විදේශීය ආයෝජකයන්ගේ අවධානය දිනාගත් මන්නාරම් බලපත්‍ර වෙන්දේසිය

වසර 10කට පසු ජාත්‍යන්තර ආයෝජකයන්ට දොර ඇරෙන හැටි

2032 වන විට වාණිජ නිෂ්පාදන අරඹන්න රජයෙන් දැවැන්ත සැලසුමක්


ශ්‍රී ලංකාවේ මුහුදු සීමාව තුළ ගිලී ඇති බලශක්ති සම්පත් වාණිජමය මට්ටමින් රටට ආදායමක් ගෙන එන ප්‍රභවයක් බවට පත්කිරීමේ තීරණාත්මක පියවරක් ලෙස, මන්නාරම් ද්‍රෝණියේ ගවේෂණ කොටස් හතරක් සඳහා වන ජාත්‍යන්තර බලපත්‍ර ප්‍රදාන ක්‍රියාවලිය මේ වන විට ක්‍රියාත්මක වේ. දශකයකට වැඩි කාලයකට පසු  ශ්‍රී ලංකාව විසින් සිදුකරනු ලබන ප්‍රධානතම වෙරළෙන් ඔබ්බෙහි වූ (offshore) ඛනිජ තෙල් ගවේෂණ ටෙන්ඩරය මෙය වන අතර මෙහි ආර්ථික වැදගත්කම මූලික මූල්‍යමය කොන්දේසි ඉක්මවා යන බව විදුලිබල හා බලශක්ති අමාත්‍ය අනුර කරුණාතිලක පාර්ලිමේන්තුවට පෙන්වා දී තිබේ.

මෙම ජාත්‍යන්තර බලපත්‍ර වෙන්දේසි වටය සඳහා ආයෝජකයන්ට 2027 පෙබරවාරි හෝ මාර්තු දක්වා කාලය ලබා දී ඇත. ලැබෙන යෝජනා ඇගයීම 2027 වසර තුළ අවසන් කර, එම වසරේ ඔක්තෝබර් මාසයේ සිට සාර්ථක ලංසුකරුවන් සමඟ අවසන් ගිවිසුම්වලට එළඹීමට රජය අපේක්ෂා කරයි. මුළු ක්‍රියාවලියම 2027 වසර අවසන් වීමට පෙර නිම කිරීම අපේක්ෂාවයි.

වර්ග කිලෝමීටර 34,000ක පුළුල් අවකාශයක් සහ භූ විද්‍යාත්මක පදනම

මෙම වැඩසටහන යටතේ වර්ග කිලෝමීටර 34,000 කට ආසන්න මුහුදු තීරයක් ආවරණය වන පරිදි ගවේෂණ කොටස් හතරක් විදෙස් සමාගම් වෙත විවෘත කර ඇත. මූලික ලියාපදිංචි ගාස්තුවක් ලෙස ඇමෙරිකානු ඩොලර් 5,000 ක පමණ සොච්චම් මුදලක් අය කිරීමට නියමිත වුවද, සැබෑ ආර්ථික ප්‍රතිලාභ රඳා පවතින්නේ ආයෝජකයින් ඉදිරිපත් කරන නිෂ්පාදන කොටස් බෙදාගැනීමේ සහ රාජ්‍යභාග (royalties) කොන්දේසි මතය. එබැවින් හුදෙක් මූලික ගෙවීම් මත පමණක් නොව, ඔවුන්ගේ තාක්ෂණික ශක්තිය සහ සංවර්ධන සැලසුම් මත පදනම්ව ලංසු තෝරා ගැනීම රජය විසින් විනිවිදභාවයකින් සිදු කළ යුතුය.  

මන්නාරම් ද්‍රෝණිය තුළ දැනටමත් ඩොරාඩෝ (Dorado) සහ බැරකුඩා (Barracuda) ලෙස ස්වභාවික ගෑස් නිධි දෙකක් 2011 වසරේදී සොයාගෙන තිබීම මෙහි ඇති භූ විද්‍යාත්මක ආකර්ෂණය තවත් වැඩි කරයි. මෙම නිධි දෙකෙහි පමණක් ඝන අඩි බිලියන 839 ක පමණ සම්පත් ප්‍රමාණයක් ඇස්තමේන්තු කර ඇති අතර, ඉදිරි ගවේෂණ මඟින් බැරකුඩා (Barracuda) නිධියේ පමණක් ධාරිතාව මීට වඩා සිව්ගුණයක් විය හැකි බවට ඛනිජ තෙල් සංවර්ධන අධිකාරියේ (PDASL) අධ්‍යක්ෂ ජනරාල් වෛද්‍ය නීල් ද සිල්වා පෙන්වා දී ඇත.  

2032 වන විට වාණිජ නිෂ්පාදන ඉලක්කයක්

බලපත්‍රය ලබා ගන්නා සාර්ථක ආයෝජකයෙකුට මෙහෙයුම් කටයුතු ආරම්භ කිරීමට මාස හයක කාලයක් ලැබෙන අතර, මූලික ගවේෂණ කාලය වසර තුනකි. එය උපරිම වශයෙන් වසර අටක් දක්වා දීර්ඝ කළ හැකි අතර, එම කාලය තුළ වාණිජ මට්ටමේ නිෂ්පාදන කටයුතු ආරම්භ කළ යුතුවේ. ඉන්පසුව වසර 20 ක වත්කම් හිමිකාරීත්ව කාලසීමාවක් හිමිවන බැවින්, මෙම ගිවිසුම් හරහා 2050 වන තෙක් දිවෙන දිගුකාලීන වාණිජ සබඳතා ගොඩනැගෙනු ඇත.

විදෙස් ආයෝජකයන් ආකර්ෂණය කර ගැනීම සඳහා බ්‍රිතාන්‍යයේ ෆ්‍රොන්ටියර් බලශක්ති ජාලය (Frontier Energy Network) සමඟ එක්ව ලන්ඩන් නුවර ලෝක බලශක්ති සමුළුව (World Energies Summit) සහ ක්වාලාලම්පූර් නුවර පැවැත්වෙන ආසියානු පෙට්‍රෝලියම් සමුළුව ඇතුළු ජාත්‍යන්තර වේදිකා හරහා පුළුල් ආයෝජන ප්‍රවර්ධන ව්‍යාපාරයක් ක්‍රියාත්මක කරමින් පවතී. ගවේෂණ සාර්ථක වුවහොත්, 2032 වන විට වාණිජ මට්ටමින් ගෑස් නිෂ්පාදනය ආරම්භ කිරීම මෙහි අවසාන ඉලක්කයයි.  

කෙසේ වෙතත්, සම්පත් තිබූ පමණින් ඉන් ක්ෂණිකව ආදායම් ලැබිය නොහැකි අතර, භූ කම්පන සමීක්ෂණ, සාර්ථක ලෙස කැණීම් සිදුකිරීම සහ යටිතල පහසුකම් සකස් කරගැනීම වැනි ප්‍රායෝගික අභියෝග රැසක් ජය ගැනීමට ශ්‍රී ලංකාවට සිදුවනු ඇත.

වැඩිදුර තොරතුරු සඳහා පහත ලින්ක් වෙත පිවිසෙන්න:


Lanka News | Mannar Basin Gamble: Can Sri Lanka Turn Gas Into Revenue?

Sri Lanka Licensing Round 2026 නිල වෙබ් අඩවිය  

ඛනිජ තෙල් සංවර්ධන අධිකාරියේ නිල නිවේදනය