*ජේ.ආර්. සැමරුමෙන් ඇරඹි එජාප - සජබ අලුත් දේශපාලන සන්ධානය
*1978 ව්යවස්ථාවෙන් ජනතා පරමාධිපත්යය හා මූලික අයිතිවාසිකම් තහවුරු කළ ආකාරය විමසයි
ශ්රී ලංකාවේ පළමු විධායක ජනාධිපති ජේ. ආර්. ජයවර්ධනගේ 120 වැනි ජන්ම දින සැමරුම නිමිත්තෙන් කොළඹ ජාතික පුස්තකාල හා ප්රලේඛන මණ්ඩල ශ්රවණාගාරයේදී පැවැති විද්වත් කතිකාව අමතමින් අටවැනි විධායක ජනාධිපති සහ එක්සත් ජාතික පක්ෂ නායක රනිල් වික්රමසිංහ විශේෂ ප්රකාශයක් සිදු කළේය.
මහාමාන්ය ඩී. එස්. සේනානායක දේශපාලන පීඨය සංවිධානය කළ මෙම අවස්ථාවට එක්සත් ජාතික පක්ෂය මෙන්ම සමගි ජන බලවේගය ද එක් වේදිකාවකට එක්රැස් කිරීමට ගත් පියවර පිළිබඳව පාර්ලිමේන්තු මන්ත්රී බුද්ධික පතිරණ වෙත සිය කෘතඥතාව පළ කරමින් හිටපු ජනාධිපතිවරයා සිය දේශනය ආරම්භ කළේය.
සමාජවාදී ප්රජාතන්ත්රවාදය සහ දේපළ අයිතියේ විමධ්යගත වීම
එක්සත් ජාතික පක්ෂය ප්රජාතන්ත්රවාදී සමාජවාදී ප්රතිපත්තියක් අනුගමනය කරන පක්ෂයක් බව සිහිපත් කළ රනිල් වික්රමසිංහ, 1975 වසරේදී ජේ. ආර්. ජයවර්ධන ඉදිරිපත් කළ ආර්ථික හා සමාජීය දැක්ම මෙහිදී විස්තර කළේය.
කුඩා නිවසක්, ඉඩමක් හෝ ව්යාපාරයක් හිමි පුරවැසියා තුළ ආර්ථික හා සමාජීය නිදහසක් ගොඩනැගෙන බව පෙන්වා දුන් හිටපු ජනාධිපතිවරයා, රටක දේපළ අයිතිය ලක්ෂ සංඛ්යාත පොදු ජනතාව අතර බෙදී යාමෙන් බලය කේන්ද්රගත වීම වැළකෙන බවත්, එමගින් සමාජ බලය සාමාන්ය පුරවැසියා අතට පත්වන බවත් පෙන්වා දුන්නේය. බලය සහ ධනය රජය හෝ කිසියම් වරප්රසාදිත පන්තියක් අත පමණක් ඒකරාශී වීම වැළැක්වීම එකල ආරම්භ කළ සමාජ-ආර්ථික වැඩපිළිවෙළේ මූලික අරමුණ වූ බව හෙතෙම සඳහන් කළේය.
වසර 17ක ආර්ථික හා සමාජීය පරිවර්තනය
ජේ. ආර්. ජයවර්ධන සහ රණසිංහ ප්රේමදාස යන නායකයන් යටතේ ක්රියාත්මක වූ වසර 17ක කාලය තුළ රටේ සාමාන්ය ජන ජීවිතයේ සිදු වූ යටිතල පහසුකම් පුළුල් වීම සම්බන්ධයෙන් ද රනිල් වික්රමසිංහ දත්ත ගෙනහැර දක්වමින් අදහස් දැක්වීය.
එම කාලසීමාව තුළ පාසල් අධ්යාපනය ලබන දරුවන්ගේ ප්රමාණය මිලියන 2.5 සිට මිලියන 4.1 දක්වා මිලියන 1.6කින් ඉහළ නැංවීමට හැකි වූ ආකාරයත්, රටේ නිවාස හා කර්මාන්ත සඳහා විදුලිබල ආවරණය 10% මට්ටමේ සිට අද වන විට 95% සීමාවට ගෙන ඒමට පදනම වැටුණු ආකාරයත් ඔහු පැහැදිලි කළේය. එසේම, ග්රාමීය නිවාස වැඩසටහන් හේතුවෙන් ස්ථිර නිවාස ප්රතිශතය 40% සිට 80% දක්වා ඉහළ යාම පොදු ජන ආර්ථිකය ශක්තිමත් කළ සුවිශේෂී පියවරක් ලෙස හිටපු ජනාධිපතිවරයා හැඳින්වීය.
මහවැලි ව්යාපෘතිය ඉදිරියට ගෙන ගිය ගාමිණී දිසානායක සහ මහපොළ ශිෂ්යත්ව ක්රමය ආරම්භ කළ ලලිත් ඇතුළත්මුදලි මහතා ඇතුළු නායකයන් මෙරට ආර්ථික සහ සමාජ පරිවර්තනයට ලබාදුන් දායකත්වය ද මෙහිදී සිහිපත් කෙරිණි.
1978 ව්යවස්ථාව සහ පුරවැසි අයිතිවාසිකම් තහවුරු වීම
1978 ආණ්ඩුක්රම ව්යවස්ථාව මගින් ජනතා පරමාධිපත්යය තහවුරු කළ ආකාරය නීතිමය ප්රතිපාදන උපුටා දක්වමින් වික්රමසිංහ විස්තර කළේය.
3 වැනි වගන්තිය:
පරමාධිපත්ය බලය, මූලික අයිතිවාසිකම් සහ ඡන්ද බලය ජනතාව වෙත පැවරීම.
විධායක නායකත්වය:
රාජ්ය නායකයා සෘජුවම රටේ සමස්ත ඡන්දදායකයන්ගේ ඡන්දයෙන් තෝරා පත් කර ගැනීමේ ක්රමවේදය හඳුන්වා දීම.
126 වැනි වගන්තිය:
මූලික අයිතිවාසිකම් උල්ලංඝනය වීමකදී පුරවැසියාට සෘජුවම ශ්රේෂ්ඨාධිකරණය හමුවට යාමට ඇති අධිකරණ බලය තහවුරු කිරීම.
83 වැනි වගන්තිය සහ 9 වැනි වගන්තිය:
වැදගත් ව්යවස්ථා සංශෝධන සඳහා ජනමත විචාරණ පැවැත්වීමේ අවශ්යතාවය සහ බුද්ධාගමට ප්රමුඛස්ථානය ලබාදීමේ විධිවිධාන ආරක්ෂා කිරීම.
එක්සත් ජාතික පක්ෂයේ 80 වැනි සංවත්සරය සහ විපක්ෂයේ එක්සත්කම
එක්සත් ජාතික පක්ෂයේ 80 වැනි සංවත්සර සැමරුම් කටයුතු මේ වන විට ආරම්භ කර ඇති බව සඳහන් කළ රනිල් වික්රමසිංහ, එදා ජේ. ආර්. ජයවර්ධන ආරම්භ කළ සමාජ-ආර්ථික හා දේශපාලන පරිවර්තනය අඛණ්ඩව ඉදිරියට ගෙන යාම සඳහා සමගි ජන බලවේගයේ මන්ත්රීවරුන්ට සහ සාමාජිකයින්ට ද එක්සත් ජාතික පක්ෂයේ සංවත්සරික වැඩසටහන් සමඟ අත්වැල් බැඳගන්නා ලෙස විවෘත ආරාධනයක් කරමින් සිය කතාව අවසන් කළේය.
