මෙගාවොට් 350ක සහස්දනවි බලාගාරයේ BOI ගිවිසුම ලියාපදිංචි කෙරේ
ඉදිකිරීම් නිමාවත් සමඟ නව රැකියා 1,100කට අධික ප්රමාණයක්
ශ්රී ලංකාවේ බලශක්ති සුරක්ෂිතතාව සහ ජාතික විදුලිබල පද්ධතියේ ස්ථාවරත්වය තහවුරු කිරීමේ තවත් වැදගත් පියවරක් සනිටුහන් කරමින්, කෙරවලපිටිය කාර්මික කලාපයේ ඉදිකිරීමට නියමිත මෙගාවොට් 350 ක ‘සහස්දනවි’ ඒකාබද්ධ චක්රීය විදුලි බලාගාර (Combined Cycle Power Plant) ව්යාපෘතිය සඳහා වන ආයෝජන ගිවිසුම ශ්රී ලංකා ආයෝජන මණ්ඩලය (BOI) සමඟ නිල වශයෙන් ලියාපදිංචි කර තිබේ.
1978 අංක 4 දරන ශ්රී ලංකා ආයෝජන මණ්ඩල පනතේ 17(2) වගන්තියට අනුකූලව මෙම ගිවිසුම ලියාපදිංචි කර ඇති අතර, මෙරට යටිතල පහසුකම් සහ බලශක්ති ක්ෂේත්රය වෙත ඉහළ වටිනාකමකින් යුතු ප්රාග්ධන ආයෝජන ආකර්ෂණය කරගැනීමේ ක්රියාවලියට මෙය විශාල පිටුවහලක් වනු ඇත.
ඩොලර් මිලියන 291ක ආයෝජනයක් සහ නව රැකියා දහසක්
සහස්දනවි ලිමිටඩ් (Sahasdhanavi Limited) සමාගම මඟින් ක්රියාත්මක කරන මෙම ව්යාපෘතිය සඳහා ඇස්තමේන්තුගත මුළු ආයෝජනය ඇමරිකානු ඩොලර් මිලියන 291.19 කි. එම මූල්ය ව්යුහය සමන්විත වන්නේ:
| කොටස් ප්රාග්ධනය (Share Capital) ලෙස ඇමරිකානු ඩොලර් මිලියන 90.00ක්
| ණය ප්රාග්ධනය (Loan Capital) ලෙස ඇමරිකානු ඩොලර් මිලියන 196.19ක්
| අනෙකුත් මූලාශ්ර මඟින් ඇමරිකානු ඩොලර් මිලියන 5.00ක් වශයෙනි.
මෙම ප්රාග්ධනය ස්ථාවර වත්කම් මෙන්ම මෙහෙයුම් ප්රාග්ධනය සඳහා යොදවනු ඇත. බලාගාරය සිය පූර්ණ ධාරිතාවෙන් යුතුව මෙහෙයුම් ආරම්භ කිරීමත් සමඟ ක්ෂේත්රයේ සෘජු හා වක්ර නව රැකියා අවස්ථා 1,147ක් උත්පාදනය වනු ඇතැයි ගණන් බලා තිබේ.
BOOT ක්රමයට අදියර දෙකකින් ජාතික පද්ධතියට
මෙම බලාගාරය ඉදිකිරීම, හිමිකාරිත්වය දැරීම, මෙහෙයවීම සහ පැවරීම (BOOT - Build-Own-Operate-Transfer) යන පදනම මත ක්රියාත්මක වන අතර, නිපදවන සමස්ත විදුලිය ඍජුවම ජාතික විදුලිබල පද්ධතියට සැපයේ. ගිවිසුම්ගත දිනයේ සිට මාස 42ක කාලයක් තුළ මෙහි ඉදිකිරීම් අවසන් කිරීමට සැලසුම් කර ඇත.
ව්යාපෘතිය අදියර දෙකකින් සමන්විත වේ
පළමු අදියර:
ගෑස් ටර්බයිනය (Gas Turbine) මඟින් ක්රියාත්මක වන අතර, එහිදී ද්රවීකෘත ස්වාභාවික වායු (LNG) භාවිතයෙන් මෙගාවොට් 243ක ධාරිතාවක් ද, ඩීසල් භාවිතයෙන් මෙගාවොට් 213ක ධාරිතාවක් ද උත්පාදනය කෙරේ.
දෙවන අදියර:
වාෂ්ප ටර්බයිනය (Steam Turbine) මඟින් ක්රියාත්මක වන අතර, LNG භාවිතයෙන් මෙගාවොට් 107ක ධාරිතාවක් සහ ඩීසල් භාවිතයෙන් මෙගාවොට් 105ක ධාරිතාවක් නිපදවනු ඇත.
ආරම්භක අදියරේදී බලාගාරයේ මෙහෙයුම් කටයුතු ඩීසල් ඉන්ධන මඟින් සිදු කිරීමට නියමිත වුවද, අදාළ ජාතික යටිතල පහසුකම් ස්ථාපිත වූ වහාම ප්රති-වාෂ්පීකෘත ද්රවීකෘත ස්වාභාවික වායු (RLNG) වෙත මාරුවීමට හැකිවන පරිදි බලාගාරය සැලසුම් කර ඇත. එමඟින් පරිසර හිතකාමී සහ පිරිසිදු ඉන්ධන භාවිතයක් කරා ගමන් කිරීමට ශ්රී ලංකාවට අවස්ථාව සැලසේ.
කෙරවලපිටිය බලශක්ති කේන්ද්රස්ථානයක් බවට
මෙම ව්යාපෘතියත් සමඟ කෙරවලපිටිය ප්රදේශය ශ්රී ලංකාවේ ප්රධානතම තාප සහ ඒකාබද්ධ චක්රීය විදුලි උත්පාදන කේන්ද්රස්ථානයක් ලෙස තවදුරටත් ශක්තිමත් වනු ඇත.
දැනටමත් ක්රියාත්මක වන මෙගාවොට් 300 ක ‘යුගදනවි’ සහ මෙගාවොට් 350 ක ‘සෝබදනවි’ බලාගාර සමඟ ‘සහස්දනවි’ බලාගාරය එක්වීමෙන් අනතුරුව, කෙරවලපිටිය පරිශ්රයෙන් පමණක් ජාතික පද්ධතියට එක්වන මුළු විදුලි ධාරිතාව ආසන්න වශයෙන් මෙගාවොට් 1,000ක් (ගිගාවොට් 1ක්) දක්වා ඉහළ යනු ඇත. සූර්ය හා සුළං වැනි පුනර්ජනනීය බලශක්ති ප්රභවයන් ජාතික පද්ධතියට වැඩි වශයෙන් එක්වන විට පද්ධතියේ සංඛ්යාතය සහ ස්ථාවරත්වය පවත්වා ගැනීමට මෙවැනි වේගවත් ප්රතිචාර දැක්විය හැකි ඒකාබද්ධ චක්රීය බලාගාර අත්යවශ්ය සාධකයක් ලෙස බලශක්ති විශේෂඥයෝ පෙන්වා දෙති.
විදුලි උත්පාදනයට අමතරව ඉංජිනේරු, ඉදිකිරීම්, ප්රසම්පාදන, මෙහෙයුම් සහ සැපයුම් දාම ක්ෂේත්ර ඔස්සේ මෙරට ආර්ථිකයට පුළුල් දායකත්වයක් ලබාදීමටත්, දේශීය ශ්රම බලකායේ තාක්ෂණික කුසලතා ඉහළ නැංවීමටත් මෙම ව්යාපෘතිය ඉවහල් වන බව සහස්දනවි සමාගම පෙන්වා දෙයි.
