මාධ්‍ය වෙත අදහස් දක්වමින් එහි කැඳවුම්කරු සසිඳු පෙරේරා කියා සිටියේ, අග්‍රාමාත්‍යවරිය සමග අද (මැයි 18) පැවති සාකච්ඡාවේදී මෙම ඉඩම සහ නිවස විශ්වවිද්‍යාල ප්‍රතිපාදන කොමිෂන් සභාව වෙත පැවරීමට ඇය එකඟවූ බැවින් මෙම තීරණය ගන්නා බව ය.
“අග්‍රාමාත්‍යවරිය පොරොන්දු වෙලා තියෙනවා මල්වානේ ඉඩම ඉදිරියේදී හැකි ඉක්මනින් විශ්වවිද්‍යාල ප්‍රතිපාද කොමිෂන් සභාවට පවරන්න. අපි ඉල්ලපු දේට ආණ්ඩුව පැත්තෙන් ප්‍රතිචාරයක් ලැබිලා තියෙනවා. ඒ ප්‍රතිචාරයත් එක්ක අපි මල්වානේ ඉඩමෙන් මේ මොහොතේ ඉවත් වෙන්න තීරණය කරලා තියෙනවා.”
මල්වානේ පිහිටි අක්කර 16ක භූමිය සහ මන්දිරය වහාම රජය මැදිහත් වී විශ්වවිද්‍යාල පද්ධතියට පවරා දිය යුතු බව පවසමින් විශ්වවිද්‍යාල සිසුන් පිරිසක් එම පරිශ්‍රයට පසුගිය 14 වන දා ඇතුළු වී එය අත්පත්කරගෙන තිබිණි.
මෙම ඉඩම මීට පෙර බැසිල් රාජපක්ෂට අයත් බවට ප්‍රකාශ වුව ද, පසුව අධිකරණ ක්‍රියාවලියේදී එහි හිමිකරුවෙකු ඉදිරිපත් වී නොවීම හේතුවෙන් පසුව අධිකරණ අමාත්‍යාංශයට පවරා ගනු ලැබිණි.
