රුපියල අවප්‍රමාණය වීම ඇතුළු ආර්ථිකයේ වත්මන් තත්වය පිළිබඳ පෙරටුගාමී සමාජවාදී පක්ෂය කැඳවූ විශේෂ මාධ්‍ය සාකච්ඡාවක් අද ( 22 ) නුගේගොඩ පිහිටි පක්ෂ කාර්‍යාලයේදී පැවැත්විණි.
එහිදී අදහස් දැක්වූ පෙරටුගාමී සමාජවාදී පක්ෂයේ අධ්‍යාපන ලේකම් පුබුදු ජයගොඩ,
''අපි දැක්කා පසුගිය දවසේ ජනාධිපතිවරයා ප්‍රකාශ කරනවා රුපියල අවප්‍රමාණය වෙන්න හේතුව ඇමරිකානු ඩොලරය ශක්තිමත් වීම කියලා. මැදපෙරදිග යුදමය තත්වයත් එක්ක ඩොලරයේ ඉල්ලුම ඉහළ යාම මේකට හේතුව විදිහට ආණ්ඩුව පැත්තෙන් පෙන්නනවා. නමුත් ආණ්ඩුව මේ කියන කරුණු සම්පූර්ණයෙන් වැරදියි. මොකද 2023 ජුනි වෙනකොට තිබුණු වටිනාකමටත් වඩා ඩොලරය මේ වෙද්දි තියෙන්නේ අඩු වටිනාකමක.
අනිත් කාරණය තමයි සමස්ත ලෝකයේම සංචිත වලින් 2001අවුරුද්ද වෙනකොට 72%ක් පමණ තිබුණු ඩොලර් ප්‍රමාණය 2025 අවුරුද්ද වෙනකොට 58% දක්වා පහළ වැටිලා ඉවරයි. අනිත් කාරණය තමයි ඉරානයට එරෙහිව ඇමරිකාව සහ ඊශ්‍රායලය එක්ව ආරම්භ කරපු අධිරාජ්‍යවාදී යුද්ධයන් පස්සේ හෝමුස් සමුද්‍ර සන්ධිය හරහා වෙන වෙළඳාම් පවා වෙන්නේ යුවාන් සහ රූබල් කියන මුදල් ඒකක මත. අනිත් පැත්තෙන් බ්‍රික්ස් රටවල මැදිහවීමක් ඩොලරයට විශාල තර්ජනයක් වෙලා තියනවා. ඒක නිසා ලංකාවේ රුපියල අවප්‍රමාණය වීමට හේතුව ඇමරිකානු ඩොලරය ශක්තිමත් වීම කියලා ආණ්ඩුව කියන කරුණු වැරදියි කියලා හොඳටම පැහැදිලියි.
ජාත්‍යන්තර මූල්‍ය අරමුදලේ ආර්ථික ප්‍රතිපත්තිය කරගහගෙන ආණ්ඩුව මේ යන ගමන නිසා ඉදිරියේදී ලංකාවේ ආර්ථිකය විශාල අර්බුදයකට යන්න නියමිතයි කියලා අපි ආණ්ඩුවට අනතුරු හැඟව්වේ මීට අවුරුද්දකට කලින් ඉඳලා. හැබැයි ආණ්ඩුව ඒ වෙලාවේ නෑ නෑ අපි දන්නවා කරන විදිහ කියලා පරණ පුරුදු නවලිබරල් වැඩපිළිවෙළේම ගියා. දැන් මේ භුක්ති විඳින්න වෙලා තියෙන්නේ ඒ අත්තනෝමතික තීරණවල ප්‍රතිඵල තමයි. වාහන ආනයන සීමා ලිහිල් කරන්න එපා එහෙම කළොත් ඩොලර් බිලියන 2ක විතර විදේශ විනිමය සංචිත ප්‍රමාණයක් අපිට අහිමි වෙනවා කියලා පෙරටුගාමී සමාජවාදී පක්ෂය විදිහට අපි 2024 අවුරුද්දේ දෙසැම්බර් 20 මාධ්‍ය හමුවකදී පැහැදිලි කළා.
නමුත් ඒවා අහන්නැතුව ආණ්ඩුව වාහන ගෙන්වන්න තීරණය කරපු එකෙන් දැන් අපේ විදේශ විනිමය සංචිත වලින් ඩොලර් බිලියන 2.4ක් අහිමි වෙලා ඉවරයි. අශ්වයා පැනලා ගියාට පස්සේ ඉස්තාලය වහනවා වගේ දැනුයි ආණ්ඩුවට වාහන ආනයනය සීමා කරන්න මතක් වෙලා තියෙන්නේ. මේ ගෙන්නපු වාහන වලිනුත් බස් තියෙන්නේ 700ක් වගේ ප්‍රමාණයක් ඉතුරු වාහන ලක්ෂ තුනක් විතර තියෙන්නේ පෞදගලික පරිහරණයට ගෙන්නපු වාහන. මේවගෙන් වැඩි ප්‍රමාණයක් තියෙන්නේ අධි සුඛෝපභෝගී වාහන. ඒවට විශාල ඉන්ධන ප්‍රමාණයක් වැය වෙනවා. ඒ නිසා රටේ ඉන්ධන පරිභෝජනයත් මේ වෙද්දි ඉහල ගිහිල්ලා තියෙන්නේ.
දැන් අනිල් ජයන්ත ඇමතිවරයා ඇවිල්ලා කියනවා ඩොලරයේ මිල ඉහළ යාම අපිට වාසියි කියලා. හැබැයි ඔහුට අමතක වෙලා ඒ වාසිය ලැබෙන්නේ අපනයන කර්මාන්ත හිමියන්ට කියන එක. හැබැයි ඒකෙන් අර ගාමන්ට් එකේ වැඩ කරන ආණ්ඩුවට ඡන්දෙ දීපු ඇඟළුම් කර්මාන්ත සේවිකාවන්ගේ ආදායම එක රුපියලකින් වැඩි වෙන්නේ නැහැ. කම්පැනි කාරයෝ ටිකක් ලාභ හොයන එක විතරයි මේකෙන් වෙන්නේ.
දැන් ආණ්ඩුව මේ ප්‍රශ්නේ යට ගහන්න පාවිච්චි කරන්නේ ඉන්දියාව. ඉන්දියානු රුපියලත් පහළ වැටිලා තියෙන්නේ ඇයි අපේ වුණාම මොකද වගේ කතා කියලා ආණ්ඩුව මේක යට ගහන්න ලෑස්ති වෙනවා. ආණ්ඩුව හිතාගෙන ඉන්නේ ඉන්දියාව ස්වර්ග රාජ්‍ය කියලද දන්නේ නැහැ. ඉන්දියාවේ ඉන්නේ කෝටිපතියන්ට සාපේක්ෂව අතිවිශාල දිළිඳු ජනතාවක් ඉන්දියාවේ ඉන්නවා. ඉන්දියාව ආර්ථික බලවතෙක් වුණාට ඒ රටේ ජනතාවගේ ජීවිත තියෙන්නේ විශාල අර්බුදයක. ඒ නිසා ආණ්ඩුව ඉන්දියාව පෙන්නලා බේරෙන්න යනව නම් ඒක වැරදියි.
අපි මේ ප්‍රශ්නේ එනකොටම ආණ්ඩුවට විසඳුම් කිහිපයක් යෝජනා කලා. අපි ආණ්ඩුවට අනතුරු හැඟව්වා වාහන ආනයන සීමා ලිහිල් කරන්න එපා එහෙම වුණොත් ඒක ආර්ථිකයට විශාල බලපෑමක් කරනවා කියලා. ඊලගට අපි කිව්වා මැදපෙරදිග යුද්ධය එක්ක ඉන්ධන අර්බුදයක් එන්න පුලුවන් ඒ නිසා වහාම අපේ රටට අවශ්‍ය ඉන්ධන සංචිත ගබඩා කරගන්න පියවර ගමු කියලා. අන්ති පැත්තෙන් පළවෙනි දෙවෙනි ගල් අඟුරු නැව් ෆේල් වෙනකොටම අපි කිව්වා ඉදිරියේදී බලශක්ති අර්බුදයක් ඇතිවෙන්න නියම්තයි ඒ නිසා ඉක්මනින් ටෙන්ඩරය අවලංගු කරලා ප්‍රමිතියෙන් යුතු ගල් අඟුරු ගෙන්වන්න වැඩක් හදන්න කියලා. මේ කියපු කිසි දෙයක් ගණං නොගෙන ඉඳලා දැන් ආණ්ඩුව අපි මොනවා කරන්නද වගේ කතා කියලා මේ ප්‍රශ්නෙන් ගැලවෙන්න තමයි ලෑස්ති වෙන්නේ.
රුපියල බාල්දු වීමට හේතුව විදිහට ආණ්ඩුව මේ පෙන්නන්නේ උඩින් තියෙන තාක්ෂණික ප්‍රශ්න ටික විතරයි. ඇත්ත ප්‍රශ්නය තියෙන්නේ අපේ ආර්ථික පදනම ඇතුලේ. පසුගිය කාලේ අත්තනෝමතික විදිහට ආණ්ඩු ගත්ත ණය නිසා දැන් අපි ඉන්නේ ආර්ථික උගුලක හිරවෙලා. අපේ විදෙස් ණය ප්‍රමාණය අපිට ගෙවාගන්න බැරි තරම් ඉහළ ගිහිල්ලා.
මෙන්න මේ තත්වය තේරුම් අරගෙන ආණ්ඩුව දැන්වත් ආනයන සීමා කිරීමකට යන්න ඕන. ඊට සාපේක්ෂව දේශීය නිශ්පාදන දියුණු කරන්න කඩිනම් පියවරක් ගන්න වෙනවා. අපි මේ ණය උගුලක හිර වෙලා ඉන්න නිසා තමයි ලෝකෙ වෙන රටවලට කිඹුහුමක් ගියත් අපිට නියුමෝනියාව හැදෙන්නේ. ඒ තත්වය නවත්වන්න නම් මේ ණය උගුලෙන් ගැලවෙන්න අවශ්‍ය ප්‍රතිපත්තියමය තීරණ වහාම ගන්න ඕන. ඒක කරන්න තමයි ආණ්ඩුවට ජනවරමක් ලැබුණේ.
මේ හැම තත්වයක් එක්කම අපිට පේන්න තියෙන දේ තමයි ආණ්ඩුව මේ යන පාර වෙනස් නොකලොත් රටක් විදිහට අපි ඉදිරියේදී විශාල අර්බුදයකට යන්න නියමිතයි කියන කාරණය. ඒ නිසා අපි ආණ්ඩුවට මතක් කරනවා දැන්වත් ධනපතියන් අතළොස්සක් පිනවමින් මේ ගෙනියන ජනතාද්‍රෝහී ආර්ථික වැඩපිළිවෙළෙන් ඉවත් වෙලා විකල්ප ආර්ථික වැඩපිළිවෙළක් ක්‍රියාත්මක කරන්න කියලා. මොකද ආණ්ඩුවට ඡන්දය දුන්නු මිනිස්සුන්ගේ ජීවිත අර්බුදයට ඇදලා දාන්න ආණ්ඩුවට කිසිම සදාචාරාත්මක අයිතියක් නැහැ.
අනිත් එක අර්බුදය ලෝක මට්ටමින් මතුවෙනවා කියලා ඒකෙන් ගැලවෙන්න ආණ්ඩුවට බැහැ. මොකද ජනතාව ආණ්ඩුවට ඡන්දය දුන්නේ ලෝක මට්ටමින් ආවත් දේශීයව ආවත් ඕනෑම අර්බුදයකට ප්‍රතිපත්තියමය විසඳුම් හොයන්න. පිටරට වෙන දේවල් දිහා බලලා අපේ රටේ භාණ්ඩවල මිල වැඩි කරන්න නම් ජනාධිපතිවරයෙක් මොකටද කියලා ඒ කාලේ ඇහුවේ දැන් ඉන්න ජනාධිපති අනුරදිසානායකම තමයි. අපි කියනවා ඔහුගෙනුත් ජනතාව ඔය ප්‍රශ්නයම අහන්න කලින් වහාම ජනතාවාදී ආර්ථික ක්‍රියාවලියකට යන්න කියලා."
