සේවක අර්ථ සාධක අරමුදලට (EPF) කිසිඳු හානියක් සිදුවීමට ඉඩ නොතබන බව ජනාධිපති වික්රමසිංහ අවධාරණය කර සිටියි.
සේවක අර්ථ සාධක අරමුදල සම්බන්ධව මේ වන විට අනියත බියක් ඇති කිරීමට ඇතැම් පාර්ශව උත්සාහ කළ ද වැඩකරන ජනතාව වෙනුවෙන් ස්ථාපිත කර තිබෙන සේවක අර්ථ සාධක අරමුදලට කිසිඳු හානියක් සිදුවීමට ඉඩ නොතබන බව හෙතෙම පවසයි.
කම්කරු දිනය වෙනුවෙන් පණිවිඩයක් නිකුත් කරමින් ජනාධිපතිවරයා පෙන්වා දෙන්නේ, “පසුගිය වසරේ මැයි දිනය සමරන අවස්ථාව වන විට රට දරුණු ආර්ථික කඩාවැටීමකට ලක්ව තිබු අතර ඒ හමුවේ සියලුදෙනාට දැඩි දුෂ්කරතාවන්ට මුහුණ පෑමට සිදු වු බවය.”
එම අභියෝගාත්මක කාල වකවානුවේ දී, ආර්ථිකය ස්ථාවර කරන අසීරු ආරම්භක පියවරයන් දෙස ඉවසීමෙන් සහ ධෛර්යයෙන් බලා සිටි සියලු වැඩකරන ජනතාවට තමාගේ හෘදයාංගම ස්තූතිය පිරිනමන බවද ජනාධිපතිවරයා පැවසීය.
“එමෙන්ම මේ උදා වී ඇත්තේ අන් කවරදාටත් වඩා ශ්රී ලාංකික වැඩ කරන ජනතාවගේ අභිමානය ලොවට ප්රදර්ශනය කළ හැකි අවස්ථාවකි. මෙම තීරණාත්මක අවස්ථාවේ පටු දේශපාලන වුවමනාවන්ට ගොදුරු නොවී රට පළමුව තබා කටයුතු කරන ලෙස මම සියලු දෙනාගෙන් ඉල්ලා සිටිමි.”
සෑම විටම කම්කරු ජනතාවගේ අයිතිවාසිකම් සුරක්ෂිත කිරීමට ක්රියා කළ අතර, ඔවුන්ගේ අයිතිවාසිකම් සහ වරප්රසාද දිනා දෙමින් ශ්රමයට නිසි වටිනාකමක් ලැබෙන යහපත් අනාගතයක් නිර්මාණය කිරීම අද දවසේ ද අපේක්ෂාව බවද ජනාධිපතිවරයා සඳහන් කරයි.
2048 වන විට දියුණු ශ්රී ලංකාවක් ගොඩනැඟීමේ නව ප්රතිසංස්කරණවාදී ගමන් මඟ සමඟ එකමුතුව අත්වැල් බැඳගන්නා ලෙස සියලු වැඩකරන ජනතාවට ආරාධනා කරන බවද ජනාධිපතිවරයා නිකුත් කළ නිවේදනයේ දැක්වෙයි.
