සමගි ජන බලවේගයේ මන්ත්‍රී නීතිඥ අජිත් පී. පෙරේරා පාර්ලිමේන්තුවේදී අද ප්‍රකාශ කළේය.
ඔහු මෙසේ පැවසුවේ අධිකරණ අමාත්‍යවරයාට ප්‍රශ්නයක් යොමු කරමිනි.
අජිත් පී. පෙරේරා මෙසේ ද පැවසීය.
'' යුක්තිය පසිඳවීමේ බරපතළ ප්‍රශ්නයක් තියෙනවා. ශ්‍රේෂ්ඨාධිකරණයේ විනිසුරු පුරප්පාඩු පහක් අභියාචනාධිකරණයේ පුරප්පාඩු තුනක් තියෙනවා. මේ පුරප්පාඩු මෙපමණ කාලයක් පවත්වාගෙන යන්න හේතුවක් නෑ. සමහර පුරප්පාඩු මාස හයකටත් වැඩියි.
මේ ප්‍රමාදය නිසා ගෞරවනීය විනිශ්චකාරවරයෙකුට විශ්‍රාම යන්න වුණා. ඒ ගනේපොළ විනිශ්චකාරතුමා. කිසිම සාධාරණ හේතුවක් නෑ. අධිකරණ ඇමතිතුමා ඔබතුමා මේ පුරප්පාඩු පිරවීමට මැදිහත් වෙනවාද කියලා මම අහන්න කැමතියි. මෙතන වගකීම තියෙන්නේ ජනාධිපතිතුමාට. එතුමා මෙම පුරප්පාඩුවලට සුදුස්සන් නිර්දේශ කරන තුරු ව්‍යවස්ථාදායක සභාවට පත් කරන්න බැහැ.
අධිකරණ ඇමති නීතිඥ හර්ෂණ නානායක්කාර: මේ ප්‍රශ්නවලට පිළිතුරු දෙන්න මම බැඳී නැහැ.
විපක්ෂ මන්ත්‍රීවරයෙක්: ලැජ්ජයි. හිරිකිතයි.
අධිකරණ ඇමති: ලැජ්ජා නෙවෙයි. රස්තියාදුකාරයෙක් විදියට ප්‍රශ්න අහන්න එපා.
(මේ අවස්ථාවේදී විපක්ෂයේ මන්ත්‍රීවරුන් කෑකෝ ගැසීමෙන් සභාවේ උණුසුම් තත්ත්වයක් ඇති විය.)
( lankalokaya | අසේල පෙරේරා)
