යුද්ධයෙන් අනාථ වී නැගෙනහිර විශ්ව විද්‍යාලයේ සරණ සොයා ගොස් සිටියදී සිටියදී වසර තිස් දෙකකට ඉහතදී ශ්‍රි ලංකා රජයේ හමුදා විසින් පැහැරගෙන ගොස් අතුරුදහන් අරනු ලැබූ එකසිය පනහකට වැඩි පිරිසක්

වෙනුවෙන් රට තුල කිසිදු යුක්තියක් අපේක්ෂා කළ නොහැකි බව පවසන වින්දිත පවුල් වල ඥාතීහු සිය සමීපතමයන් සොයා ගැනීම වෙනුවෙන් ජාත්‍යන්තර මැදිහත්වීමක් ඉල්ලා සිටිති.

සරසවි සිසුන් සමග එක්ව නැගෙනහිර විශ්ව විද්‍යාලය ඉදිරිපිට නිහඩ විරෝධතාවයක් දියත් කරමින් 2022 සැප්තැම්බර් 5වැනිදා වින්දිත පවුල් වල මව්වරුන් සදහන් කළේ සිය සමීපතමයන්ට අත්වු ඉරණම සොයා ගැනීම වෙනුවෙන් වසර 32 ක් අරගලයක නිරතව සිටියද මේ තාක් තමන්ට යුක්තිය ඉටු වී නැති බවයි.


එක්සත් ජාතික පක්ෂය දේශපාලනයේ 76 වැනි වසර සමරන අවස්ථාවේ පැවති අනුස්මරණයේදී සිහිපත් කරනු ලැබුවේ එම පක්ෂය බලයේ සිටිමින් 44 වැනි සංවත්සරය පැවැත්වූ දිනට එළිවන විට මරා දමනු ලැබූ දෙමළ තරුණයන් 158 කි.


වන්දාරමුලෙයි සමුහ ඝාතනය නමින් ප්‍රකට එම අපරාධය සිදු වන කාලයේ පැවති ආණ්ඩුවේද ප්‍රබල ඇමැතිවරයකු වු වත්මන් ජනපති රනිල් වික්‍රමසිංහගේ නව පාලනය යටතේද තමන්ට යුක්තිය ඉටු කරනු ඇතැයි විශ්වාසයක් නොමැති බව මාධ්‍ය හමුවේ පැවසු මවක් එහිදී ඉල්ලා සිටියේ සිය ඥාතීන්ට අත් වු ඉරණම හෙළි කර ගැනීම සදහා ජාත්‍යන්තරය වහාම මැදිහත් විය යුතු බවයි.

බලහත්කාරයෙන් අතුරුදහන් කර සිටින සිය සමීපතමයන් සිහිපත් කර ඉටි පහන් දල්වමින් ඔවුන් අනුස්මරණය කිරීමට සරසවි සිසුන් ප්‍රමුඛ වින්දිත පවුල්වල සාමාජිකයන් කටයුතු කර තිබුනි.


සුදු කොඩි



මඩකලපුව, වන්දාරමුලෙයි නැගෙනහිර විශ්ව විද්‍යාලයේ රැඳී සිටි උන් හිටි තැන් අහිමිවූ පිරිසක් කොම්මාතුරෙයි හමුදා කඳවුරින් පැමිණ බලහත්කාරයෙන් රැගෙන ගොස් ඇත්තේ එක්සත් ජාතික පක්ෂ පාලනයක් පැවති 1990 සැප්තැම්බර් මස 5 වැනි දිනය.



විශ්ව විද්‍යාලයේ රැකවරණ සොයාගොස් සිටියේ සෝදිසි කර විනාශ කිරීමේ මෙහෙයුමක යෙදී සිටි වාලච්චීනෙයි හමුදා කඳවුරේ භට සේනා කඩාවැදුණු වන්දාරමුලෙයි, සංගන්කර්නි සහ කෞරවක්කර්නි ගම්මානවලින් පලාවිත් දිවිගලවා ගත්තවුන්ය. ආරක්ෂාව සැලසූ සරසවි ඇදුරන් විසින් විශ්ව විද්‍යාලය ඉදිරිපිට සුදු කොඩි ඔසවා තිබුණි.

විශ්ව විද්‍යාලීය පරිපාලන සාමාජිකයන් මෙන්ම අතුරුදහන්වුවන්ගේ ඥාතීන්ද විසින් ජනාධිපති කොමිසමකට දෙන ලද සාක්ෂි අනුව එදින පෙරවරු 9 ට පමණ පැමිණි හමුදාව විසින් සියළු රැඳවියන් පෙළගස්සවා එයින් තෝරාගත් තරුණ පිරිසක් බස් රථ දෙකක නග්ගවාගෙන පිටතට රැගෙන ගොස් තිබේ.

එදිනම මඩකලපුවේ සත්තුරුකොන්ඩාන්, පනිච්චෙයියාඩි, කොකුවිල් සහ පිල්ලෙයියාරඩි ගම්වලට කඩා වැදුණු යුද හමුදාව තවත් ගම්වාසීන් පැහැරගෙන ගොස් තිබේ.මේ කිසිවකුත් ආපසු පැමිණ නැත.


කැප්ටන් මුනාස් සහ කපිතාන් රිචඩ් ඩයස්



රැඳවියන් එසේ රැගෙන යාමට පැමිණ ඇත්තේ කැප්ටන් මුනාස් නමින් හඳුන්වනු ලැබු හමුදා නිළධාරියකු ඇතුළු පිරිසක් විසිනි. කැප්ටන් මුනාස් යනුවෙන්  හැඳින්වෙන්නේ කපිතාන් රිචඩ් ඩයස් යැයි මඩකලපු පුරවැසි කමිටුවේ හැරී මිලර් පියතුමා 1993 දී ‘හිරු’ පුවත් පතට පවසා තිබුණි.

කෙසේ නමුත් හිටපු ජනාධිපති චන්ද්‍රිකා බණ්ඩාරනායක කුමාරතුංගගේ පළමු පාලන සමයේදි ඇය විසින් පත්කරනු ලැබු ‘පුද්ගල පැහැරගෙන යාම් සහ අතුරුදහන් කිරීම් පිළිබඳ පරික්ෂණ කොමිසම්’ ත්‍රිත්වයෙන් එකක් වන උතුරු නැගෙනහිර කොමිසම විසින් වන්දාරමුලෙයි සමුහ ඝාතනය පිළිබඳව තොරතුරු වාර්තා කොට තිබේ.

ක්‍රිෂ්ණ පිල්ලෙයි පාලකිඩ්නර් ප්‍රමුඛ ත්‍රිපුද්ගල කමිටුවක් ප්‍රධානත්වය දැරූ එම කොමිසමේ අවසන් වාර්තාවෙහි මෙම සිදුවිමෙන් අතුරුදහන්වුණු පුද්ලයන්ගේ නම් මෙන්ම එයට වගකිව යුතු හමුදා නිළධාරින් ලෙසින් කැප්ටන් මුනාස්, කැප්ටන් පාලිත හා කැප්ටන් ගුණරත්නගේ නම් සඳහන් කොට තිබේ.

මේජර් මජීඩ් සහ මේජර් මොහාන් යන අතුරු සන්නද්ධ කල්ලි නායකයන් දෙදෙනකුද එම පැහැර ගැනීමට හවුල් වී තිබෙන බවට සාක්ෂි කොමිසම විසින් සටහන් කරගෙන තිබේ.


හිටපු හමුදාපති


සාක්ෂි කරුවන් විසින් කොමිසමට කියා ඇති පරිදි, සැප්තැම්බර් 8දා කඳවුරට පැමිණි එවක හමුදාපති ජෙරී ද සිල්වා දැනුම් දී ඇත්තේ රැගෙන ගිය සැම දෙනාම වරදකරුවන් ලෙසින් ඔප්පු වී තිබෙන බවය. ඒ ‘වරදකරුවන්’ සම්බන්ධයෙන් ගන්නා ලද පියවර කවරේදැයි හිටපු හමුදාපතිවරයා කියා නැත.

කෙසේ වෙතත්, පුද්ගල පැහැරගෙනයාම් සහ ඝාතන සම්බන්ධයෙන් අදාළ කොමිසම් විසින් හඳුනාගනු ලැබු කිසිදු හමුදා හෝ පොලිස් භටයකුට එරෙහිව වැඩිදුර නීති විමර්ශන සිදුනොකරන ලෙසට ඉහළම දේශපාලන බලාධිකාරිත්වය විසින් නියෝග කරනු ලැබුවේ යැයි අදාළ කොමිසම්වල ලේකම්වරයකු ලෙස කටයුතු කළ එම්.සී.එම් ඉක්බාල් පසු කලෙක කියා සිටියේය.

 

 

 ***************

කවුරුත් නොදකින - කවුරුත් නොලියන - කාගේ කාගේත් ඇත්ත -  කාටත් කලින් දකින.... 
The LEADER Whatsapp Group එකට එකතුවෙන්න. 
 

Screenshot 2022 06 23 at 11.50.54 AM

subscribeYT

WhatsApp Image 2021 09 13 at 13.49.58

නවතම පුවත්

ඇට මැස්සා