ඉරානය සමග 'දෙකෙන් එකක්' බේරා ගන්නා බව එක්සත් ජනපද ජනපති, ඩොනල්ඩ් ට්රම්ප්, ඊයේ (6) පැවසීය.
ඒ අනුව, සටන් විරාම ගිවිසුම් ප්රකාරව ගැටුම අවසන් කෙරේද, නොඑසේව, ප්රහාරයෙන් කෙලවර කෙරේද යන තීරණය තමා සතු බව ඔහු අවධාරණය කළේය. ඝාතනයට පත් ඉරාන උත්තරීතර නායක අයතොල්ලා අලි ඛමෙනි ගේ අවමගුලෙන් අනතුරුව ඉරානය දැක්වූ දැඩි විරෝධතා හමුවේ, ජනපති ට්රම්ප් විසින් මෙම නව තර්ජන දක්වා තිබේ.
දෙරට අතර වක්ර සාකච්ඡා පසු ගිය සතියේ අවසන් කෙරුණේ, කිසිදු ඉදිරි තීරණයකින් තොරව ය.
"එක්කෝ අපි ගිවිසුමේ ඉන්නවා. නැත්තං වැඩේ අහවර කරල දානවා, හරිය.! අනෙක් කාරණේ, මේක ඉවරයක් කරලා දාන එක මහ දෙයක් නෙවේ. ඒත්, මිලියන 91ක මිනිස්සු ගැන හිතල, ගිවිසුමේම වැඩේ කරන්නයි මගෙ කල්පනාව," ජනපති ට්රම්ප් ඕවල් කාර්යාලයට රැස් වූ මාධ්යවේදීන් හමුවේ පැවසීය.
"එක පැයකින් උංගෙ සේරම පාලං ටික වනසන්න අපට පුළුවන්. උංගෙ සේරම බල ශක්ති සැපයුම් සුන්නද්දූලි කළ හැකියි. දැන් උං ළඟ සල්ලිත් නෑ. අපි උන්ට සත පහක් දීලත් නෑ," ඔහු කීය.
ට්රම්ප්ගේ තර්ජනය අතාර්කික මුලාවක් බව, ඉරාන උත්තරීතර ජාතික ආරක්ෂක සභාවේ ලේකම්, මොහම්මඩ් බඛේර් සොල්ඛදර් කියා සිටියේය.
"ඉරාන ජනතාවට ඔය තර්ජන බාසාව හුරු නෑ.. ඒ ජනතාවට ගෞරවයෙන් අමතන්න. එහෙම නූනොත් අපි වෙන බාසාවකින් අමතනවා," ඔහු රාජ්ය මාධ්ය හමුවේ ප්රකාශ කළේය.
ට්රම්ප් සිය නවතම තර්ජනාත්මක ප්රකාශය සිදු කළේ, සති අන්තයේ පැවති ඛමෙනි ගේ අවමගුලෙන් අනතුරුවය. එතෙක්, යුධයෙන් හෙම්බත්ව ඇතැයි, එක්සත් ජනපදය විසින් සිතා සිටි ඉරාන ජනතාව එම අවමගුල් අවස්ථාවේ දැඩි විරෝධයක් පානු දක්නට ලැබිණි. එය, එළැඹෙන ඕනෑම තර්ජනයකට එකාවන්ව නැගී සිටින බවට වූ අධිෂ්ඨාන පූර්වක ජන විරෝධයකි.
(සටහන: Reuters ඇසුරින්; හර්ෂ උදයකාන්ත පීරිස්)
7/7/2026
මුලාශ්රය :
Trump says there will either be a deal with Iran or US will 'finish the job'
