපද මතයයි.
ඉරානය සහ එක්සත් ජනපදය අතර සටන් විරාමයක් යනු, නිසැක වශයෙන් ලෙබනනය ඇතුළු සියල්කු පෙරමුණු හි සටන් විරාමයක් බව, ඉරාන විදේශ අමාත්ය, අබ්බාස් අරඛ්චි විශේෂ සඳහනක් කරමින් පැවසීය.
ලෙබනනයේ ඊශ්රායල ප්රහාර අවසන් නොකිරීම හේතුවෙන්, ටෙහ්රානය අතරමැදි පාර්ශ්ව ඔස්සේ සිදු කරන සාම සාකච්ඡා අත්හිටුවන බව, ඊයේ එරට රාජ්ය මාධ්ය නිවේදනය කළේය. එහෙත්, ඉරානය ඒ පිලිබඳ තමන් දැනුවත් කර නැති ජනපති ට්රම්ප් කියා සිටියේය. ඉරානය සමග සාම කතා දැන් දැන් නීරස බවත්, ඒවා අවසන් වුවත්, නොවූවත් ඉන් ඵලක් නොවන බවත් ඔහු ඊයේ පැවසීය.
මේ අතර, හෝර්මුස් සමුද්ර සන්ධියේ ඉරාන තහනම් කලාපය රතු මුදේ තවත් තීරණාත්මක ප්රවේශයක් වන බබෙල් මැන්ඩෙබ් සන්ධිය තෙක් ව්යාප්ත කරන බව ඉරාන විප්ලවීය ආරක්ෂක ඛඩ්ස් බලකා ප්රධානී එස්මයෙල් ඛානී විසින් අනතුරු අඟවා තිබේ.
(සටහන | Reuters ඇසුරෙන් ; හර්ෂ උදයකාන්ත පීරිස්)
06/02/2026
මුලාශ්රය ;
Lebanon announces partial ceasefire between Israel, Hezbollah but attacks continue
