මෙම ගිවිසුමට අත්සන් තැබීම සිදුව ඇත්තේ රුසියාවේ කසාන් නගරයේ පැවති XVII ජාත්‍යන්තර ආර්ථික සංසදයට සමගාමීවය.
එම සමුළුවට ශ්‍රී ලංකාව නියෝජනය කරමින් ශ්‍රී ලංකා පාර්ලිමේන්තුවේ සභානායක සහ ප්‍රවාහන, මහාමාර්ග හා නාගරික සංවර්ධන අමාත්‍ය බිමල් රත්නායක සහභාගී වී සිටියේය.
දුම්රිය ප්‍රවාහන ක්ෂේත්‍රයේ සංවර්ධනය සඳහා තාක්ෂණික දායකත්වය සහ ආයෝජන සහයෝගීතාව වර්ධනය කිරීමේ අරමුණින්, රුසියානු සමූහාණ්ඩුවේ ප්‍රවාහන අමාත්‍යාංශය සහ ශ්‍රී ලංකාවේ ප්‍රවාහන, මහාමාර්ග හා නාගරික සංවර්ධන අමාත්‍යාංශය අතර මෙම අවබෝධතා ගිවිසුමට අත්සන් තැබිණි.
මෙම අවස්ථාවට රුසියානු සමූහාණ්ඩුවේ ප්‍රවාහන අමාත්‍යාංශයේ රාජ්‍ය ලේකම් සහ නියෝජ්‍ය අමාත්‍ය ඩිමිත්‍රි ස්වෙරෙව් (Dmitry Zverev) එක්ව සිටියේය.
මෙම ගිවිසුම හරහා ලැබෙන ප්‍රතිලාභ
මෙම අවබෝධතා ගිවිසුම හරහා ශ්‍රී ලංකාවේ දුම්රිය ප්‍රවාහන ක්ෂේත්‍රය තුළ පුළුල් වෙනස්කම් රැසක් සිදු කිරීමට අපේක්ෂිතය:
යටිතල පහසුකම් සංවර්ධනය:
දුම්රිය මාර්ග පද්ධති අලුත්වැඩියාව සහ නව ඉදිකිරීම් සිදු කිරීම.
නවීකරණය හා විද්‍යුත්කරණය:
මෙරට දුම්රිය පද්ධතිය නවීන තාක්ෂණයට අනුකූලව විද්‍යුත්කරණය (Electrification) කිරීමට පියවර ගැනීම.
ඩිජිටල්කරණය:
ඩිජිටල් තාක්ෂණය උපයෝගී කරගනිමින් දුම්රිය ධාවන පද්ධති සහ මෙහෙයුම් කාර්යක්ෂම කිරීම.
උපදේශන සේවා හා තාක්ෂණික සහාය:
ක්ෂේත්‍රයේ ප්‍රවීණයන්ගේ උපදේශන සේවාවන් ලංකාවට ලබා දීම.
අමතර කොටස් සහ උපකරණ:
දුම්රිය එන්ජින්, මැදිරි සහ අනෙකුත් අත්‍යවශ්‍ය අමතර කොටස් සඳහා වන සැපයුම් දාමය ශක්තිමත් කිරීම.
මෙම නව තාක්ෂණික දායකත්වය හරහා මෙරට මගී ජනතාවට වඩාත් වේගවත්, ආරක්ෂිත මෙන්ම විශ්වසනීය දුම්රිය සේවාවක් සැපයීමට රජය බලාපොරොත්තු වේ
