කර්මාන්ත ශාලාවෙන් එළියට එන ඇඳුම වරායේ හිරවුණොත් මොකද වෙන්නේ? | අශ්රොෆ් ඔමාර් ප්‍රශ්න කරයි

*ඇඟලුම් ක්ෂේත්‍රයේ තරඟකාරීත්වයට එල්ලවන ප්‍රවාහන ප්‍රමාදයේ බලපෑම

*රේගු පූර්ව නිෂ්කාශන ක්‍රමවේදය සහ සැපයුම් දාම කාර්යක්ෂමතාව පිළිබඳ ක්ෂේත්‍රයේ අවධානය

ගෝලීය වෙළඳපොළ ජයගැනීමේදී ශ්‍රී ලංකාවේ ඇඟලුම් ක්ෂේත්‍රය මුහුණ දෙන මීළඟ තීරණාත්මක සාධකය වන්නේ කර්මාන්ත ශාලාව තුළ නිෂ්පාදන වේගය පමණක් නොව, නිමි භාණ්ඩයක් නිෂ්පාදනය කර අවසන් වූ මොහොතේ සිට එය විදේශීය ගැණුම්කරු අතට පත්වන තෙක් ගතවන කාලය බව ක්ෂේත්‍රයේ ප්‍රවීණයෝ පෙන්වා දෙති. කොළඹ පැවති ජාත්‍යන්තර සමුද්‍රීය සමුළුව (International Maritime Conference) අමතමින් බ්‍රැන්ඩිස් (Brandix) සමාගමේ ප්‍රධාන විධායක නිලධාරී අශ්රොෆ් ඔමාර් සඳහන් කළේ, වර්තමාන ගෝලීය වෙළඳ රටාව තුළ ලොජිස්ටික්ස් හෙවත් සැපයුම් දාම කළමනාකරණය යනු නිෂ්පාදනයෙන් පසුව සිදුවන සාමාන්‍ය සේවාවක් නොව, නිෂ්පාදනයේම මූලික අංගයක් බවට පත්ව ඇති බවයි.

නවීන විලාසිතා කර්මාන්තයේ පාරිභෝගික රුචිකත්වයන් ඉතා කෙටි කලකින් වෙනස්වන බැවින්, ජාත්‍යන්තර ගැනුම්කරුවන් අපේක්ෂා කරන්නේ කුඩා ඇණවුම් සහ ඉතා කඩිනම් බෙදාහැරීම් ය. මෙවැනි වාතාවරණයක් තුළ ප්‍රවාහන ප්‍රමාදය යනු සුළු පරිපාලනමය ගැටලුවක් නොව, සෘජු ආර්ථික පාඩුවකි. උසස් ප්‍රමිතියෙන් යුතු ඇඳුමක් වුවද, විලාසිතා රැල්ල අවසන් වූ පසු වෙළඳපොළට ළඟා වුවහොත් එහි වාණිජමය වටිනාකම ශීඝ්‍රයෙන් පහත වැටේ.

කර්මාන්ත ශාලාවේ කාර්යක්ෂමතාව වරාය ප්‍රමාදයෙන් ගිලිහී යාම

මෙරට ඇඟලුම් ක්ෂේත්‍රය කාලයක් තිස්සේ ජාත්‍යන්තර අවධානය දිනාගත්තේ නිෂ්පාදන විශිෂ්ටත්වය, විශ්වාසනීයත්වය සහ ගුණාත්මකභාවය හේතුවෙනි. එහෙත් කර්මාන්ත ශාලාව තුළ දිවා රෑ නොබලා දින පහක කාලයක් ඉතිරි කරගත්තද, එම භාණ්ඩ වරාය තුළ හෝ භාණ්ඩ ප්‍රවාහන නියෝජිතයන් (Freight Forwarders) අත තවත් දින දහයක් ප්‍රමාද වන්නේ නම්, කර්මාන්ත ශාලාවෙන් ලබාගත් සමස්ත කාර්යක්ෂමතාවයම අහෝසි වී යන බව ඔමාර් පෙන්වා දෙයි.

කලාපීය අනෙකුත් අපනයන රටවල් තම සැපයුම් ජාලයන්හි වේගය හා තාක්ෂණය ඉහළ නංවමින් සිටින පසුබිමක, මෙරට ප්‍රවාහන හා යටිතල පහසුකම් පද්ධතිය නිෂ්පාදන ක්ෂේත්‍රයේ නවීන අවශ්‍යතාවලට සරිලන අයුරින් ක්‍රියාත්මක වීමේ වැදගත්කම මෙමඟින් පැහැදිලි කෙරේ.

කඩිනම් 'පූර්ව නිෂ්කාශන' ක්‍රමවේදයක අවශ්‍යතාව

මෙම අභියෝගය ජයගැනීම සඳහා භාණ්ඩ කර්මාන්ත ශාලාවෙන් පිටත්වීමට පෙර රේගු ලියකියවිලි හා පරීක්ෂාවන් අවසන් කෙරෙන 'පූර්ව නිෂ්කාශන' (Pre-clearance) ආකෘතියක් හඳුන්වා දීමේ වැදගත්කම කර්මාන්ත ක්ෂේත්‍රය විසින් යෝජනා කරනු ලබයි. එවැනි ක්‍රමවේදයක් මඟින් භාණ්ඩ අපනයනය සඳහා සූදානම් වූ පසු ලියකියවිලි ප්‍රමාදයන් හේතුවෙන් වරාය තුළ සිරවීම වළක්වා ගත හැකිය.

මෙහිදී රේගුව, වරාය අධිකාරිය, නිෂ්පාදකයන් සහ ප්‍රවාහන නියෝජිතයන් අතර පවතින සම්බන්ධීකරණය ඩිජිටල් තාක්ෂණය ඔස්සේ තවදුරටත් කඩිනම් කිරීම මූලික අවශ්‍යතාවකි. දිගුකාලීන සැලසුම්වලට එහා යමින්, වරාය තුළ භාණ්ඩ රඳවා තබන කාලය (Port dwell time) සහ පරිපාලනමය ලියකියවිලි පිරිවැය සැබෑ ලෙසම අඩු කෙරෙන ප්‍රායෝගික යාන්ත්‍රණයක් නිර්මාණය වීම අපනයන ප්‍රවර්ධනයට ඉවහල් වන බව පෙන්වා දෙනු ලැබේ.

අපනයන තරඟකාරීත්වයේ සැබෑ පදනම

ජාත්‍යන්තර වෙළඳපොළේ පවතින තීරුබදු සහන හෝ බාහිර ප්‍රතිපත්ති වෙනස්වීම් කෙරෙහි මෙරටට සෘජු බලපෑමක් කළ නොහැකි වුවද, රට අභ්‍යන්තරයේ පවතින වරාය කාර්යක්ෂමතාව, භාණ්ඩ හැසිරවීමේ පිරිවැය සහ සැපයුම් ජාලයේ විශ්වාසනීයත්වය වැඩිදියුණු කරගැනීම අප සතු කාර්යයකි.

මෙම සැපයුම් දාම කාර්යක්ෂමතාව ඇඟලුම් අංශයට පමණක් නොව තේ, රබර්, කෘෂිකාර්මික හා අනෙකුත් කාර්මික අපනයනකරුවන්ටද සිය ගබඩා පිරිවැය අවම කරගැනීමටත්, විශ්වාසදායක ගෝලීය වෙළඳ හවුල්කරුවෙකු ලෙස ශ්‍රී ලංකාවේ ස්ථානය තහවුරු කරගැනීමටත් පිටුවහලක් වනු ඇත. දේශීය නිෂ්පාදන ශක්තිය, වේගවත් හා විශ්වාසදායක අපනයන පද්ධතියක් බවට පත්කිරීම ඉදිරි ආර්ථික ගමනේ ප්‍රධාන ප්‍රමුඛතාවක් ලෙස හඳුනාගැනේ.

වැඩිදුර තොරතුරු සඳහා:

Port Delays Could Remove Sri Lanka’s Apparel Competitiveness - LankaNews

Brandix CEO calls for Customs pre-clearance to protect Sri Lanka’s export edge - Daily FT

Sri Lanka Apparel Exporters Association - Industry Updates