1200 x 80 DMirror
 
 

 නාවික හමුදා කඳවුරක් වෙනුවෙන් උතුරේ දෙමළ වැසියන්ගේ ඉඩම් අත්පත්කරගැනීමට දින කීපයක් තිස්සේ දැරූ තවත් උත්සාහයක් ප්‍රදේශවාසී ජනයාගේ අඛණ්ඩ විරෝධය හමුවේ වැළකී ගොස් තිබේ.

 
මිනින්දෝරු දෙපාර්තමේන්තුවේ නිලධාරීන්, ප්‍රාදේශීය ලේකම් ද කැටුව  නාවික හමුදා කදවුරකට වෙන් කිරීම සදහා, මන්ඩතිව් හි පෞද්ගලික ඉඩම් මැන වෙන් කිරීම  ජනවාරි 18 සඳුදා නැවත වතාවක් උත්සාහ ගෙන තිබුනි.
 
එයට ප්‍රදේශවාසීන්ගෙන් සහ දෙමළ ජනතා නියෝජිතයන්ගෙන් මතු වූ විරෝධය හමුවේ එම නිලධාරීන්ට ආපසු හැරී යාමට සිදුව තිබේ.
 
 
“අවාසනාව වෙන්නේ, රජයේ නීති රීති සකස් කර ඇති උපායික ආකාරයන් නිසා, මේ විදියට කෙරෙන ඉඩම් පැහැරගැනීම් සම්බන්ධයෙන් උසාවිවලට යාමට පවා නොහැකි තත්වයක අප සිටීම යි,” යනුවෙන් ප්‍රදේශයේ බහුජන ක්‍රියාධර නීතිඥයකු වන කනකරත්නම් සුගාෂ් ජන මාධ්‍යවේදීන්ට පවසා තිබුනි.
 
 
 
“මේ ගැන කිසි විටෙකත් නීත්‍යානුකූලව ප්‍රශ්න කරන්න ජනතාවට හැකියාවක් නෑ.  ඒ නිසා උතුරු හා නැගෙනහිර මහජනතාවට ඔවුන්ගේ මව්බිම ආරක්ෂා කර ගන්න නම් එකට එකතු විය යුතුයි. ඒ විතරක් නෙමෙයි. මෙය ඊලාම් දෙමළ ජනතාවට එරෙහිව හොඳින් සැලසුම් කළ ජාතිකත්වයන් සුද්ධ කර දැමීමේ කටයුත්තක කොටසක්.  පදිංචි ඉඩම් පැහැරගත් විට, තම ජීවනෝපාය සඳහා එම ඉඩම් මත යැපෙන ජනතාවට වෙනත් භූමි සොයා යාමට බල කෙරෙනවා.”
 
 
මණ්ඩතිව් රතු පසින් යුත් ඉතා සාරවත් භූමියකි.
 
එහි තක්කාලි, මිරිස්, ළූණු සහ දුම්කොළ වැනි බෝග වසර පුරා වගා කළ හැකිය. එසේම, යාපනය අර්ධද්වීපයේ අනෙකුත් ප්‍රදේශවල හිඟව පවතින මිරිදිය මේ බිමේ බහුලව පවතී.
 
උතුරුකරයේ අක්කර 18 කට ආසන්න සාරවත් භූමියක් අත්පත් කර ගැනීම සඳහා නාවික හමුදාව පසුගිය දෙවසර පුරා දිගින් දිගටම උත්සාහ කරමින් සිටී.
 
මෙම ඉඩම් බලහත්කාරයෙන් අත්පත්කරගැනීම සදහා මීට පෙරදීත්  ආරක්ෂක අංශ දැරු උත්සාහයන් ජනතා විරෝධය හමුවේ නවතාගත් බව දෙමළ ජාතික ජනතා පෙරමුණේ (TNPF) පාර්ලිමේන්තු මන්ත්‍රී සෙල්වරාසා ගජේන්ද්‍රන් සඳහන් කළේය.
 
“මේ වන විටත් හමුදා කඳවුරු හයක් මේ ප්‍රදේශයේ තිබෙනවා. ජනතාව තමන්ට උරුම ඉඩ කඩම් වල නැවත පදිංචි කරවීම සඳහා අවංක උත්සාහයන් දරනවා වෙනුවට රජය වෑයම් කරන්නේ බලහත්කාරයෙන් වැඩි වැඩියෙන් අත්පත් කරගන්නයි. අපි ඉල්ලා සිටින්නේ මේ සියලුම හමුදා කඳවුරු විසුරුවා හැර ඉඩම් මහජනයාට ආපසු ලබා දීම පමණක් නෙමෙයි. මහජනයාගේ ඉඩම් පවරා ගැනීමේ අරමුණින් තවදුරටත් කිසියම් ම වූ ක්‍රියාවක යෙදී ම නතර කරන ලෙස යි.”
 
 
Mandaitivu protest 1
 
විරෝධතා දක්වන උතුරේ දෙමළ ජනයා  දැඩි ලෙස කියා සිටියේ නාවික හමුදාවට බිම් අඟලක් වත් දීමට සූදානම් නැති බවයි.
 
 
එහෙත් ආණ්ඩුව තවදුරටත් ඉඩම් ඇල්ලීමට උත්සාහ නොකරන බවට කිසිදු සහතිකයක් නොමැතිවීම සම්බන්ධයෙන්ද දෙමළ ජනයා  බිය පළකරති.
 
ආණ්ඩුවේ මේ පියවර පිටුපස ඇති මූලික කාරණය කුමක්දැයි උතුරේ දෙමළ ජනයා ප්‍රශ්න කරති.
 
“නාවික හමුදාවට තමන්ගේ රාජකාරිය මහ මුහුදේ තිබියදී රට මැද කඳවුරු මොකටද? දැනටමත් නයිනතිව් සහ කරෙයිනගර් වල කඳවුරු තිබෙනවානේ,” යි විරෝධතාකරුවෙක් පළාත් බද මාධ්‍යවේදීන්ට පවසා තිබුනි.
 
දුර්වල සෞඛ්‍ය තත්වයක් තිබියදීත් විරෝධතාවයට එක්ව සිටි  වැඩිහිටි යුවළක් අවධාරණය කළේ, වසර තිහකට වැඩි කාලයක් තිස්සේ තම ජීවිත වනසා ඇති අතර, තමන්ගේ එකම ජීවනෝපාය මාර්ගය වන්නේ මන්ඩතිව් හි පිහිටි ඔවුන් සතු එකම ඉඩම බවයි.
 
පවුලේ සැමට නඩත්තු වීම සඳහා එවන් සාරවත් ඉඩමක් තිබියදීත් අවස්ථාව ලැබෙන හැටියට අස්ථිර රැකියාවන් හි යෙදීමට තම පුතුන්ට සිදුව ඇති අතර, තමන්ගේ මුළු පවුලම සිඳී, බිඳී විසිරී ගොස් ඇති බව ඔවුන් වැඩි දුරටත් පවසා තිබුනි.
 
දිගින් දිගටම බලහත්කාරයෙන්  සිදුවන ඉඩම් කොල්ලය නිසා බොහෝ මිනිසුන්ට මෙම භූමියෙන් ඉවත්ව යෑමට බල කෙරී ඇත.
 
“මේ ඉඩම්වල වී වගා කෙරෙනවා විතරක් නෙමෙයි.  තවත් බෝග ජාති වැවෙනවා,” යැයි වැඩිහිටි යුවළ පවසයි.
 
 
නාවික හමුදා  කඳවුර සඳහා මෙසේ දිගින් දිගටම ඉඩම් කොල්ලකෑමේ උත්සාහයන් අවසන් කරන ලෙසට ආණ්ඩුවේ නිලධාරීන්ට දැනුම් දෙන්නැයි විරෝධතා දැක්වූ ජනතාව සහ දෙමළ මන්ත්‍රීවරු දිස්ත්‍රික් ලේකම් ඒ සෝදිනාදන්ගෙන් ඉල්ලා සිටියහ.
 
එහි දී දිස්ත්‍රික් ලේකම්වරයා විරෝධතාකරුවන්ට පවසා සිටියේ, තමන් අදාළ අමාත්‍යාංශය සමඟ සාකච්ඡා කරන තෙක් මිනුම් කටයුතු අත්හිටුවන බවයි.
 
කුරිරු යුද්ධය අවසන් වී දශකයකට පසුවත් උතුරේ අක්කර සිය ගණනක් වූ විශාල ඉඩම් කැබලි ප්‍රමාණයක් හමුදාවන්ගේ පාලනය යටතේ පවතී.  
 
එමෙන් ම, යුද්ධය අවසන් වූ දා සිට, සත්ව පාලනය, කෘෂිකර්මාන්තය, ඉගැන්වීම වැනි, හමුදාමය නොවන ක්‍රියාකාරකම් වල නියුක්ත කර හමුදාවේ කටයුතු ‘විවිධාංගීකරණය’ කිරීමෙන් දෙමළ ජනතාව ආර්ථික ක්‍රියාකාරීත්වයේ අද්දරට තල්ලු කර ඇත.  
 
 
 
 
මණ්ඩතිව් විරෝධතාවයට එක්වූ දේශපාලන පක්ෂ අතර ධීවර ඇමති ඩග්ලස් දේවානන්දගේ නායකත්වයෙන් යුත් ආණ්ඩුවේ හවුල්කාර ඊපීඩීපී ය ද එක්ව සිටි අයුරු පළාත් බද මාධ්‍ය වේදීන්ගේ කැමරා කාචයට හසුව තිබේ.
 
 
################
කොන්ෆියුසියස් මධ්‍යස්ථාන ප්ලේ කරන ස්මාර්ට් ගේම් එක
 
පොලිස් ඇමතිට එරෙහි පොලිස් පැමිණිල්ලක්

subscribeYT

subscribeYT

WhatsApp Image 2021 09 13 at 13.49.58