චීන ජනාධිපති ෂී ජින් පිං ලබන සතියේ උතුරු කොරියාවේ දෙදින රාජ්ය සංචාරයක නිරත වීමට නියමිත බව චීන සහ උතුරු කොරියානු රාජ්ය මාධ්ය තහවුරු කර තිබේ.
උතුරු කොරියානු නායක කිම් ජොන් උන්ගේ නිල ආරාධනයකට අනුව, ජුනි 8 සහ 9 යන දිනවල මෙම සංචාරය සිදු කෙරෙන බව චීන කොමියුනිස්ට් පක්ෂයේ මධ්යම කාරක සභාවේ විදේශ සම්බන්ධතා දෙපාර්තමේන්තුව නිවේදනය කර ඇත.
මෙය ෂී ජින් පිං ගේ 2019 වසරෙන් පසු උතුරු කොරියාවට සිදු කරන පළමු සංචාරය වන අතර, දෙරට අතර සබඳතා තවදුරටත් ශක්තිමත් කිරීමේ වැදගත් පියවරක් ලෙස දේශපාලන විශ්ලේෂකයන් සලකයි.
විශේෂයෙන්ම පසුගිය වසර කිහිපය තුළ උතුරු කොරියාව සහ රුසියාව අතර සබඳතා වර්ධනය වී ඇති පසුබිමක, බීජිං පාලනය තම බලපෑම යළි තහවුරු කිරීමට මෙම සංචාරය යොදා ගනු ඇතැයි විදෙස් මාධ්ය වාර්තා කරයි. එමෙන්ම කොරියානු අර්ධද්වීපයේ ආරක්ෂාව, කලාපීය ස්ථාවරත්වය සහ ද්විපාර්ශ්වික ආර්ථික සහයෝගීතාව පිළිබඳව ද නායකයන් අතර සාකච්ඡා පැවැත්වීමට නියමිත බව සඳහන් වේ.
උතුරු කොරියාවේ න්යෂ්ටික වැඩසටහන, චීන-අමෙරිකා සබඳතා, රුසියාව සමඟ උතුරු කොරියාවේ සමීපතාව සහ නැගෙනහිර ආසියාවේ බලතුලනය වැනි කරුණු මෙම සංචාරයේදී අවධානයට ලක්විය හැකි බව විශ්ලේෂකයෝ පෙන්වා දෙති.
