නව බදු පනත් සංශෝධනය මගින් සාමාන්‍ය ජනතාව සිරගෙට යැවීමේ සූදානමක් - ෆයිසර් මුස්තාෆා

දණ්ඩනීය අපරාධ බවට පත් කිරීමට රජය ගෙන ඇති තීරණය "දරුණු" (Draconian) පියවරක් බව ජනාධිපති නීතිඥ ෆයිසර් මුස්තාෆා පාර්ලිමේන්තුවේදී අද (19) අවධාරණය කළේය.

අතපසුවීම්වලට හිරේ ලගින්න සිදුවෙයිද? මන්ත්‍රීවරයා පෙන්වා දුන්නේ මීට පෙර දේශීය ආදායම් පනතේ ඇතැම් අංශ යටතේ දණ්ඩනීය ක්‍රියාමාර්ග නොතිබූ බවයි. එහෙත් නව සංශෝධන යටතේ, වාර්ෂික වාර්තාවක් ඉදිරිපත් කිරීමට අපොහොසත් වීම, බදු ගෙවීම සඳහා ලියාපදිංචි වීමට නොහැකි වීම හෝ කොමසාරිස් ජනරාල්වරයා හමුවේ පෙනී සිටීමට අපොහොසත් වීම වැනි කරුණු සඳහා මාස හයක සිරදඬුවමක් සහ රුපියල් ලක්ෂ හතරක දඩයක් නියම කිරීමට යෝජනා කර ඇත.

විශාල සමාගම්වලට මේ කටයුතු නිසි පරිදි සිදු කිරීමට විගණකවරුන් (Auditors) සිටියද, සෑම පුරවැසියෙකුම බදු ලිපිගොනුවක් පවත්වාගෙන යා යුතු බව පවසන පසුබිමක, මෙවැනි නීති මගින් අසරණ වන්නේ සාමාන්‍ය ජනතාව බව ඔහු පෙන්වා දුන්නේය. පරිපාලනමය අතපසුවීමක් සහ බදු පැහැර හැරීමක් යනු කරුණු දෙකක් බවත්, මෙවැනි සුළු අතපසුවීම් සඳහා මහේස්ත්‍රාත් අධිකරණය හමුවේ නඩු පැවරීම සදාචාරාත්මක නොවන බවත් මුස්තාෆා ප්‍රකාශ කළේය.

ශ්‍රේෂ්ඨාධිකරණ තීරණය සහ ව්‍යවස්ථාපිත ගැටලු බදු අභියාචනා මණ්ඩලයක් හමුවේ අභියාචනයක් පවතින අතරතුර පවා මහේස්ත්‍රාත් අධිකරණයේ නඩු පැවරීමට කොමසාරිස්වරයාට බලය ලබා දීමට රජය උත්සාහ කළ බව මන්ත්‍රීවරයා සිහිපත් කළේය. එම පියවර සඳහා තුනෙන් දෙකක බහුතරයක් සහ ජනමත විචාරණයක් අවශ්‍ය බවත් ශ්‍රේෂ්ඨාධිකරණය තීරණය කර තිබූ බව ඔහු පෙන්වා දුන්නේය. රජය ගෙන එන මෙම සංශෝධන මගින් ඔවුන්ගේ 'දරුණු මානසිකත්වය' පෙන්නුම් කරන බව ඔහු වැඩිදුරටත් පැවසීය.

කුඩා ව්‍යාපාරිකයන්ට වද දෙන වැට් (VAT) බද්ද රජය විසින් එකතු කළ අගය මත බද්ද (VAT) සඳහා වන සීමාව (Threshold) මසකට රුපියල් මිලියන 5 සිට මිලියන 3 දක්වා අඩු කිරීම පිළිබඳවද මුස්තාෆා මහතා සිය විරෝධය පළ කළේය,. වැට් බද්ද ගණනය කරන්නේ ලාභය මත නොව පිරිවැටුම (Turnover) මත බැවින්, මෙමගින් කුඩා සිල්ලර කඩ හිමියන් පවා දැඩි දුෂ්කරතාවයට පත්වන බව ඔහු පැහැදිලි කළේය,

අදායම් බදු සහ අනෙකුත් බදු සමග සමස්ත බදු බර 20.5% ක් දක්වා ඉහළ ගොස් ඇති බව පෙන්වා දුන් මන්ත්‍රීවරයා, ජනතාවට සහන දෙන බව පවසා බලයට පත් වූ රජය අද වන විට ජනතාව පිට දරාගත නොහැකි බදු බරක් පටවා ඇති බව පවසා සිටියේය, එබැවින් මෙම දණ්ඩනීය ක්‍රියාමාර්ග සහ බදු සංශෝධන පිළිබඳව නැවත සලකා බලන ලෙස ඔහු රජයෙන් ඉල්ලා සිටියේය.