ශ්‍රී ලංකාවට වාර්ෂිකව අවශ්‍ය ඉන්ධන ගෙන්වීම සඳහා එක්සත් ජනපද ඩොලර් බිලියන 4.5ත් බිලියන 5ත් අතර මුදලක් වැයවන බවත්, මැදපෙරදිග යුද්ධය අඛණ්ඩව පැවතියහොත් එම මුදල දෙගුණ තෙගුණ විය හැකි බවත් ලංකා ඛනිජ තෙල් නීතිගත සංස්ථාව පවසයි.
මේ සා විශාල මුදලක් වැය කිරීමට සිදුවුවහොත් ඉදිරියේදී ඉන්ධන මිල තවදුරටත් ඉහළ යාහැකි බව ලංකා ඛනිජ තෙල් නීතිගත සංස්ථාවේ සහ ඛනිජතෙල් තොග පර්යන්ත සමාගමේ කළමණාකාර අධ්‍යක්ෂ ආචාර්ය මයුර නෙත්තිකුමාරගේ ප්‍රකාශ කළේය.
ශ්‍රී ලංකාවේ වාර්ෂික ඉන්ධන ආනයන පිරිවැය ඉදිරියේදී දැවැන්ත ලෙස ඉහළ යා හැකි බවට ලංකා ඛනිජ තෙල් නීතිගත සංස්ථාව අනතුරු අඟවයි. වර්තමානයේ පවතින මැදපෙරදිග යුදමය තත්ත්වය මෙලෙසම අඛණ්ඩව පැවතියහොත්, මෙරට ඉන්ධන පාරිභෝගිකයන්ට ඉදිරියේදී ඉහළ මිලක් ගෙවීමට සිදුවනු ඇති බව එම සංස්ථාව පෙන්වා දෙයි.
ලංකා ඛනිජ තෙල් නීතිගත සංස්ථාවේ දත්ත වලට අනුව, ශ්‍රී ලංකාවට වාර්ෂිකව අවශ්‍ය ඉන්ධන ආනයනය කිරීම සඳහා දැනට ඇමෙරිකානු ඩොලර් බිලියන 4.5ත් 5ත් අතර මුදලක් වැය වේ. එහෙත් මැදපෙරදිග කලාපයේ පවතින නොසන්සුන්කාරී තත්ත්වය හේතුවෙන් මෙම වියදම දෙගුණ හෝ තෙගුණ වීමේ අවදානමක් මතුව ඇත.
මේ පිළිබඳව අදහස් දක්වමින් ලංකා ඛනිජ තෙල් නීතිගත සංස්ථාවේ සහ ඛනිජතෙල් තොග පර්යන්ත සමාගමේ කළමණාකාර අධ්‍යක්ෂ ආචාර්ය මයුර නෙත්තිකුමාරගේ මහතා ප්‍රකාශ කර සිටියේ, ඉන්ධන ආනයනය සඳහා මෙවැනි විශාල මුදලක් වැය කිරීමට සිදු වුවහොත් ඉදිරියේදී මෙරට ඉන්ධන මිල තවදුරටත් ඉහළ දැමීමට සිදුවන බවයි.
ලෝක දේශපාලනික තත්ත්වයන් මත මෙරට ආර්ථිකයට එල්ල වන මෙම බලපෑම හමුවේ ඉදිරි කාලසීමාව මෙරට බලශක්ති ක්ෂේත්‍රයට තීරණාත්මක වනු ඇත.
(සටහන | ජේ.මුණසිංහ)
