එක්සත් ජනපද හමුදා අඛණ්ඩ සය වන දිනටත් ඉරානය වනසති

ඉරානය මත සිය නවතම ප්‍රහාර මාලාව සාර්ථකව අවසන් කළ බව එක්සත් ජනපද මධ්‍යම විධානය ඊයේ (16) නිවේදනය කළේය.

එය, එම ප්‍රහාර මාලාවේ අඛණ්ඩ සයවන දිනය සනිටුහන් කළේය. එක්සත් ජනපද ජනපති, ඩොනල්ඩ් ට්‍රම්ප්ගේ මාර්ගෝපදේශන ඔස්සේ එම ප්‍රහාර දියත් කෙරිණි.

එක්සත් ජනපද හමුදාවන්ට අයත් ප්‍රහාරක ජෙට්, ඩ්‍රෝන යානා සහ යුද නෞකා ඊට එක් වූහ. ඉරාන වෙරළබඩ ආවේක්ෂණ පද්ධති, ගුවන් ආරක්ෂක කලාප, හමුදා සේවා සැපයුම් මධ්‍යස්ථාන සහ එම යටිතල පහසුකම් මෙන්ම, සමුද්‍රීය ඉලක්ක වෙත අති සාර්ථක ප්‍රහාර එල්ල කළ බව, එක්සත් ජනපද මධ්‍යම විධානය දැන්වීය.

ඊයේ, එක්සත් ජනපද ප්‍රහාරක ඩ්‍රෝන යානා ඛෙෂම් දිවයිනේ සහ බන්ඩර් අබ්බාස් ආසන්නයේ ඉරාන ඉලක්ක වෙත ප්‍රහාර එල්ල කළහ. එහි ඉරානයට අයත් විශාලතම වරාය සහ විප්ලවීය ආරක්ෂක බලකායට අයත් යටිතල පහසුකම් ද වෙති. එම ඉලක්ක දෙකම හෝර්මුස් සමුද්‍ර සන්ධියේ පිහිටා තිබේ.

ඉරාන පාලම් තුනක් වෙත සහ දුම්රියපොලකට ද එක්සත් ජනපද ප්‍රහාර එල්ල වී ඇතැයි, ඉරාන මාධ්‍ය ඊයේ පස්වරුවේ කියා සිටියහ. ඒ, වෙරළබඩ බන්ඩර් ඛමීර් ප්‍රදේශයේ ය. අග්නිදිග ඉරානයේ පිහිටි ඉරාන්ෂහ්ර් ගුවන්තොටුපොළ වෙත ද එක්සත් ජනපද හමුදා මිසයිල ප්‍රහාර එල්ල කළහ.

ජෝර්දානයේ මෑතක නවීකරණය කරන ලද ගුවන් හමුදා කඳවුරක් වෙත ඉරානය මිසයිල සහ ඩ්‍රෝන ප්‍රහාර එල්ල කළේය. බදාදා (15) රාත්‍රී, එක්සත් ජනපද හමුදා ඉරාන ළමා පිළිකා රෝහලකට ප්‍රහාර එල්ල කළේ එහි සිට බව ටෙහ්රානය කීය.

මීළඟට, ඉරාන බලශක්ති මධ්‍යස්ථාන වෙත පහර දෙන බවටත්, එන සතියේ එරට පාලම්  විනාශ කරන  බවටත්, ජනපති ට්‍රම්ප් විසින් තර්ජනය කර තිබේ. යුද්ධයේ මානුෂීය පවත්වාගැනීම පිලිබඳ 1949 එක්සත් ජාතීන්ගේ ප්‍රඥප්තිය අනුව, මානව භාවිතය පිණිස පවත්නා සිවිල් පහසුකම් වෙත ප්‍රහාර එල්ල කිරීම සපුරා තහනම් ය. ට්‍රම්ප්ගේ තර්ජන පිලිබඳ අදහස් පළ කළ, එක්සත් ජනපද යුධ විශේෂඥයෝ, එම තර්ජන ප්‍රකාරව ප්‍රහාර සිදු කළහොත්, "යුද අපරාධ" චෝදනා එල්ල විය හැකි බවටද අනතුරු ඇඟවූහ.

ටෙහ්රානය සමග සටන්  විරාමයකට එළැඹීමට පෙර, ඉරානය මානව ශිෂ්ටාචාරයෙන් අතුගා දමන බවට ට්‍රම්ප් කළ තර්ජන පසු ගිය අප්‍රේල් මස ලොව පුරා විවේචනයට ලක් විය.

පෙබරවාරි 28 දා, ඊශ්‍රායල සහ එක්සත් ජනපද හමුදා ප්‍රහාර හමුවේ ඉරාන යුද්ධය ආරම්භ විය. ඉරානය ද පෙරලා ඊශ්‍රායල සහ ගල්ෆ් කලාපයේ එක්සත් ජනපද ඉලක්ක සොයා පහර දුන්නේය.  

ඉරානය වෙත එල්ල කෙරෙන සභාග ප්‍රහාර සහ ලෙබනනයේ ඊශ්‍රායල ප්‍රහාර හමුවේ, දහස් සංඛ්‍යාත පිරිසක් ජීවිතක්ෂයට පත්ව, තවත් මිලියන ගණනක් අවතැන්ව සිටිති.  

(සටහන: Reuters ඇසුරින්; හර්ෂ උදයකාන්ත පීරිස්)
7/17/2026
(This email address is being protected from spambots. You need JavaScript enabled to view it.)

මුලාශ්‍රය :

US military says it completed latest strikes on Iran, marking 6th consecutive night of attacks