දෙරටේ වෙළෙඳ සහයෝගිතාව පුළුල් කරමින් අපනයන කාර්මික කොරිඩෝවකටත් අඩිතාලම.
බලශක්ති, සැපයුම් ජාල සහ නිෂ්පාදන ක්ෂේත්රවල මෙහෙයුම් බාධා ඉවත් කිරීමට රාජ්ය ආයතන එක්වෙයි.
ක්ෂේත්ර ගණනාවක මෙහෙයුම් ගැටලුවලට සෘජු රාජ්ය මැදිහත්වීමක්
ශ්රී ලංකාවේ ක්රියාත්මක ජපාන ව්යාපාරික ආයතන මුහුණ දෙන මෙහෙයුම් සහ නීතිමය ගැටලු කඩිනමින් නිරාකරණය කරමින්, ආයෝජන හිතකාමී පරිසරයක් තහවුරු කිරීම අරමුණු කරගත් ශ්රී ලංකා – ජපාන ව්යාපාරික පරිසර කමිටුවේ පස්වැනි ක්රියාකාරී මට්ටමේ සාකච්ඡාව ශ්රී ලංකා ආයෝජන මණ්ඩල (BOI) මූලස්ථානයේදී පැවැත්විණි.
කාර්තුමය වශයෙන් පවත්වනු ලබන මෙම තාක්ෂණික සැසියේදී සාම්ප්රදායික ලිපිගනුදෙනු ක්රමවේදයෙන් බැහැරව, මෙරට ක්රියාත්මක ප්රමුඛ ජපාන සමාගම්වල නියෝජිතයන්ට තම ක්ෂේත්ර තුළ පවතින ගැටලු සහ නියාමන බාධා සෘජුවම අදාළ රජයේ ආයතන වෙත ඉදිරිපත් කිරීමට අවස්ථාව සැලසිණි. ඊට ප්රතිචාර දක්වමින් සහභාගී වූ රාජ්ය නිලධාරීන් එම අවස්ථාවේදීම ඊට අදාළ නීතිමය සහ තාක්ෂණික පැහැදිලි කිරීම් සිදු කළ අතර, විසඳුම් ප්රායෝගිකව ක්රියාත්මක කිරීමේ ක්රමවේද පිළිබඳවද එකඟතාවන්ට එළඹිණි.
මෙම සාකච්ඡාවේදී ප්රධාන වශයෙන් අවධානයට ලක්වූ ක්ෂේත්ර:
| කාර්මික සහ උසස් තාක්ෂණික නිෂ්පාදන ක්රියාවලිය
| පාරිභෝගික භාණ්ඩ සහ සෞඛ්ය ප්රවර්ධන සේවා
| අගය එකතු කළ අපනයන වෙළෙඳාම
| යටිතල පහසුකම්, සැපයුම් ජාල කළමනාකරණය (Logistics) සහ බලශක්ති ක්ෂේත්රය
| පාරිසරික සේවා හා තිරසාර ව්යාපෘති
| ආයෝජන විශ්වාසය සහ ආයතනික සම්බන්ධීකරණය
මෙම සාකච්ඡාව සඳහා කොළඹ ජපාන තානාපති කාර්යාලය, ජපාන විදේශ වෙළෙඳ සංවිධානය (JETRO), ජපාන ජාත්යන්තර සහයෝගිතා ඒජන්සිය (JICA), ජපාන වාණිජ හා කර්මාන්ත මණ්ඩලය (JCCI) ඇතුළු නිල ආයතන ගණනාවක ජ්යෙෂ්ඨ නියෝජිතයෝ එක්ව සිටියහ.
විදේශ ආයෝජකයන් සහ ශ්රී ලංකා රජය අතර ප්රධාන සම්බන්ධීකාරක ලෙස ආයෝජන මණ්ඩලය දක්වන ක්රියාකාරී මැදිහත්වීම මෙහිදී විශේෂ ඇගයීමට ලක්විය. ආයෝජකයින්ගේ ගැටලුවලට කඩිනමින් විසඳුම් සෙවීම තුළින් පවතින ආයෝජන ආරක්ෂා කරගැනීම මෙන්ම, ශ්රී ලංකාව තුළ නව ආයෝජන ව්යාප්ත කිරීමට ජපාන සමාගම් දිරිමත් වන බව පාර්ශ්ව දෙකෙහිම එකඟතාව විය. ආයතන අතර කාර්යක්ෂම සම්බන්ධීකරණය අඛණ්ඩව පවත්වා ගැනීමට රජයේ පාර්ශ්වය මෙහිදී ප්රතිඥා දුන්නේය.
අපනයන කාර්මික කොරිඩෝවකට අලුත් පියවරක්
මෙම තාක්ෂණික සාකච්ඡාවට සමගාමීව, දෙරටේ ආර්ථික සහයෝගීතාවයේ තීරණාත්මක සංධිස්ථානයක් සනිටුහන් කරමින් අපනයන අභිමුඛ කාර්මික කොරිඩෝ සංවර්ධනය (Export-Oriented Industrial Corridor Development) පිළිබඳ ශ්රී ලංකා - ජපාන ඒකාබද්ධ ක්රියාකාරී කණ්ඩායමේ (Joint Working Group) සමාරම්භක රැස්වීමද කොළඹ ජපාන තානාපති කාර්යාලයේදී පැවැත්විණි.
පසුගිය පෙබරවාරි මාසයේදී දෙරට අතර පැවති අන්තර් රාජ්ය ආර්ථික ප්රතිපත්ති සංවාදයේදී එළඹි ප්රතිපත්තිමය එකඟතාවකට අනුව පිහිටුවන ලද මෙම ඒකාබද්ධ ක්රියාකාරී කණ්ඩායම හරහා, ශ්රී ලංකාව ගෝලීය සැපයුම් ජාලය සමග බද්ධ කෙරෙන මහා පරිමාණ අපනයන කොරිඩෝවක සංකල්පීය මාර්ග සිතියම (Conceptual Roadmap) ක්රියාවට නැංවීමට නියමිතය.
ආර්ථික ස්ථාවරත්වය සහ විදේශ විනිමය ඉපැයීම් පුළුල් කිරීම ප්රමුඛ අභියෝගයක්ව පවතින පසුබිමක, මෙවැනි ක්රමෝපායික ආර්ථික හවුල්කාරිත්වයන් ශ්රී ලංකාවේ කාර්මික සංවර්ධනයට මෙන්ම ජාත්යන්තර ආයෝජක විශ්වාසය තහවුරු කිරීමටද ශක්තිමත් පදනමක් සපයයි.
වැඩිදුර කියවීම සඳහා නිල මූලාශ්ර සබැඳිය :
The 5th Japan-Sri Lanka Committee on Business Environment Convened - Embassy of Japan in Sri Lanka
