ජනාධිපති රනිල් වික්‍රමසිංහගේ ඉන්දීය සංචාරයේදී කඳුකර දෙමළ ජනයාගේ ගැටළු ගැන
සාකච්ඡා කරන ලෙස ඉන්දීය අගමැතිට ඉල්ලීමක් ඉදිරිපත්ව තිබේ.
රනිල් වික්‍රමසිංහ ජනාධිපතිධුරයට පත් වීමෙන් පසු පළමු වරට ජුලි 21 වැනිදා ඉන්දියාවේ සංචාරයක නිරත වීමට නියමිතය. මෙම නිල සංචාරයට ඩග්ලස් දේවානන්දා, කාංචන විජේසේකර, අලි සබ්රි ඇමැතිවරුන් සහ ජනාධිපති කාර්ය මණ්ඩල ප්‍රධානී සාගල රත්නායක එක් වනු ඇති.
'' ජාතික ප්‍රශ්නයට විසදුමක් වෙනුවෙන් මැදිහත් වෙනවා වගේම කඳුකර දෙමළ ජනයා මුහුණ දෙන ගැටළු කෙරෙහි ලංකාවේ ආණ්ඩුවට බලපෑම් කිරීමේ හැකියාව ඉන්දීය අගමැති මෝදී ට තියෙනවා,'' යැයි දෙමළ ප්‍රගතිශීලි පෙරමුණේ නායක, පාර්ලිමේන්තු මන්ත්‍රී මනෝ ගනේෂන් පවසයි.
'' මලෙයියහ තමිල් ජනතාවගේ වසර 200ක ඉතිහාසය'' නමින් කඳුකර දෙමළ ජනයාගේ ඉතිහාසය ගැන ලියවුනු පොතක් දොරට වැඩිමේ උත්සවයකට වවුනියාව ප්‍රාදේශීය ලේකම් කාර්යාලිය ශ්‍රවණාගාරයේ දී ජුලි 9 වැනිදා එක්වෙමින් පාර්ලිමේන්තු මන්ත්‍රී මනෝ ගනේෂන් කියා සිටියේ මෙම ඉල්ලීම ඇතුලත් ලිපියක් ඉන්දීය අගමැතිවරයා වෙත යොමු කළ බවයි.
'' අපේ ප්‍රශ්න ගැන මැදිහත් වෙන්න ඉන්දීය අගමැතිවරයාට වගකීමක් තියෙනවා. ජාතික ප්‍රශ්නයට විසදුමක් දෙන්න මැදිහත්වීමේ උවමනාව ඉන්දියාවට තියෙනවා. ඒ ගැන රනිල් වික්‍රමසිංහ ලංකා ජනාධිපති එක්ක සාකච්ජා කරන්න කියාලා උතුරු නැගෙනහිර දෙමළ දේශපාලන නායකයෝ දැනටමත් ඉන්දීය අගමැතිට ලියාලා තියෙන්නේ.''
දෙමළ ප්‍රගතිශීලි පෙරමුණු නායකයා ඉන්දීය අගමැතිට අවධාරණය කරන්නේ ලංකා ජනාධිපති දිල්ලියට පැමිණෙන විට ඔහු වෙනුවෙන් හුදෙක් සාද පමණක් නොපත්වා ජාතික ප්‍රශ්නය ඇතුළු සමස්ත දෙමළ ජනයාගේ ගැටළු ගැන තිරසාර විසදුමකට කතා කරන ලෙසයි.
සබැඳි පුවත් :
ඉන්දියාවට යන ජනපති මාර්ගයෙන් 'උතුරේ ධීවර අර්බුදය දැනුම් දෙන්න'
