1200 x 80 DMirror
 
 

 අවසර ඇතිව කච්චතීවු මුහුදේ මසුන් මැරීමේ යෙදී සිටි ඉන්දීය ධීවරයන් පිරිසකට පහර දුන් බවට ශ්‍රී ලංකා නාවික හමුදාවට චෝදනා එල්ල වී තිබේ.
ශ්‍රී ලංකා සාගර කලාපයේ ඉන්දීය ධීවරයන්ට මසුන් මැරීමට අවසර දී ඇති කච්චතීව් දූපත අසලදී 22 බදාදා ප්‍රහාරයෙන් යාත්‍රා කිහිපයකටත් දැල් ආම්පන්නවලට හානි සිදුවී ඇති ඇති බව තමිල්නාඩු ධීවර සමිති නායකයෝ පවසති.
 
“පාරම්පරික වශයෙන් කරගෙන යන පරිදි කච්චතීවු දුපත අසල මාළු බාමින් ඉන්නකොට ශ්‍රී ලංකා නාවික හමුදාවෙන් ඇවිල්ලා දැල් කපලා ගල් වලින් ගහලා වීදුරු කුඩු කරලා එලෙව්වා,” යි රාමේශ්වරම් ධීවර සංගමයේ සභාපති බෙන්සිලාස් ජේසුරාජා මාධ්‍යවේදීන්ට පැවසීය.
 
ඉන්දීය රජය විසින් සතියකට දින තුනක් කච්චතීවු මුහුදේ මසුන් මැරීමට අවසර දී තිබුනත් ගැටුම් අවම කරගැනීම සඳහා තමිල්නාඩු ධීවරයන් ස්වේච්ඡාවෙන් ගත් තීන්දුවක් අනුව බදාදා සහ සෙනසුරාදා පමණක් රැකියාවේ යෙදෙන බව ඔහු වැඩිදුරටත් කියා සිටියේය.
 
“දිගින් දිගටම මේක සිද්ධවීම රාමේශ්වරමේ ධීවරයන්ට ජීවිකාව පවත්වාගෙන යන්න ලොකු බාධාවක්, ආණ්ඩු දෙක සාකච්ඡා කරලා මේකට ස්ථිර විසන්දුඅක් දෙන්න ඕනේ.”
 
 
 
ඉන්දීය ධීවර බලධාරීන් උපුටා දක්වන එරට ජනමාධ්‍ය වාර්තා කරන පරිදි, බදාදා සවස අඳුරු වැටෙමින් තිබියදී, මුර සංචාරයේ යෙදී සිටි නාවික හමුදා භටයන් 10 දෙනකුගෙන් පමණ යුත් කණ්ඩායමක් විසින්, කච්චතීව් අසලදී, ඉන්ධීය  ධීවරයන් වෙත වීදුරු බෝතල් සහ ගල් වලින් දමා ගසා තිබේ.
 
ශ්‍රී ලංකා නාවික හමුදාව එම චෝදනාවට ලක්ව ඇත්තේ මත්ද්‍රව්‍ය ඇතුළු නීතිවිරෝධී ද්‍රව්‍ය රට තුලට ගෙන ඒම වලක්වන බව පැවසුවත්, ධිවර සම්පත් කොල්ල කන ඉන්දීය ධීවරයන් නවතා ලීමට නාවික හමුදාව සමත් වී නොමැති බවට දේශිය ධීවරයන්ගෙන්ද දිගින් දිගටම චෝදනාවට ලක්වෙමින් සිටියදීය .
 
''දේශයේ ප්‍රථම ආරක්ෂක වළල්ල'' ලෙසින් තමන් හඳුන්වා ගන්නා ශ්‍රී ලංකා නාවික හමුදාව මෙරට මුහුදට ඇතුල්වන අනවසර ඉන්දීය ධීවරයන් ගැන එතරම් තැකීමක් නොකරන බව ඉන්දීය ට්‍රෝලර් යාත්‍රා මගින් මත්ස්‍ය සම්පත කොල්ල කෑම සම්බන්ධයෙන් ජාතික ධිවර සහයෝගිතා ව්‍යාපාරය හා උතුරේ ධිවර සමිති අතර පසුගිය දා පැවති සාකච්ජාවක දී අවධාරණය වී තිබුනි.
 
ඉන්දීය මාධ්‍ය වැඩි දුරටත් වාර්තා කර ඇත්තේ එම පහර දීමෙන් ධීවරයන් කිසිවකුත් තුවාල ලබා නොමැති බවයි.
 
"හානිවූ යාත්‍රා වෙනත් අයගේ ආධාරයෙන් වෙරළට ඇදගෙන ගොස් තිබේ."
 
තමන්ට එල්ල වන චෝදනාව සම්බන්ධයෙන් නාවික හමුදාව දෙදිනක් ගතවීත් ප්‍රතිචාර දක්වා ඇති බවක් දැනගන්නට නැත.
 
මුහුදේ ආරක්ෂාව වෙනුවෙන් නාවික හමුදාව කෙතරම් මෙහෙයුම් කළ ද ඉන්දීය ට්‍රෝලර් යාත්‍රා සමඟ පැමිණෙන ධීවරයන් මෙරට මත්ස්‍ය සම්පත කොල්ල කෑමට එරෙහිව විධිමත් ක්‍රියා මාර්ගයක් නො ගැනීම දෙරටේ ධීවරයන් අතර ගැටුමක් ඇති විය හැකි බවට අනතුරු අඟවන ජාතික ධිවර සහයෝගිතා ව්‍යාපාරය, පසුගියදා ආණ්ඩුවෙන් ඉල්ලා තිබුනේ ආරාවුල විසදීමට මැදිහත් වන ලෙසය.
 
''ආණ්ඩුව කමිටුවක් පත් කරලා මේ ගැන සොයලා තිරසාර විසදුමක් දෙන්න ඕනෑ. දැන් වෙනකොට ප්‍රශ්නය ටිකක් බරපතලයි දෙරටේ ධීවර ප්‍රජාවන් අතර ගැටුමක් ඇතිවීම නම්  හොඳ දෙයක් නෙමේ, මේ  කොරෝනා වසංගතයත්, මුහුදු රස්සාව නැති වීමත් එක්ක ධීවරයෝ ඉන්නේ  බරපතළ  මානසික පිඩනයකින්'' යැයි 'ජාතික ධීවර සහයෝගිතා ව්‍යාපාරයේ' උතුරු පළාත් සම්බන්ධිකාරක ඇන්තනි ජේසුදාසන් පවසා තිබුනි.
 
 
 
 

 
 

THE LEADER TV 
බැසිල් - විමල් ගැටෙයි: අගමැති නිහඬයි !
 
 
ලොක්කා බයවෙලා ? 

subscribeYT

subscribeYT

WhatsApp Image 2021 09 13 at 13.49.58