ශ්රම සුරක්ෂිතතාව සහ රැකියා ප්රවර්ධනය වෙනුවෙන් ද්විපාර්ශ්වික ගිවිසුම් දෙකක් අත්සන් කිරීමට සූදානම්
සංචාරක සහ ආර්ථික සබඳතා පුළුල් කරගැනීමට බැංකොක් නුවරදී ඉහළ පෙළේ සාකච්ඡා
කොළඹ සහ බැංකොක් අතර ශ්රම ගිවිසුම්
ශ්රී ලංකාව සහ තායිලන්තය අතර ආර්ථික, සංචාරක සහ ශ්රම සංක්රමණික ක්ෂේත්රයන්හි නව සබඳතා ගොඩනැගීමේ අරමුණින් විදේශ කටයුතු, විදේශ රැකියා සහ සංචාරක අමාත්ය විජිත හේරත් සැප්තැම්බර් 14 සිට 16 දක්වා තායිලන්තයේ නිල සංචාරයක නිරත වේ. මෙම සංචාරය සිදුවන්නේ තායිලන්ත කම්කරු අමාත්යවරයාගේ නිල ආරාධනයකට අනුව ය.
දෙරට අතර පවතින සබඳතා තවදුරටත් ආයතනික මට්ටමින් ශක්තිමත් කිරීමේ පියවරක් ලෙස, ශ්රම සහයෝගීතාව පිළිබඳ අවබෝධතා ගිවිසුමක් (MoU) මෙන්ම තායිලන්තයේ ශ්රී ලාංකික ශ්රමිකයින් සේවයේ යෙදවීම පිළිබඳ විශේෂ එකඟතා ගිවිසුමක් (MoA) මෙහිදී අත්සන් කිරීමට නියමිතව තිබේ.
නීත්යානුකූල රැකියා අවස්ථා සහ සුරක්ෂිතතාව
මෑත කාලීනව ගිනිකොනදිග ආසියානු කලාපයේ රැකියා සම්බන්ධයෙන් මතුවූ ගැටලුවලට විසඳුම් සෙවීම සහ විධිමත් රාමුවක් සැකසීම වෙනුවෙන් මෙම එකඟතාවන් විශේෂ වැදගත්කමක් උසුලයි. නීත්යානුකූල ක්රමවේදයක් යටතේ ශ්රී ලාංකික ශ්රමිකයන් යොමු කිරීම, ඔවුන්ගේ සුභසාධනය, සේවා කොන්දේසි සහ මානව හිමිකම් ආරක්ෂා කිරීම මෙම ගිවිසුම්වල ප්රමුඛ අරමුණක් වී තිබේ.
සංචාරය අතරතුර අමාත්යවරයා තායිලන්තයේ කම්කරු අමාත්යවරයා, සංචාරක අමාත්යවරයා මෙන්ම විදේශ කටයුතු පිළිබඳ වැඩබලන අමාත්යවරයා සමඟ ද්විපාර්ශ්වික සාකච්ඡා පැවැත්වීමට සැලසුම් කර ඇත.
සංචාරක සහ ආර්ථික හවුල්කාරිත්වය
ශ්රම වෙළඳපොළට අමතරව, දෙරට අතර සංචාරක කර්මාන්තය නංවාලීම සහ දෙරටේ ජනතාව අතර පවතින සංස්කෘතික බැඳීම් ආර්ථික ප්රතිලාභ බවට පත්කර ගැනීම සම්බන්ධයෙන් ද මෙහිදී සාකච්ඡා කෙරේ. විශේෂයෙන් ආසියානු කලාපය තුළ ආර්ථික සහයෝගීතාව තවදුරටත් පුළුල් කරගැනීමට මෙම නිල හමුව ප්රායෝගික අවස්ථාවක් සපයනු ඇතැයි අපේක්ෂා කෙරේ.
