හදිසි අනතුරකින් රාජ්‍ය අමාත්‍ය සනත් නිශාන්ත මිය යෑම හේතුවෙන්, ඔහුගෙන් අනතුරුව හිස් වුණ පාර්ලිමේන්තු මන්ත්‍රී අසුන සඳහා ජගත් ප්‍රියංකර පත් වීමට නියමිතය.
ඒ සනත් නිශාන්ත පාර්ලිමේන්තුවට තේරී පත් වූ මැතිවරණයේ පුත්තලම් දිස්ත්‍රික්කයේ ශ්‍රී ලංකා පොදුජන පෙරමුණට අදාළ මනාප ලැයිස්තුවේ තේරී පත් නොවූ අපේක්ෂයන්ගේ වැඩිම මනාප සංඛ්‍යාව ඔහුට හිමි වීම හේතුවෙනි.
එම මැතිවරණයේ ශ්‍රී ලංකා පොදුජන පෙරමුණ නියෝජනය කරමින් වැඩි ම මනාප සංඛ්‍යාවක් ලබාගෙන එම දිස්ත්‍රික්කයේ පළමු වැනියා වීමට සනත් නිශාන්තට හැකි වූ අතර ඔහු ලබා ගත් මනාප සංඛ්‍යාව 80,082කි.
එම ලැයිස්තුවේ හයවැනි ස්ථානය ජගත් ප්‍රියංකර විසින් හිමිකර ගත් අතර ඔහු ලබා ගත් මනාප සංඛ්‍යාව 40,527කි.
ඔහු විමල් විරවංශ ගේ ජාතික නිදහස් පෙරමුණේ නියෝජිතයෙකි. ඒ අනුව පාර්ලිමේන්තුවේ ජාතික නිදහස් පෙරමුණේ මන්ත්‍රීවරු ගණන 07 දක්වා ඉහල යයි.
ඊයේ (27) රාත්‍රියේ දක්ෂිණ අධිවේගී මාර්ගයේ සිදු වූ රිය අනතුරකින් රාජ්‍ය අමාත්‍ය සනත් නිශාන්ත ජීවිතක්ෂයට පත් විය.
1975 මැයි මස 03 වැනි දා හලාවත දී උපත ලබන සනත් නිශාන්ත පෙරේරාට වැඩිමහලු සහෝදරියක් සහ සහෝදරයන් තිදෙනෙකු සිටින බව වාර්තා වේ.
ඒ අතරින් එක් සහෝදරයෙකු මේ වන විට මිය ගොස් ඇත.
සනත් නිශාන්ත හලාවත ශාන්ත මරියා පිරිමි විද්‍යාලයේ ආදි සිසු‍වෙකි.
1997 වසරේ දී ආරච්චිකට්ටුව ප්රාදේශීය සභාවට ශ්‍රී ලංකා නිදහස් පක්ෂයෙන් තරග කළත් ඔහුට ජයග්‍රහණය කිරීමට නොහැකි විය.
එම ප්රාදේශීය සභා මැතිවරණය ජයග්‍රහණය කර සභාපතිවරයා බවට පත්වූ සරත් හේමචන්ද්‍ර ගේ ඝාතනයෙන් අනතුරුව සනත් නිශාන්තට ආරච්චිකට්ටුව ප්රාදේශීය සභාවේ සභිකයෙකු ලෙස කටයුතු කරන්නට හැකියාව ලැබිණි.
2004 වසරේ පැවති වයඹ පළාත් සභා මැතිවරණයට ඉදිරිපත් වී ජයග්‍රහණය කරන ඔහු 2009 වසරේ පැවති පළාත් සභා මැතිවරණයෙන් ද ජයග්‍රහණය ලැබුවේ ය.
2010 මැයි මස 31 වැනි දා වයඹ පළාත් සභාවේ ධීවර, මහා මාර්ග, විදුලි බල අමාත්‍යවරයා ලෙස ද ඔහු පත් විය.
අනතුරු ව පැවති වයඹ පළාත් සභා මැතිවරණයේ දී මනාප ඡන්ද 62,996ක් ලබා පුත්තලම දිස්ත්‍රික්කයේ ප්‍රථමයා බවට හෙතෙම පත් වී නැවත පෙර අමාත්‍ය ධුරයටම පත් විය.
එම පළාත් සභාවේ දී එක් අවස්ථාවක වැඩ බලන ප්‍රධාන අමාත්‍ය ධුරය දැරීමට ද ඔහුට හැකි විය.
2015 පැවති පාර්ලිමේන්තු මැතිවරණයට ඉදිරිපත් වී සනත් නිශාන්ත පාර්ලිමේන්තුවට තේරී පත් විය.
ගෝඨාභය රාජපක්ෂ ජනාධිපති ධුරයට පත්වීමෙන් අනතුරුව ධීවර රාජ්‍ය අමාත්‍ය ධුරයට පත් වන අතර, අනතුරුව පැවති පාර්ලිමේන්තු මැතිවරණයේ දී පුත්තලම දිස්ත්‍රික්කයෙන් වැඩිම මනාප ප්‍රමාණයක් ලබා ගත් අපේක්ෂකයා බවට ද පත් විය.
මිය යන විට ඔහු වත්මන් රජයේ ග්‍රාමීය ජල සම්පාදන රාජ්‍ය ඇමතිවරයා ලෙස කටයුතු කරමින් සිටියේ ය.
ඊයේ (24) රාත්‍රියේ හලාවත - බණ්ඩාරවත්ත ප්‍රදේශයේ හෝටලයක පැවති විවාහ මංගල සාදයකට සහභාගි වී ආපසු කොළඹ බලා යමින් සිටින අතරතුර කටුනායක - කොළඹ අධිවේගී මාර්ගයේ දී සනත් නිශාන්ත ගමන් කරමින් තිබූ සුඛෝපභෝගී ජීප් රථය ඉදිරියෙන් ගමන් කරමින් තිබූ කන්ටේනර් රථයක පසුපස ගැටීමෙන් අනතුර සිදු වී තිබිණි.
නීතිඥ චමරි පෙරේරා සමඟ විවාහ වී සිටින සනත් නිශාන්ත දියණියන් තිදෙනෙකුගේ සහ එක් පුතෙකුගේ පියෙකි.
(උපුටා ගැනීම් - adaderana.lk)
