පාස්කු ප්‍රහාරයේ වගකිවයුත්තන් අල්ලා ගැනීමට ජාත්‍යන්තර පරීක්ෂණයක් පැවැත්වීම
සම්බන්ධයෙන් ශ්‍රී ලංකාවේ කතෝලික සභාවේ බේදයක් ඇති බව හුවා දැක්වීමට ජනාධිපතිවරයා ජාත්‍යන්තර ජනමාධ්‍ය හමුවේ කරන ලද්දේ අසත්‍ය ප්‍රකාශයක් බව කතෝලික සභාව පවසයි.
ජාත්‍යන්තර පරීක්ෂණයක් පැවැත්වීමට කාදිනල් මැල්කම් රන්ජිත් ඉල්ලා සිටින බව ඩොයිෂ වෙලේ මාධ්‍යවේදී මාර්ටින් ගක් පෙන්වා දුන් අවස්ථාවේ ජනාධිපතිවරයා එම ප්‍රශ්නය මගහැර ගියේ තමන් ගනුදෙනු කරන්නේ රදගුරු සම්මේලනය මිස කාදිනල් වරයා සමග නොවන බව පවසමිනි.
“මම කතා කරන්නේ කතෝලික පල්ලිය ගැන නොවයි. මම ඔබ ඇසු ප්‍රශ්නයට පිළිතුරු ලබාදීම පමණයි සිදු කරන්නේ. ඒ වගේම මම ගනුදෙනු කරන්නේ රදගුරු සම්මේලනය සමග මිස කාදිනල්තුමා සමග නෙවෙයි. කතෝලික සභාවට කොමිසමේ සියලු වාර්තා අවශ්‍ය බව දැනුම් දුන්නා. මම ඒ සියල්ල දුන්නා,” යයි ජනාධිපතිවරයා ප්‍රකාශ කර සිටියේය.
කොමිසම් වාර්තා නීතිඥවරුන් විසින් අධ්‍යයනය කරනු ලබන බව පවසන රදගුරු සමුළු සභාපති හිමිපාණන් පවසන්නේ පාස්කු ප්‍රහාරය පිළිබඳව සාකච්ඡා කිරීම සඳහා ජනාධිපතිවරයා කිසි විටෙක කතෝලික රදගුරු සමුළුව හමු නොවූ බවයි.
කතෝලික සභාව විසින් නිකුත් කරන ශ්‍රී ලංකාවේ පළවන ඉපැරණිතම සිංහල පුවත්පත වන ඥානාර්ථ ප්‍රදීපයේ මෙවර ඉරිදා කලාපයෙන් ඔවුන් ජනාධිපති රනිල් වික්‍රමසිංහට ප්‍රතිචාර දක්වා ඇත්තේ “ජනාධිපතිවරයාගේ අසත්‍ය ප්‍රකාශය“ මැයෙන් ලියා ඇති කතු වැකිය මගිනි.
පාස්කු ඉරිදා ප්‍රහාරය පිළිබඳව තමන් කාදිනල් හිමිපාණන් සමඟ ගනු දෙනු නොකරන බවත්, ශ්‍රී ලංකා කතෝලික රදගුරු සමුළුව සමඟ සාකච්ඡා කළ බවත් ජර්මනියේ Deutsche Welle මාධ්‍ය ආයතනය සමඟ විශේෂ සම්මුඛ සාකච්ඡාවකට එක්වෙමින් පැවසු ජනාධිපති රනිල් වික්‍රමසිංහ එහිදී තව දුරටත් කියා තිබුනේ කතෝලික රදගුරු සමුළුව පැමිණ තමන් සමඟ සාකච්ඡා කළ බවයි.
"එසේම ඒ සඳහා කතෝලික රදගුරු සමුළුව ද කිසි විටෙක ජනාධිපතිවරයා හමුවීමට නොගිය බව අපි දනිමු," යයි මේ පිළිබඳව කතෝලික සභාවේ නිල පුවත්පත ‘ඥානාර්ථ ප්‍රදීපය’ කළ විමසීමක දී කතෝලික රදගුරු සමුළුවේ සභාපති, කුරුණෑගල රදගුරු හැරල්ඩ් ඇන්තනි හිමිපාණන් පැහැදිලිව ප්‍රකාශ කර තිබේ.
එසේම, කාදිනල් හිමිපාණන් සහ කතෝලික රදගුරු සමුළුවේ ස්ථාවරය අතර පරස්පරයන් ඇති බව පෙන්වීමට මෙම සාකච්ඡාවේ දී ජනාධිපතිවරයා අසාර්ථක උත්සහයක යෙදුන බවයි ඥානාර්ථ ප්‍රදීපය පවසන්නේ.
"එහෙත්, රටේ ජාතික ප්‍රශ්න පිළිබඳව මෙන්ම පාස්කු ඉරිදා ප්‍රහාරය පිළිබඳවද ස්ථාවරය ප්‍රකාශ කරනුයේ සියලු රදගුරු හිමිවරුන්ගේ එකඟත්වයෙන් සාමුහිකව බව හැරල්ඩ් ඇන්තනි පෙරේරා රදගුරු හිමිපාණෝ අප පුවත් පතට පැහැදිලිව පවසා තිබේ."
අවුරුද්දකට පමණ ඉහතදී ජනාධිපතිවරයා පෞද්ගලිකව හමුවූ අවස්ථාවක තමන් කළ ඉල්ලීමක් පරිදි ලැබුණු පාස්කු ප්‍රහාරය පිළිබඳව සොයා බැලීමට පත් කළ ජනාධිපති කොමිසමේ වාර්තාව අඩංගු සංයුක්ත තැටි හයක් නීතිඥයන් විසින් අධ්‍යයනය කරමින් සිටින බවද කතෝලික රදගුරු සමුළු සභාපති හැරල්ඩ් ඇන්තනි හිමිපාණන් වැඩිදුරටත් පවසා ඇත.
අලුතින් බලයට පත් ජනාධිපතිවරයා සහ හිටපු අමාත්‍ය රවී කරුණානායක එම දියෝකීසියේ පියතුමන් දෙදෙනකු සමග කුරුණෑගල රදගුරු මන්දිරයේදී හමුවූ කතෝලික සමුළු සභාපති හිමියන් පවසා තිබුනේ සාකච්ඡා පලදායී බවයි.
එහිදී කතෝලික ආගමික කටයුතු මෙන්ම රටේ එවක පැවති දේශපාලනික හා ආර්ථික අර්බුදය කතාබහට ලක්වූ බව වතිකානුව විසින් පලකරන නිල කතෝලික මාධ්‍ය ඔස්සේ ප්‍රකාශයට පත් කර තිබුණි.
පාස්කු ප්‍රහාර පරීක්ෂණ සම්බන්ධයෙන් කතෝලික සභාවේ බෙදීමක් ඇඟවීමට ජනාධිපති රනිල් වික්‍රමසිංහ ඩොයිෂ වෙල රූපවාහිනිය හමුවේ දැරුවේ “විහිළු සහගත, අභූත සහ අසාර්ථක” උත්සාහයක් බවට හෙලා දකිමින් කතෝලික සභාව විසින් නිකුත් කරන ශ්‍රී ලංකාවේ පළවන ඉපැරණිතම සිංහල පුවත්පත වන ඥානාර්ථ ප්‍රදීපයේ 2023 ඔක්තෝබර් 8 වැනි ඉරිදා කලාපයේ කතු වැකියේ සම්පුර්ණ උපුටා ගැනීම පහතින්,
“ජනාධිපතිවරයාගේ අසත්‍ය ප්‍රකාශය“
ජනාධිපති රනිල් වික්‍රමසිංහ මහත්මා පසුගිය දා ‘ඩොයිෂ්‌ වෙල’ නමැති ජර්මානු රූපවාහිනී නාලිකාවේ පැවති සාකච්ඡාවකට එක්වෙමින් පාස්කු ඉරිදා ප්‍රහාරය පිළිබඳවත්, ශ්‍රී ලංකා රදගුරු සමුළුව සහ අතිඋතුම් කාදිනල් හිමිපාණන් පිළිබඳවත් කතෝලිකයින්හට පිළිගත නොහැකි ප්‍රකාශ කිහිපයක් කළේය.
ශ්‍රී ලංකා රජය කිසිදා ජාත්‍යන්තර විමර්ශනයක් සිදු නොකරන බව ජනාධිපතිවරයා ඉතා දැඩිව එම සාකච්ඡාවේ දී ප්‍රකාශ කරයි. මෙම ජනාධිපතිවරයාම, වැඩ බලන ජනාධිපති ලෙස කටයුතු කරද්දී 2022 ජූලි 18 දින ජාතිය අමතා විශේෂ ප්‍රකාශයක් කරමින් කියා සිටියේ පාස්කු ඉරිදා ප්‍රහාරය පිළිබඳ විධිමත් විමර්ශනයක් සිදු නොවීමේ අර්ථය වන්නේ එම කාරණය තවමත් සම්පූර්ණයෙන්ම විසඳී නැති බවයි. එහි දී තව දුරටත් ඔහු කියා සිටියේ පාස්කු ඉරිදා බෝම්බ ප්‍රහාරයේ විමර්ශනවල අසම්පූර්ණ ස්වභාවය නිසා බ්‍රිතාන්‍ය රජයෙන් සහ ඔවුන්ගේ බුද්ධි අංශවලින් ඒ සඳහා අවශ්‍ය සහාය ඉල්ලා සිටින බවයි. වසරක පමණ කාලයක්‌ තුළ ජනාධිපතිවරයාගේ මෙම වෙනස්වීම පෙන්නුම් කරන්නේ, ඔහුගේ වංචනික සහ දෙබිඩි පිළිවෙතයි. තම ස්ථාවරය කෙටි කලකදී මෙසේ වෙනස් කරන්නේ ජනමතයකින් තොර තම බලය රැක ගැනීමේ තණ්හාධික චේතනාවෙන් බව ඉතාම පැහැදිලිය. එවැනි නායකයකු අද කියන දෙය පිළිබඳව මේ රටේ ජනතාව විශ්වාසය තැබිය හැක්කේ කෙසේද?
එම සාකච්ඡාවේ දී ජනාධිපතිවරයා අසත්‍ය ප්‍රකාශ කිහිපයක්ම සිදු කරයි. පාස්කු ඉරිදා ප්‍රහාරය පිළිබඳව ඔහු අති උතුම් කාදිනල් හිමිපාණන් සමඟ ගනු දෙනු නොකරන බවත්, ශ්‍රී ලංකා කතෝලික රදගුරු සමුළුව සමඟ ඔහු සාකච්ඡා කළ බවත් කතෝලික රදගුරු සමුළුව පැමිණ ඔහු සමඟ සාකච්ඡා කළ බවත් ජනාධිපතිවරයා පවසයි. මේ පිළිබඳව ‘ඥානාර්ථ ප්‍රදීපය’ කළ විමසීමක දී කතෝලික රදගුරු සමුළුවේ සභාපති, අතිඋතුම් හැරල්ඩ් ඇන්තනි හිමිපාණන් පැහැදිලිව ප්‍රකාශ කර ඇත්තේ පාස්කු ප්‍රහාරය පිළිබඳව සාකච්ඡා කිරීම සඳහා ජනාධිපතිවරයා කිසි විටෙක කතෝලික රදගුරු සමුළුව හමු නොවූ බවයි. එසේම ඒ සඳහා කතෝලික රදගුරු සමුළුව ද කිසි විටෙක ජනාධිපතිවරයා හමුවීමට නොගිය බව අපි දනිමු. රටේ ජනාධිපතිවරයා, ජාත්‍යන්තර මාධ්‍යයන් හමුවේ මෙසේ සම්පූර්ණ අසත්‍ය ප්‍රකාශ කිරීමෙන් සිදුවන්නේ ඔහුගේ පෞරුෂය සහ කීර්තිනාමය හානියට ලක්වීම පමණක් නොව, ඔහු නියෝජනය කරන රටේ මහජනතාවගේද කීර්ති නාමය විනාශ කිරීමකි.
එසේම, අතිඋතුම් කාදිනල් හිමිපාණන් සහ කතෝලික රදගුරු සමුළුවේ ස්ථාවරය අතර පරස්පරයන් ඇති බව පෙන්වීමට මෙම සාකච්ඡාවේ දී ජනාධිපතිවරයා අසාර්ථක උත්සහයක යෙදෙන බව පැහැදිලිය. එහෙත්, රටේ ජාතික ප්‍රශ්න පිළිබඳව මෙන්ම පාස්කු ඉරිදා ප්‍රහාරය පිළිබඳවද ස්ථාවරය ප්‍රකාශ කරනුයේ සියලු රදගුරු හිමිවරුන්ගේ එකඟත්වයෙන් සාමුහිකව බව අතිඋතුම් හැරල්ඩ් ඇන්තනි පෙරේරා රදගුරු හිමිපාණෝ අප පුවත් පතට පැහැදිලිව පවසා තිබේ.
අතිඋතුම් කාදිනල් හිමිපාණන් ද, කොළඹ අගරදගුරු හිමිපාණන් ලෙස කතෝලික රදගුරු සමුළුවේ සාමාජිකයකු බව ජනාධිපතිවරයා නොදැන සිටියාද නො එසේ නම් ඒ පිළිබඳව දැන දැනත් අප රටේ පුරවැසියන් මෙන්ම ජාත්‍යන්තර ප්‍රජාවද නොමග යැවීමට මෙවැනි අසත්‍ය ප්‍රකාශ සිදු කරන්නේද යන්න විමසිය යුතු කරුණකි.
රටේ ජනාධිපතිවරයා ලෙස, ජාත්‍යන්තර මාධ්‍යයන් හමුවේ කළ සාකච්ඡාවක දී ඔහුගේ හැසිරීමේ ඇති ජුගුප්සාජනක බව වෙනම සාකච්ඡාවට ලක්විය යුත්තකි. ඒ කෙසේ වුවද එම සාකච්ඡාවේ දී ඔහු විසින් කරන ලද අසථ්‍ය සහ නොමග යවන සුළු ප්‍රකාශ මගින් කතෝලික සභාව තුළ බෙදීමක් ඇතැයි පෙන්වීමට ඔහු උත්සාහ දැරුවේ නම් එය විහිළු සහගත, අභූත සහ අසාර්ථක උත්සාහයක් බව අවධාරණය කළ යුතු වෙමු.”
සබැඳි ලිපි :
රනිල්, ලිබරල් ද? ජාතිකවාදී ද? - හැමෝම ඔලුව පොලොවේ ගසා ගන්නේ ඇයි !
ජර්මන් මාධ්‍යවේදියා චැනල් 4 හා රනිල් - (මහාචාර්ය නලින් ද සිල්වා)
ජනපති සහ ජර්මනියේ Deutsche Welle සාකච්ඡාවේ සිංහල පරිවර්තනය මෙන්න
දැන් කවුද ලිබරල්? - (එරන්ද ගිනිගේ)
ඇත්තටම 'හෙලාදැක්ක' උනත් තව ඉවසන්න තිබ්බ....- (ආචාර්ය මහේෂ් හපුගොඩ)
රනිල් හරියට වෙනස් වෙලා.. - (චින්තන ධර්මදාස ගේ වීඩියෝවක්)
රනිල් ජර්මනියේ දී බටහිරට අභියෝග කරයි! - (සුවිශේෂ වීඩියෝවක්)
