ශ්‍රී ලංකා පෝෂණ විශේෂඥ වෛද්‍යවරුන්ගේ විද්‍යාතනයේ යෝජනාවකට අනුව, සෞඛ්‍ය අමාත්‍යංශයේ මැදිහත් වීම ද සහිතව වෙනත් බාහිර
පාර්ශ්වවල ආධාර සහ අන්‍රගහය මත ක්‍රියාත්මක කිරීමට බලාපොරොත්තු වන රෝහල්ගත නේවාසික රෝගින් හට ගුණාත්මක සහ රසවත් ආහාර වේලක් ලබා දීමේ ව්‍යාපෘතිය සෞඛ්‍ය අමාත්‍යංශ ලේකම්වරයාගේ ප්‍රධානත්වයෙන් පසු ගිය 28වන (2024/06/28) දින ආරම්භ කෙරිණ.
රෝහල්ගත නේවාසික රෝගින් හට ගුණාත්මක සහ රසවත් ආහාර වේලක් ලබා දීමේ ව්‍යාපෘතිය සෞඛ්‍ය අමාත්‍යංශ ලේකම්වරයාගේ ප්‍රධානත්වයෙන් 2024/06/28 දින ආරම්භ කෙරිණ.
එම අවස්ථාවට සහභාගි වීමෙන් අනතුරුව ශ්‍රී ලංකා පෝෂණ විශේෂඥ වෛද්‍යවරුන්ගේ විද්‍යාතනයේ සභාපති වෛද්‍ය තිමති වික්‍රමසේකර අදාළ ව්‍යාපෘතිය පිළිබඳව පැහැදිලි කළේ ය.
මතු දැක්වෙන්නේ එහි සංක්ෂිප්ත සටහනකි.
විශේෂඥ වෛද්‍ය තිමති වීරසේකර
කිසියම් රෝගයක් වැලඳී හෝ හදිසි අනතුරකට ලක්වූ පුද්ගලයකු රෝහල් ගත වූ පසු එම පුද්ගලයා වෙත රොහලෙන් ලබා දෙන ආහාර වේල සම්බන්ධයෙන් අදාළ රෝගියා තෘප්තිමත් ද නැද්ද යන්න කිසිවකු නොවිමසති. අදාළ රෝගියා ද ඒ සම්බන්ධයෙන් නොවිමසති. දැනට පවතින ක්‍රමය අනුව සිදුවන්නේ රෝහලෙන් ලබා දෙන ඕනැම ආකාරයේ ආහාරයකින් තම කුස පුරවා ගැනීම ය. නමුදු එය සිදුවිය යුත්තේ එසේ නොවේ ය යන්න අපගේ අදහස ය.
මේ වන විට රෝගියාගේ සෞඛ්‍ය තත්ත්වය අනුව සැකසූ ආහාර වේලක් අදාළ රෝගියාට ලැබෙන බව අප පිළිගත යුතු ය. නමුදු බොහෝ විට රෝගියාගේ කැමැත්ත අනුව ඔහුට හෝ ඇයට ආහාර වේලක් ලබාගැනීම අසිරු ය; අසීරු නොව එය සිදුවන්නේ ම නැත. මෙහි දී මෙම කාරණය පමණක් සලකා බැලීමෙන් සෑහිමකට පත් විය නොහැකි ය; මෙය ඊට වඩා සංකිර්ණ ගැටලුවකි.
මේ සම්බන්ධයෙන් සලකා බැලීමේ දී රොහල් පරිශ්‍රවල පිහිටි මුළුතැන්ගෙය පිළිබඳ පළමුවෙන් ම අවධානය යොමු කළ යුතු යැයි අපි අදහස් කරන්නෙමු. දිවයිනේ පිහිටි බොහෝ රෝහල්වල මුළුතැන්ගෙය යනු කිසිදු ආකාරයකින් නවීනකරණය නොවූ අංශයකි.
වර්තමාන මුළුතැන්ගෙදර සේවක සේවිකාවෝ
මේ සඳහා බලපාන ප්‍රධාන කරුණ වන්නේ රෝහල්වල පිහිටි මුළුතැන්ගෙයි සේවය කිරීම සඳහා බොහෝ සේවක සේවිකාවෝ දක්වන අකමැත්ත ය. බොහෝ විට දිවයිනේ පිහිටි බොහෝ රෝහල්වල මුළුතැන්ගෙයි සේවය සඳහා යොදවන්නේ කිසියම් විනයානුකුල දඬුවමකට ලක් වු පුද්ගලයෝ ය. ඊට හේතුව ලෙස දක්නට ලැබෙන්නේ රෝහලෙහි මුළුතැන්ගෙයි සේවය කරනවා යැයි පිටත පුද්ගලයන් සමග පැවසීමට කිසිවකු අකමැති බැවිනි. තවත් සරලව පවසන්නේ නම් අප එම සේවක සේවිකාවන් හට වෘත්තීය ගෞරවයක් ලබා දීමට ක්‍රියා කර නොමැති බැවිනි.
නවීකරණය කළ මුළුතැන් ගෙයක්
මෙම කරුණු සලකා බලමින් පළමුවෙන් ම උත්සාහ කරන්නේ රෝහල්වල පිහිටි මුළුතැන් ගෙවල් සියල්ල පියවරෙන් පියවර නවීකරණය කිරීම සඳහා කටයුතු කිරීම ය. එය දැනට පවතින ගෑස් උදුන වෙනුවට වාෂ්ප (steam) බලයෙන් ක්‍රියාත්මක කළ හැකි උදුන්ලබාදීම ය; මේ හා සමාන වන ලෙස අනෙකුත් පැරණි උපකරණ ඉවත් කර නවීනතම උපකරණ ලබා දීම ය.
සේවක සේවිකාවන්ට වෘත්තීය පුහුණුවක්
අපගේ දෙවන පියවර වන්නේ රෝහල්වල මුළුතැන් ගෙවල්වල සේවයේ නියුතුසේවක සේවිකාවන් හට වෘත්තීය පුහුණුවක් ලබා දීම ය. මේ සඳහා දැනටමත් අප ආයතනය දිවයිනේ පිහිටි විවිධ මට්මමේ හෝටල් කිහිපයක් සමග ම සාකච්ඡාකර ඇත. මෙම පුහුණුවෙන් ඉක්බිති එම සේවක සේවිකාවන් වෘත්තීය කෝකියන් සහ කෝකිවරියන් ලෙස පිළිගැනෙන ආකාරයට සහතිකයක් කිරීමට ද කටයුතු යොදනු ඇත. මෙම ක්‍රියාවලිය හේතුවෙන් අවශ්‍ය නම් එම සේවක සේවිකාවන්ට අනාගතයේ දිනෙක විදේශගත රැකියාවක වුව ද නිරත විය හැකි ය.
‘කුස්සිය’ වෙනුවට වෙනත් නමක්
තෙවන පියවර ලෙස අප බලාපොරොත්තු වන්නේ ‘කුස්සිය’හෙවත් ‘kitchen’ යන නාමය වෙනුවට එහි නම ආහාර පාන දෙපාර්තමේන්තුව (Food and Beverages Department) ලෙස වෙනස් කිරීම ය. එවිට රෝහලේ මුළුතැන්ගෙයි සේවය කරන සේවක සේවිකාවන් ද අනෙක් සේවක සේවිකාවන් මෙන් ම රෝහලේ වෙනත් දෙපාර්තමේන්තුවක සේවක සේවිකාවන් ලෙස සැලකීම ස්වයංක්‍රීයව ම සිදුවනු ඇත.
ප්‍රිය මනාප පිඟානක්
අපගේ ඊළඟපියවර වන්නේ තනි පිඟානකට හොදි, එළවළු. මාළු, මස් යනාදිය බෙදූ ආහාර පිඟානක් වෙනුවට: බත්, එළවළු, මස් හෝ මාළු යනාදිය වෙන වෙන ම බෙදා තිබෙන පිඟානක (Customise Plate) අදාළ ආහාර වේල පිරිනැමීම ය. එබඳු පිඟානකට බෙදූ ආහාර වේලක් දුටු සැණින් ප්‍රියතාවක් ඇති වන බව නොඅනුමාන ය.
රෝගී පුද්ගලයාගේ රුචිකත්වයට මූලිකත්වය
අපගේ ව්‍යෘපෘතිය තුළින් මෙම වෙනස්කම් කිහිපය හැකි ඉක්මනින් ම ක්‍රියාත්මක කිරීමට බලාපොරොත්තු වන අතර මෙහි දී ආහාර පාන සඳහා වැය කිරීමට සිදුවන අමතර වියදම සෞඛ්‍ය අමාත්‍යංශයෙනි. අනෙකුත් නවීන උපකරණ සඳහා වැයවන මුදල පරිත්‍යාගශීලීන් වෙතින් ලබා ගැනීමට බලාපොරොත්තු වේ. මෙහි දී මහරගම අපේක්ෂා රෝහලේ කටයුතු සඳහා වැයවන සම්පූර්ණ මුදල රුහුණු කතරගම මහා දේවාල අරමුදලෙන් සැපයෙන අතර අනෙක් රෝහල් සඳහා වෙනත් ක්‍රමයක් සැලසුම් කර ඇත.
