කෝවිඩ් 19 නැතිනම් කොරෝනා වසංගතයේ දෙවැනි වටයෙන් පිඩාවට පත් අඩු ආදායම් ලාභී ජනතාවට
පුද්ගලිකව විසඳාගත නොහැකි ආර්ථික හා සෞඛ්‍ය ගැටලුවලට සහනයක් හෝ ලබාදීම පිළිබඳ නිශ්චිත සැලැස්මක් ආණ්ඩුවට නොමැති ආකාරයක් ප්‍රකාශයට පත්වෙමින් පවතී.
මේ නොහැකියාව මෑතදීම අනාවරණය වුනේ ජනමාධ්‍ය අමාත්‍ය කෙහෙළිය රඹුක්වැල්ල කැබිනට් මාධ්‍ය ප්‍රකාශක හා බලශක්ති අමාත්‍ය උදය ප්‍රභාත් ගම්මන්පිල සම කැබිනට් මාධ්‍ය ප්‍රකාශක දෙපල මේ සතියේ සහභාගී වූ අමාත්‍ය මණ්ඩල තීරණ දැනුම් දීමේ ප්‍රවෘත්ති සාකච්ඡාවේදීය.
මෙහිදී එක් මාධ්‍යවේදියෙක් පෙන්වා දුන්නේ කොරෝනා වෛරසය නිසා ඇඳිරි නීතිය බලපවත්නා ගම්පහ දිස්ත්‍රික්කයේ ජනතාවට රුපියල් පන්දහසක මුදලක් ලැබුනත් ඔවුන් මුහුණ දී සිටින ආර්ථික ගැටළු හමුවේ එය පමණක් කිසිසේත් ප්‍රමාණවත් නොවන බවයි.
එමනිසා මේවන විට ලබාගෙන තිබෙන බැංකු ණය සඳහා වූ මාසික වාරික ගෙවීමට සහනදායි කාල සිමාවක් ලබාදිය හැකි ද යන්නත් ප්‍රශ්න කරන ලදී.
ඇමැති වතුර බොයි !
ජනතාවගේ ජීවත්වීමේ අමාරුකම මාධ්‍යවේදියා පවසද්දී ඇමති දෙපළ මුහුණට මුහුණ බලමින් අවඥා සහගත සිනාවක් පා, ගම්මන්පිළ ඇමතිවරයා අසල තිබූ වතුර බෝතලයකින් තොල කට තෙමා ගනිද්දී කෙහෙළිය රඹුක්වැල්ල ඇමතිවරයා ඇත්ත ප්‍රශ්නයට පිළිතුරක් නොදී මගහැර යමින් රුපියල් පන්දහසේ දීමනාව දීර්ඝ විස්තරයක් කළේ “රජයක් හැටියට හැකි සෑම දෙයක්ම කරන” බව පවසමිනි.
කොරෝනා වෛරසය ඉතා සීග්‍රයෙන් දසත පැතිර යද්දීත් සෞඛ්‍ය අංශයේ වසංගත රෝග පිලිබඳ අංශයේ මහජන සෞඛ්‍ය පිලිබඳ ප්‍රධානියාත්, සෞඛ්‍ය දෙපාර්තමේන්තුවේ සෞඛ්‍ය සේවා අධ්‍යක්ෂ ජනරාල්වරයාත් තවමත් පත්කරගත නොහැකි වී තිබෙන්නේ මන්දැයි කෙහෙළිය රඹුක්වැල්ල ජනමාධ්‍ය අමාත්‍යවරයාට යොමුවූ තවත් ප්‍රශ්නයකි.
පරිපාලනයේ එවැනි ප්‍රශ්න තිබුනත් වසංගතය මැඩ පැවැත්වීමට සෞඛ්‍ය අමාත්‍යංශය සමත් වී ඇතිබව රඹුක්වැල්ල අමාත්‍යවරයා එයට ලබාදුන් කදිම පිළිතුර විය.
සෞඛ්‍ය අංශයේ අධ්‍යක්ෂ තනතුරු 25 ක පමණ ප්‍රමාණයක් හිස්ව තිබියදීත් කොරෝනා වැනි බියකරු ලෝක වසංගතයක් පාලනය කිරීමට සෞඛ්‍ය අමාත්‍යංශය සමත්වීනම් ඉන්පසු අධ්‍යක්ෂක පුරප්පාඩු පුරවා වැටුප් හා වෙනත් වරප්‍රසාද සඳහා මහජන මුදල් කාබාසිනියා කරන්නේ ඇයිද යන්නත් කිසියම් මාධ්‍යවේදියකු විමසූ බවක් ප්‍රවෘත්ති අමාත්‍යංශය විසින් ප්‍රසිද්ධියට පත් කර ඇති වීඩියෝ දර්ශන වල දැකගන්නට නැත.
''2018 හා 2019 යන වසරවල දී බිලියන 187 බැගින් වෙන් කර තිබුනද වසංගතයෙන් ජනතාව පීඩා විඳිද්දී 2021 මුදල් වර්ෂය සදහා වන විසර්ජන පනතෙන් සෞඛ්‍ය සදහා වෙන්කර කර ඇත්තේ බිලියන 159 ක් පමණි. ''
2018 හා 2019 යන වසරවල දී බිලියන 187 බැගින් වෙන් කර තිබුනද වසංගතයෙන් ජනතාව පීඩා විඳිද්දී 2021 මුදල් වර්ෂය සදහා වන විසර්ජන පනතෙන් සෞඛ්‍ය සදහා වෙන්කර කර ඇත්තේ බිලියන 159 ක් පමණි.
ආරක්ෂක කටයුතු සඳහා රුපියල් බිලියන 355 ක් ද අධිවේගී මාර්ග සඳහා බිලියන 330 ද වෙන්කර තිබේ. මෙය ගෝඨාභය ජනාධිපතිවරයා ගේ කැබිනට් මණ්ඩලය විසින් අනුමත කර ඇත.
කැබිනට් මණ්ඩල සාකච්ඡාව වාර්තා කිරීමේ යෙදුනු රාජ්‍ය රූපවාහිනී නාලිකාවක මාධ්‍යවේදියකු කොරෝනාසාධිතයකු ලෙස හඳුනා ගැනීමත් සමග ජනමාධ්‍ය ක්ෂේත්‍රයටද වසංගත භීතිකාව පැමිණ ඇති බැවින් පසුගිය 20 වැනිදා ප්‍රවෘත්ති දෙපාර්තමේන්තුවේ පැවති මෙම මාධ්‍ය හමුවට නොපැමිණි මාධ්‍යවේදීන් ප්‍රශ්න මතු කළේ මාර්ගගත විද්‍යුත් සමුළු තාක්ෂණය මගිනි.
ශ්‍රී ලංකාවේ වසංගත රෝගයට ගොදුරුවූ දෙවැනියට වැඩිම පිරිස හඳුනාගෙන තිබුනේ අමාත්‍ය මණ්ඩල සාකච්ඡාවෙන් තුන් දිනකට පසුය.
