බාවී සුළි කුණාටුවෙන් චීනයේ ලක්ෂ ගණනක් අවතැන්

චීනයේ ප්‍රදේශ රැසක් මේ වන විට බාවී (Bavi)  සුළි කුණාටුව සමග ආ ධාරානිපාත වර්ෂා හේතුවෙන් අධිකතර ජල ගැල්මට හසුව පවතී.

මෙම වසරේ, මෙතෙක් එරටට බල පෑ ප්‍රබලතම කුණාටු තත්ත්වය මෙය වේ. ඊශානදිග ලියොනිඞ් (Liaoning) පළාතේ පමණක් අවතැන් පුද්ගලයින් සංඛ්‍යාව 260,000කට අධිකය.

අද (14) ද, එහි දැඩි වැසි සහිත කාලගුණික තත්ත්වයක් අපේක්ෂා කෙරේ. සුළි කුණාටුව හේතුවෙන් උතුරුකරය,  නිවර්තන කලාපීය අධි ආර්ද්‍රතාවයෙන් යුත් ජල වාෂ්ප  විශාල ප්‍රමාණයකින් පෝෂණය වන අතර, එමඟින් උතුරු චීනය අඛණ්ඩ අධි ශීත වායු ධාරාවට යටත් කෙරේ.

ලියොනිඞ් පළාත් අගනුවර, ෂෙන්යැං (Shenyang) හි අධි බල විදුලි රැහැන් පද්ධතියක්  ද විනාශ කරමින් ඇද වැටුණු ප්‍රදීපාගාරයක්, ප්‍රධාන මාවත් මතින් ගලා ගිය ගං ජලයේ ඇදී පැමිණ, පාලමක් යටින් පාවී යනු සමාජ මාධ්‍යයේ පළ කළ වීඩියෝ දර්ශනයක  දැක්වේ.

සියළු පාසල් සහ අධ්‍යයන පුහුණු ආයතන ද තාවකාලිකව වසා දැමීමට පියවර ගෙන තිබේ. ෂෙන්යැං සහ ජිලිං ඇතුළු ඊශානදිග නාගරික රැසක පොදු ප්‍රවාහන සේවා  අඩාලව පවතී.

ප්‍රංශ භූ කලාපයට සමාන වපසරියක් ආවරණය කරමින් බාවී සුළි කුණාටුව පැසිෆික් සාගරයේ හට ගත්තේ මීට දින 13කට ඉහත දීය. සෙනසුරාදා (11) රාත්‍රියේ, එය නැගෙනහිර චීනයට පතිත විය. මේ වසරේ, ආසියා - පැසිෆික් කලාපයේ අඛණ්ඩව වැඩිම කාලයක් බල පැවැත්වෙන සුළි කුණාටුව මෙය ය.

බාවී මීළඟට, කොරියානු අර්ධද්වීපය ආක්‍රමණය කිරීමට නියමිත ය.

(සටහන: Reuters ඇසුරින්; හර්ෂ උදයකාන්ත පීරිස්)

7/14/2026
(This email address is being protected from spambots. You need JavaScript enabled to view it.)

මුලාශ්‍රය :

More than 260,000 evacuated as Typhoon Bavi brings severe floods