තමන් එල්ල කළ චෝදනා පදනම් විරහිත බව පිළිගන්නා බව කී ඇය, ආදර්ශා කරඳන නමැත්තිය පෞද්ගලික හේතු මත එල්ල කරන ලද චෝදනා සම්බන්ධයෙන් ආශු මාරසිංහ ට ඇති වූ නින්දා අපහාස ගැන කනගාටු වන බවත් කීවාය.
ආදර්ශා කරඳන නමැති කාන්තාවක් සමඟ එක්ව හිරුණිකා ප්‍රේමචන්ද්‍ර මාධ්‍ය හමුවක් පවත්වමින් තමන්ට අපහාස කිරීම සම්බන්ධයෙන් ආශු මාරසිංහ විසින් හිරුණිකා ප්‍රේමචන්ද්‍ර සහ ආදර්ශා කරඳන වෙත රුපියල් බිලියන 1.5ක වන්දියක් ඉල්ලා එන්තරවාසි යවා නඩු පවරන ලදි.
ඒ අනුව නඩුව ඊයේ (19) සමථයකට පත් කර ගැනීමෙන් දෙපාර්ශ්වය මාධ්‍ය වෙත අදහස් දක්වමින් සිද්ධිය පිළිබඳ පැහැදිලි කිරීමක් සිදු කළහ.
හිටපු පාර්ලිමේන්තු මන්ත්‍රීනි හිරුණිකා ප්‍රේමචන්ද්‍ර,
"2023 දෙසැම්බර් 23 වැනිදා ආදර්ශා කරඳන කියන කාන්තාවක් අපේ සමගි ජන බලවේග කාර්යාලයට ඇවිල්ලා ආශු මාරසිංහ හිටපු පාර්ලිමේන්තු මන්ත්‍රීතුමාගෙන් ලොකු අසාධාරණයක් වුණා කියලා කිව්වා. එදා තමයි පළවෙනි වතාවට ඇයව දැක්කේ. ලොකු අසාධාරණයක් සිද්ධ වුණා කිව්වා. ඇයගේ සුරතල් බලු පැටියාට හිටපු පාර්ලිමේන්තු මන්ත්‍රීවරයා විසින් කරදරයක් කළා කිව්වා. ඒ අනුව ඇය මට සහ මගේ සමගි වනතා බලවේගයේ විධායක කමිටු කාන්තාවන්ට ඇය ගාව තිබුණ වීඩියෝ සාක්කි කියල වීඩියෝ පෙන්නුවා.
ඇයට මාවත් සම්බන්ධ කරගනිමින් සාකච්ඡාවක් තියන්න අවශ්‍යයි කියලා කිව්වා. ඒ අවස්ථාවේ මාධ්‍ය ඇවිල්ලා හිටියා. කාන්තා එකමුතුවක් විදියට කාන්තාවකට වෙන අසාධාරණකම් ගැන නිරන්තරයෙන් කතා කරනවා. මේ කාන්තාවත් ඇය ගාව විශාල සාක්කි ප්‍රමාණයක් තියෙනවා කියලා කිව්වා. පසුව අපි නැවතත් ඇයට කතා කළා මේ කාරණාව සම්බන්ධයෙන් කතා කරන්න කියලා. ඇය අපිව මග ඇරියා. ආශු මාරසිංහ හිටපු පාර්ලිමේන්තු මන්ත්‍රීතුමා ඔහුට අපහාස සිදුවුණ බවට නඩු කටයුත්තකට යොමු වුණා. නඩු කටයුත්ත යන අතරේ මම එතුමා සමඟ සාකච්ඡා කළා. මේ සියලුම වීඩියෝ සහ කාන්තාව ළඟ තිබුණ සියලු තොරතුරු සංස්කරණය කරපු දේවල් කියලා ඔහු මට පැහැදිලි කරලා පෙන්නුවා. ඒ අනුව මට තේරුණා මේ කාන්තාව හුදෙක්ම ආශු මාරසිංහ පාර්ලිමේන්තු මන්ත්‍රීතුමාට පෞද්ගලිකව අපහාස කිරීමට අපිව යොදාගත් බව සහ අපට වැරදි තොරතුරු ලබා දුන්නා කියලා.
ඒ අනුව අප දෙදෙනා සාකච්ඡා කරගෙන නඩු කටයුතු සමථයකට පත් කර ගැනීම සඳහා කතා කරගත්තා. ඒ අනුව කාන්තාවගේ අනුදැනුම ඇතිව තමයි එය විකෘති කර තිබෙන්නේ කියන එක අපි දැනගත්තා. ආශු මාරසිංහ මහතාට සිදුවූ නින්දා අපහාස ගැන මම කනගාටුව ප්‍රකාශ කරමින් සමථයකට පත්වුණා. මේ වෙනකොට අදාළ කාන්තාව හොයාගන්න උත්සාහ කළත් ලංකාවේවත් ඉන්නවද කියලා අපි දන්නේ නැහැ.”
මෙහි දී අදහස් දැක්වූ පහ හිටපු පාර්ලිමේන්තු මන්ත්‍රී ආශු මාරසිංහ,
“අපේ නීති කටයුත්ත නඩුව අවසන් කරන්න තීරණය කළා. මම තමයි පැමිණිල්ල ඉදිරිපත් කළේ. යථා තත්ත්වය අවබෝධ කරගෙන මට සිදු කළ නින්දා අපහාස සියල්ල වෙනුවෙන් එතුමිය කනගාටුව ප්‍රකාශ කරමින් සමථයකට පත් කරන්න අවස්ථාව ලබා ගැනීම ගැන ස්තුතිවන්ත වෙනවා.”
( dinamina| නෙරංජලා වික්‍රමසිංහ)
