දිවිපිදු හමුදා සාමාජිකයින්ට සහ ‘දිට්වා’ සුළි කුණාටුව හේතුවෙන් ජීවිත අහිමි වූ ශ්‍රී ලාංකිකයන්ට ජීවමාන උපහාරයක් ලෙස මෙම වැඩසටහන ක්‍රියාත්මක කෙරේ.
පාරිසරික හානිය ප්‍රතිස්ථාපනය කිරීම සහ “ක්ලීන් ශ්‍රී ලංකා” ජාතික මෙහෙවරේ අරමුණු සාර්ථක කරගැනීමද මෙම වැඩසටහනේ අරමුණ බව යුද්ධ හමුදාව සඳහන් කරයි.
වැඩසටහනේ සමාරම්භක උත්සවය අද කුරුණෑගල, ගනේවත්ත ඔසු උයනේදී පැවැත්වීමට නියමිත අතර එහි ප්‍රධාන ආරාධිතයා ලෙස යුද්ධ හමුදාධිපති ලුතිනන් ජනරාල් ලසන්ත රුද්‍රිගෝ සහභාගී වීමට නියමිතය.
එහිදී පැළ 300ක් රෝපණය කිරීමට සැලසුම් කර ඇති අතර එය දිවයින පුරා ක්‍රියාත්මක වන වැඩසටහනේ සංකේතාත්මක ආරම්භය ලෙස සැලකේ.
මෙම රුක් රෝපණ වැඩසටහන මැයි 22 සිට ජුනි 04 දක්වා ආරක්‍ෂක සේනා මූලස්ථාන යටතේ දිස්ත්‍රික්ක රැසක් ආවරණය කරමින් ක්‍රියාත්මක කිරීමට නියමිතය.
ස්වාභාවික ව්‍යසනවලින් තොර, හරිතවත් හා සෞභාග්‍යයෙන් පිරි පරිසරයක් මතු පරපුරට උරුම කර දීම මෙම හරිත මෙහෙයුමේ ප්‍රධාන අරමුණ බවද යුද්ධ හමුදාව පවසයි.
මෙම වැඩසටහන සාර්ථක කර ගැනීම සඳහා රාජ්‍ය නිලධාරීන්, විශ්වවිද්‍යාල හා පාසල් සිසුන් මෙන්ම සිවිල් ජනතාවගේ සහයෝගයද අපේක්ෂා කරන බව ශ්‍රී ලංකා යුද්ධ හමුදාව වැඩිදුරටත් සඳහන් කරයි.
(සටහන | ගිම්හාන් ද සිල්වා)
