සාමාන්‍යයෙන් මුළු රටම විදුලි ආලෝකයෙන් ඒකාලෝක වන වෙසක් සතියක් වෙනුවට, අර්බුදකාරී වටපිටාව තුළ වඩාත් කළමනාකරණය කළ සහ ආකෘතිමය වෙනස්කම් සහිත උත්සව සංස්කෘතියක් නිර්මාණය කිරීම කෙරෙහි රජයේ අවධානය යොමුව ඇත.
ඊයේ (20) අරලියගහ මන්දිරයේ දී අග්‍රාමාත්‍ය ලේකම් ප්‍රදීප් සපුතන්ත්‍රී ගේ ප්‍රධානත්වයෙන් පැවති විශේෂ සාකච්ඡාවේ දී බුද්ධ රෂ්මි වෙසක් කලාපයේ සංවිධාන කටයුතු සහ වෙසක් කලාපය පැවැත්වෙන කාලය තුළ බලශක්ති භාවිතය පිළිබඳ අවධානය යොමුවිය.
ඒ අනුව ඉන්ධන හා විදුලිය භාවිතා කිරීම සඳහා රජය මඟින් පනවා තිබූ රෙගුලාසි වෙසක් උත්සවය වෙනුවෙන් ලිහිල් කිරීම පිළිබඳව දැනුවත් කළ අතර, වෙසක් කලාපයේ කටයුතු සාර්ථකව සංවිධානය කිරීම සහ සම්බන්ධීකරණය කිරීම උදෙසා පත්කළ කමිටුවල නිලධාරීන්ගේ තොරතුරු ලබා ගැනීම ද සිදුකර තිබුණි.
පවතින අර්බුදය හේතුවෙන් පෙර වසරවලට සාපේක්ෂව ඉන්ධන සහ විදුලිය අරපිරිමැස්මෙන් භාවිත කිරීමට මෙවර තීරණය කර ඇත.
ඒ අනුව අවම ඉන්ධන හා විදුලි පිරිවැයක් සහිතව ප්‍රතිපත්ති පූජාවට මුල්තැන දෙමින් ආමිස පූජාවෙන් සැදැහැවතුන්ගේ සිත්පහන් කරවන පරිදි වෙසක් අසිරියෙන් අලංකාර කිරීමට බුද්ධ රෂ්මි වෙසක් කලාපය තුළ කටයුතු කර තිබෙන බවත්, මෙවර වෙසක් කලාපය රාත්‍රී 7 සිට මධ්‍යම රාත්‍රී 12.30 දක්වා පැවැත්වීමට කටයුතු කරන බවත් කොළඹ ගංගාරාම විහාරාධිපති ආචාර්ය පූජ්‍ය කිරින්දේ අස්සජි ස්වාමීන් වහන්සේ පැවසූහ.
මෙම අවස්ථාවට ගංගාරාම විහාරාධිපති ආචාර්ය පූජ්‍ය කිරින්දේ අස්සජි හිමි, ත්‍රිවිධ හමුදාව, ශ්‍රී ලංකා පොලිසිය, සිවිල් ආරක්ෂක සේවා දෙපාර්තමේන්තුව, බන්ධනාගාර දෙපාර්තමේන්තුව හා බලශක්ති අමාත්‍යාංශය, ආරක්ෂක අමාත්‍යාංශය නියෝජනය කරන නිලධාරීන් පිරිසක් සහභාගී වූහ.
ඉන්ධන සහ විදුලි අර්බුදය හමුවේ වෙසක් කලාප සහ තොරණ අදාල සීමාකිරීම්
කාල සීමාවන් පැනවීම:
පෙර වසරවල අලුයම වනතුරු විවෘතව තිබූ වෙසක් කලාප සහ තොරණ, විදුලිය පිරිමැසීම සඳහා රාත්‍රී 12.30 හෝ 1.00 වන විට නිවා දැමීම.
LED තාක්ෂණය භාවිතය:
අධික විදුලි පාරිභෝජනයක් සහිත සාම්ප්‍රදායික බල්බ වෙනුවට, අවම විදුලියක් වැයවන LED බල්බ සහ සූර්ය බලශක්තිය (Solar Power) භාවිතයෙන් තොරණ සහ ආලෝක කූඩු සැරසිලි කිරීම.
ජනක යන්ත්‍ර (Generators) භාවිතය සීමා වීම:
ඉන්ධන හිඟය සහ මිල ඉහළ යාම නිසා විශාල ජනක යන්ත්‍ර ක්‍රියාත්මක කිරීම අසීරු වූ බැවින්, ප්‍රධාන පෙළේ වෙසක් කලාප පවා සරල ආලෝකකරණ ක්‍රමවේදයන්ට මාරු වීම.
